വൈദ്യുത വാഹനങ്ങൾക്ക് ഇനി പച്ച നമ്പർ പ്ലേറ്റ്

ന്യൂഡൽഹി: വൈദ്യുത വാഹനങ്ങളുടെ നമ്പർ പ്ലേറ്റ് പച്ചയാക്കാൻ കേന്ദ്ര സർക്കാർ തീരുമാനം. പെട്രോൾ, ഡീസൽ, വാഹനങ്ങളിൽ നിന്നും പരിസ്ഥിതി സൗഹൃദ വാഹനങ്ങളെ നിരത്തിൽ വേറിട്ടു നിർത്താനാണ് പച്ച നമ്പർ പ്ലേറ്റുകൾ നൽകാൻ സർക്കാർ ഉദ്ദേശിക്കുന്നത്. പച്ച പ്രതലത്തിൽ വെള്ള അക്ഷരങ്ങളോടു കൂടിയതാകും സ്വകാര്യ വൈദ്യുത വാഹനങ്ങളുടെ നമ്പർ പ്ലേറ്റ്. ടാക്സി ഉൾപ്പടെ വാണിജ്യാടിസ്ഥാനത്തിൽ ഉപയോഗിക്കുന്ന വൈദ്യുത വാഹനങ്ങളുടെ നമ്പർ പ്ലേറ്റുകളിൽ പച്ച പ്രതലവും മഞ്ഞ അക്ഷരങ്ങളുമാണ് ഉണ്ടാവുക.

ഉടൻ തന്നെ ഇന്ത്യന്‍ നിരത്തില്‍ ഓടുന്ന എല്ലാ വൈദ്യുത വാഹനങ്ങള്‍ക്കും പച്ചനിറത്തിലുള്ള നമ്പര്‍ പ്ലേറ്റ് നിർബന്ധമാക്കും. ഹരിത നമ്പര്‍ പ്ലേറ്റുകള്‍ പ്രാബല്യത്തില്‍ വരുന്നതോടെ പരിസ്ഥിതി സൗഹൃദ വാഹനങ്ങള്‍ നിരത്തില്‍ വേറിട്ടു നില്‍ക്കും. ഹരിത നമ്പര്‍ പ്ലേറ്റുകളുള്ള വാഹനങ്ങൾക്ക് ആനുകൂല്യങ്ങൾ ഒരുക്കാനും സർക്കാർ തീരുമാനിച്ചിട്ടുണ്ട്.