നിസാൻ കിക്ക്സ് അവതരണം ഓക്ടോബർ 18ന്

പുതിയ കിക്ക്സ് എസ്‍യുവിയെ ഇന്ത്യയിൽ അവതരിപ്പിക്കാൻ ഒരുങ്ങുകയാണ് ജാപ്പനീസ് നിർമാതാക്കളായ നിസാൻ. ഓക്ടോബർ 18ഓടെ കിക്ക്സിന്‍റെ അനാവരണം നടക്കുമെന്നാണ് റിപ്പോർട്ട്. അടുത്ത വർഷം ജനുവരിയോടുകൂടി നിസാൻ കിക്ക്സ് നിരത്തിലെത്തുകയും ചെയ്യും. കഴിഞ്ഞ ഏതാനും മാസങ്ങളായി നിസാൻ കിക്ക്സിന്‍റെ ഇന്ത്യൻ നിരത്തിലെ പരീക്ഷണയോട്ടം തകൃതിയായി നടക്കുകയാണ്. അടുത്തിടെ കിക്ക്സിന്‍റെ ടീസറും പുറത്തുവന്നിരുന്നു.

ഹ്യുണ്ടായ് ക്രെറ്റയ്ക്ക് പ്രധാന വെല്ലുവിളി ഉയർത്തി കൊണ്ടായിരിക്കും നിസാൻ കിക്ക്സ് നിരത്തിലെത്തുക. 5 സീറ്റർ പരിവേഷത്തിലാണ് നിസാൻ കിക്ക്സ് ഇന്ത്യയിൽ അവതരിക്കുന്നത്. 9.40 ലക്ഷത്തിനും 15 ലക്ഷത്തിനും ഇടയിൽ വില പ്രതീക്ഷിക്കാം. 1.5 ലിറ്റർ ഡീസൽ, 1.5 ലിറ്റർ പെട്രോൾ കരുത്തിലാണ് കിക്ക്സ് നിരത്തിലെത്തുന്നത്. 8.0 ഇഞ്ച് ടച്ച്സ്ക്രീൻ സിസ്റ്റം പ്രധാന ഫീച്ചറായി ഒരുങ്ങുന്നതായിരിക്കും.