ടെറാനോ സ്പോർട് എഡിഷനുമായി നിസാൻ ഇന്ത്യയിൽ

ടെറാനോ സ്പോർട് എഡിഷനെ വിപണിയിൽ അവതരിപ്പിച്ച് നിസാൻ. ഡൽഹി എക്സ്ഷോറൂം 12.22ലക്ഷം രൂപയാണ് വില. പുത്തൻ പുതിയ ഫീച്ചറുകളുമായാണ് ടെറാനോ സ്പോർട് എത്തിയിരിക്കുന്നത്. ബ്ലാക് നിറത്തിലുള്ള റൂഫും സ്പോർടി ബോഡി ഗ്രാഫിക്സുമാണ് പുതിയ ടെറാനോ സ്പോർടിന്‍റെ പ്രധാനാകർഷണം. പില്ലറുകൾക്കും വീൽ ആർച്ചുകൾക്കും അതെ കറുപ്പ് നിറം തന്നെ നൽകിയിട്ടുണ്ട്. മുന്‍ ഫെന്‍ഡറുകളിലും ബോണറ്റിലും പിന്‍ ബമ്പറിലും വീതിയേറിയ ചുവപ്പ് വരകള്‍ കാണാം.



ക്രിംസൺ നിറത്തിലുള്ള സീറ്റ് കവറും ഫ്ലോർ മാറ്റും, ഡ്യുവൽ ടോൺ നിറത്തിലുള്ള ഡാഷ്ബോർഡ്, 7.0 ഇഞ്ച് ടച്ച് സ്ക്രീൻ, എന്നിവയാണ് അകത്തളത്തിലെ എടുത്തുപറയേണ്ട സവിശേഷതകൾ. സുരക്ഷ ഉറപ്പാക്കി എബിഎസ്, ഡ്യുവൽ എയർബാഗ്, ബ്രേക്ക് അസിസ്റ്റ് ഉള്ള ഇലക്ട്രോണിക് ബ്രേക്ക്‌ഫോഴ്‌സ് ഡിസ്ട്രിബ്യൂഷന്‍ എന്നിങ്ങനെയുള്ള സംവിധാനങ്ങൾ ഒരുക്കിയിട്ടുണ്ട്.



മെക്കാനിക്കൽ സംബന്ധിച്ച മാറ്റങ്ങൾ വരുത്തിയിട്ടില്ല. അതെ 1.6 ലിറ്റർ പെട്രോൾ, 1.5 ലിറ്റർ ഡീസൽ എൻജിനുകൾ തന്നെയാണ് കരുത്തേകുന്നത്. 102 ബിഎച്ച്പിയും 145 എൻഎം ടോർക്കുമാണ് പെട്രോൾ എൻജിനുള്ളത്. അതേസമയം 84 ബിഎച്ച്പിയും 200 എൻഎം ടോർക്കും 108 ബിഎച്ച്പിയും 243 എൻഎം ടോർക്കും നൽകുന്നതാണ് ഇതിലെ ഡീസൽ എൻജിൻ.