പുതിയ മിത്സുബിഷി ഔട്ട്‍ലാൻഡ‍ർ ഇന്ത്യയിൽ

2018 ഔട്ട്‍ലാൻഡ‍റുമായി മിത്സുബിഷി ഇന്ത്യയിൽ. മുംബൈ എക്സ്ഷോറൂം 31.54 ലക്ഷം രൂപയാണ് പുതിയ ഔട്ട്‍ലാൻഡ‍റിന്‍റെ വില. പൂർണമായും ഇറക്കുമതി ചെയ്ത മോഡലാണ് വിപണിയിൽ എത്തിയിരിക്കുന്നത്. മിത്സുബിഷിയുടെ ഡയനാമിക് ഷീല്‍ഡ് ഡിസൈന്‍ ശൈലിയിലാണ് പുതിയ ഔട്ട്‍ലാൻഡ‍റിനെ ഒരുക്കിയിരിക്കുന്നത്. എയറോഡൈനാമിക്‌ ഡിസൈൻ ശൈലിയിലുള്ള ഔട്ട്‍ലാൻഡ‍റിന്‍റെ മുൻഭാഗവും മേൽക്കൂരയും 7 ശതമാനം വായു പ്രതിരോധം കുറയ്ക്കുമെന്ന അവകാശമാണ് മിത്സുബിഷി ഉന്നയിക്കുന്നത്.

ഓറിയന്‍റ് റെഡ്, കോസ്മിക് ബ്ലൂ, ബ്ലാക് പേള്‍, കൂള്‍ സില്‍വര്‍, ടൈറ്റാനിയം ഗ്രെയ്, വൈറ്റ് സോളിഡ്, വൈറ്റ് പേള്‍ എന്നീ ഏഴു നിറങ്ങളിലാണ് പുതിയ ഔട്ട്‍ലാൻഡ‍ർ ലഭ്യമാവുക. എല്‍ഇഡി ഹെഡ്‌ലാമ്പുകൾ, ഡെയ്‌ടൈം റണ്ണിംഗ് ലൈറ്റുകൾ, എല്‍ഇഡി ഫോഗ്‌ലാമ്പുകള്‍, ഹീറ്റഡ് മിററുകള്‍ എന്നിവ പുറംമോടിയിൽ ശ്രദ്ധ പിടിച്ചുപറ്റുന്ന ഘടകങ്ങളാണ്.

വൈദ്യുത സണ്‍റൂഫ്, ഡ്യൂവല്‍ സോണ്‍ ക്ലൈമറ്റ് കണ്‍ട്രോള്‍, ലെതര്‍ സീറ്റുകള്‍, 6.1 ഇഞ്ച് ടച്ച്‌സ്‌ക്രീന്‍ സംവിധാനം,വൈദ്യുത പാര്‍ക്കിംഗ് ബ്രേക്ക്, സിവിടി ഗിയര്‍ബോക്‌സ് സംവിധാനത്തിലുള്ള പാഡില്‍ ഷിഫ്റ്ററുകള്‍ തുടങ്ങിയവ അകത്തളത്തലെ ശ്രദ്ധേയമായ സവിശേഷതകളാണ്.

7 എയര്‍ബാഗുകള്‍, എബിഎസ്, ബ്രേക്ക് അസിസ്റ്റ്, ആക്ടിവ് സ്റ്റബിലിറ്റി കണ്‍ട്രോള്‍, ഇലക്ട്രോണിക് ബ്രേക്ക്‌ഫോഴ്‌സ് ഡിസ്ട്രിബ്യൂഷന്‍, ഹില്‍ - സ്റ്റാര്‍ട്ട് അസിസ്റ്റ് തുടങ്ങിയ ഫീച്ചറുകൾ വാഹനത്തിന്‍റെ സുരക്ഷയും ഉറപ്പുവരുത്തുന്നു. 164 ബിഎച്ച്പിയും 222എൻഎം ടോർക്കും നൽകുന്ന 2.4 ലിറ്റർ 4 സിലിണ്ടർ നാച്ചുറലി ആസ്പിരേറ്റഡ് പെട്രോൾ എൻജിനാണ് പുതിയ ഔട്ട്‍ലാൻഡ‍റിന്‍റെ കരുത്ത്.