മഹീന്ദ്ര 'മരാസോ' സെപ്തംബറിൽ അവതരിക്കും; ലക്ഷ്യം ഇന്നോവ ക്രിസ്റ്റ

U321 കോഡ് നാമത്തിൽ എത്തിയ എംപിവിയുടെ പേര് 'മരാസോ' എന്നാണെന്ന് കഴിഞ്ഞ ദിവസമാണ് മഹീന്ദ്ര ഔദ്യോഗികമായി പ്രഖ്യാപിച്ചത്. ഷാർക്ക് എന്നർത്ഥം വരുന്ന മരാസോ ഒരു സ്പാനിഷ് പദമാണ്. ഷാർക്കിന്‍റെ മാതൃകയിൽ രൂപകൽപ്പന നടത്തിയിരിക്കുന്നതിനാലാണ് മരാസോ എന്ന പേര് നൽകിയതെന്നാണ് കമ്പനി അവകാശപ്പെടുന്നത്. പേരിടലിനുശേഷം വിപണിയിലേക്കുള്ള വരവറിയിച്ചിരിക്കുകയാണ് മഹീന്ദ്ര.

പുതിയ മരാസോ എംപിവി ഈ വർഷം സെപ്തംബറോടുകൂടി വിപണിയിൽ അവതരിക്കുമെന്നാണ് അറിയിച്ചിരിക്കുന്നത്. അതോടൊപ്പം പുതിയ എംപിവിയുടെ ചില ചിത്രങ്ങളും കമ്പനി പുറത്തിറക്കിയിട്ടുണ്ട്. സ്രാവിന്‍റെ പല്ലുകളിൽ നിന്നും പ്രചോദനം ഉൾക്കൊണ്ട ഫ്രണ്ട് ഗ്രിൽ, സ്രാവിന്‍റെ വാൽഭാഗത്തോട് സാമ്യതയുള്ള ടെയിൽ ലാമ്പ്, പ്രോജക്ടർ ഹെഡ് ലാമ്പ് എന്നിവയാണ് ശ്രദ്ധയാകർഷിക്കുന്ന പ്രധാന എക്സ്റ്റീരിയർ ഫീച്ചറുകൾ. സെഗ്മെന്‍റിൽ തന്നെ ആദ്യമെന്ന് പറയാവുന്ന ഫീച്ചറുകളായിരിക്കും അകത്തളത്തിൽ ഒരുങ്ങുക.

ഏഴ്, എട്ട് സീറ്റ് ഓപ്ഷനിലാണ് മരാസോ വിപണിയിലെത്തുക. മഹീന്ദ്രയുടെ ഏറ്റവും പുതിയ ടച്ച്സ്ക്രീൻ സിസ്റ്റം മരാസോയിൽ പ്രതീക്ഷിക്കാം. ആപ്പിൾ കാർ പ്ലെ, ഓട്ടോമാറ്റിക് ക്ലൈമറ്റ് കൺട്രോൾ തുടങ്ങിയ ഫീച്ചറുകളും ഇടംതേടുന്നതായിരിക്കും. മഹീന്ദ്രയും ഇറ്റാലിയൻ കമ്പനിയായ പെനിൻഫെരിയയും ചേർന്ന് വികസിപ്പിച്ച ഈ എംപിവി പുതിയ ഡിസൈൻ ഫിലോസഫിയാണ് പിന്തുടർന്നിരിക്കുന്നത്. മോണോകോക്ക് പ്ലാറ്റ്ഫോമിലാണ് മരാസോയുടെ നിർമാണം.

121ബിഎച്ച്പിയും 300 എൻഎം ടോർക്കും നൽകുന്ന 1.5 ലിറ്റർ ഡീസൽ എൻജിനാണ് മരാസോയ്ക്ക് കരുത്തേകുന്നത്. 6 സ്പീഡ് മാനുവൽ, ഓട്ടോമാറ്റിക് ഗിയർബോക്സുകളായിരിക്കും ചക്രങ്ങളിലേക്ക് വീര്യമെത്തിക്കുക. നീളമേറിയ വീൽബേസാണ് മരാസോയ്ക്ക് നൽകിയിരിക്കുന്നതിനാൽ അകത്തളത്തിൽ കൂടുതൽ സ്ഥലസൗകര്യവും പ്രതീക്ഷിക്കാം.

ദീപാവലി ഉത്സവ സീസൺ ലക്ഷ്യമിട്ട് വിപണിയിലെത്തുന്ന മരാസോയ്ക്ക് 10 മുതൽ 15 ലക്ഷം വരെ വില പ്രതീക്ഷിക്കാം. ഇന്നോവ ക്രിസ്റ്റയാണ് എംപിവി ശ്രേണിയിൽ മരാസോയ്ക്കുള്ള പ്രധാന എതിരാളി.