പുതിയ എർടിഗയുമായി മാരുതി എത്തുന്നു; ലക്ഷ്യം മരാസോ

കഴിഞ്ഞ ദിവസമാണ് മഹീന്ദ്രയുടെ പുതിയ മരാസോ എംപിവി വിപണിയിൽ എത്തിച്ചേർന്നത്. ഇപ്പോഴിതാ എർടിഗയുടെ രണ്ടാം തലമുറ മോഡലിനെ പുറത്തിറക്കാനുള്ള തിടുക്കത്തിലാണ് മാരുതി. മൾട്ടി പർപ്പസ് വാഹന ശ്രേണിയിൽ മഹീന്ദ്രയുടെ മരാസോ വലിയൊരു വെല്ലുവിളിയായി തീരുമെന്ന ഭയത്താലാകാം എർടിഗയുടെ പുത്തൻ പതിപ്പുമായി മാരുതി എത്തുന്നത്.

ഈ വർഷം ആദ്യം ഇന്തോനേഷ്യയിൽ അവതരിച്ച പുതിയ എർടിഗയാണ് ഇന്ത്യൻ തീരമണയുന്നത്. ഉത്സവക്കാലം ലക്ഷ്യമിട്ട് അടുത്തമാസം അവസനാത്തോടെയായിരിക്കും പുതിയ എർടിഗ അവതരിക്കുക. നിലവിൽ രാജ്യത്തുടനീളമുള്ള മാരുതിയുടെ ഡീലർഷിപ്പുകളിൽ എർടിഗയ്ക്കുള്ള ബുക്കിങും ആരംഭിച്ചു കഴിഞ്ഞു. പുതിയ പെട്രോൾ എൻജിൻ കരുത്തിൽ അടിമുടി മാറ്റങ്ങളുമായിട്ടായിരിക്കും പുതിയ എർടിഗ എത്തുക.

മരാസോയുമായി കിടപിടിക്കാൻ നീളവും വീതിയും ഉയരവും കൂട്ടി കൂടുതൽ സൗകര്യങ്ങള്‍ ഒരുക്കിയായിരിക്കും പുതിയ എർടിഗയുടെ വരവ്. നിലവിലെ 1.4 ലിറ്റർ പെട്രോൾ എൻജിനുപകരം പുത്തൻ സിയാസിൽ ഉൾപ്പെടുത്തിയിട്ടുള്ള മൈൽഡ് ഹൈബ്രിഡ് സാങ്കേതികതയുള്ള 1.5 ലിറ്റർ ഫോർ സിലിണ്ടർ എൻജിനായിരിക്കും പുതിയ എർടിഗയ്ക്ക് കരുത്തേകുക. നിലവിലുള്ള 1.3 ലിറ്റർ ഡീസൽ എൻജിൻ മാറ്റമില്ലാതെ തുടരുന്നതായിരിക്കും.