പുതിയ സ്വിഫ്റ്റിന്‍റെ ബുക്കിങ് ഡീലർഷിപ്പുകളിൽ ആരംഭിച്ചു

അവതരണത്തിന് മുന്നോടിയായി മാരുതി മൂന്നാം തലമുറ സ്വിഫ്റ്റിന്‍റെ ബുക്കിങ് ആരംഭിച്ചു. പ്രധാന നഗരങ്ങളിലുള്ള ചില ഡീലർഷിപ്പുകളിലാണ് ബുക്കിങ് സ്വീകരിച്ച് തുടങ്ങിയിരിക്കുന്നത്. എന്നാൽ ബുക്കിങ് സംബന്ധിച്ചുള്ള കൂടുതൽ വിവരങ്ങളൊന്നും കമ്പനി പുറത്തുവിട്ടിട്ടില്ല. വരും ആഴ്ചകളിൽ കൂടുതൽ വിവരങ്ങൾ ലഭ്യമാക്കുമെന്നാണ് റിപ്പോർട്ട്.

11,000 രൂപ അഡ്വാൻസായി നൽകി ബുക്കിങ് നടത്താനുള്ള അവസരമാണ് മാരുതി ഒരുക്കിയിരിക്കുന്നത്. പഴയ സ്വിഫ്റ്റിന്‍റെ സ്റ്റോക്ക് തീർന്ന പശ്ചാത്തലത്തിലാണ് ഡീലർഷിപ്പുകൾ ബുക്കിങ് ആരംഭിച്ചിരിക്കുന്നത്. പുതിയ സ്വിഫ്റ്റിന്‍റെ ഉല്പാദനം കമ്പനി അടുത്തിടെയാണ് ഔദ്യോഗികമായി നിർത്തിവച്ചത്. അതുകൊണ്ട് തന്നെ പഴയ സ്വിഫ്റ്റുകളുടെ വിതരണവും ഡീലർഷിപ്പുകൾ നിർത്തിവച്ചിരിക്കുകയാണ്.

ജനുവരി അവസാനത്തോടെ പുതിയ സ്വിഫ്റ്റിന്‍റെ അവതരണമുണ്ടാകുമെന്നാണ് കമ്പനി നൽകുന്ന സൂചന. ഫെബ്രുവരിയിൽ നടക്കാനിരിക്കുന്ന 2018 ഓട്ടോ എക്സ്പോയിലൂടെയായിരിക്കും പുതിയ സ്വിഫ്റ്റിന്‍റെ അവതരണം. രണ്ട് മുതൽ മൂന്ന് മാസം വരെയുള്ള കാത്തിരിപ്പ് സമയമാണ് പുതിയ സ്വഫ്റ്റിനായി ഒരുക്കിയിരിക്കുന്നത് എന്നാണ് ഡീലർഷിപ്പുകളിൽ നിന്നും ലഭിക്കുന്ന വിവരം.