'സുസൂക്കി കണക്ട്' പുതിയ സ്മാര്‍ട്ട്‌ഫോണ്‍ ആപ്പുമായി മാരുതി

ഇന്ത്യയിലെ മുൻനിര കാർ നിർമ്മാതാക്കളായ മാരുതി സുസൂക്കി പുതിയ സ്മാര്‍ട്ട്‌ഫോണ്‍ ആപ്പുമായി രംഗത്ത്. ഐഒഎസ്, ആന്‍ഡ്രോയിഡ് ഉപയോക്താക്കള്‍ക്ക് വേണ്ടി 'സുസൂക്കി കണക്ട്' എന്ന പേരിലാണ് ആപ്പ് ആരംഭിച്ചിരിക്കുന്നത്. നെക്സ ഉപഭോക്താക്കളെ മുൻനിർത്തി 9,999രൂപയ്ക്കാണ് പുതിയ ആപ്പ് ലഭ്യമാക്കിയിരിക്കുന്നത്.

ഒരുപിടി സേവനങ്ങൾ ഉപഭോക്താക്കൾക്ക് ഈ ആപ്പ് വഴി ലഭ്യമാക്കാം. തൊട്ടടുത്തുള്ള മാരുതിയുടെ ഡീലര്‍ഷിപ്പ് കണ്ടെത്താനും സര്‍വീസ് ബുക്ക് ചെയ്യാനും ആപ്പ് വഴി സാധിക്കും. കൂടാതെ കാറിന്‍റെ പെർഫോമൻസ്, തകരാറുകള്‍, ബാറ്ററി ലൈഫ് എന്നിവ സംബന്ധിച്ച വിവരങ്ങളും ആപ്പ് മുഖേന ലഭിക്കും. തിരക്കേറിയ പാര്‍ക്കിങ് ഇടങ്ങളില്‍ നിന്ന് നിങ്ങളുടെ കാർ കണ്ടെത്താനും ഈ ആപ്പ് സഹായിക്കും.

ഓഫ്‌ലൈന്‍ മാപ്പുകള്‍, സര്‍വീസ് തീയതി, തത്സമയ ട്രാഫിക്ക് വിവരങ്ങള്‍ എന്നിവയും ആപ്പ് വഴി ലഭ്യമാക്കാൻ സാധിക്കും. മാത്രമല്ല ഫ്യുവൽ ലെവൽ, ഓവർ സ്പീഡിങ് അലേർട്ട്, സീറ്റ് ബെൽറ്റ് സ്റ്റേറ്റസ് എന്നിവ അതാത് സമയങ്ങളിൽ കാർ ഡ്രൈവർമാരെ അറിയിക്കും. അടിയന്തര സാഹചര്യങ്ങളിൽ ഹെല്‍പ്‌ലൈന്‍, 24x7 റോഡ് സൈഡ് അസിസ്റ്റന്‍സ്, കസ്റ്റമര്‍ കെയര്‍ സേവനങ്ങളും ആപ്പിൽ ലഭിക്കുന്നതായിരിക്കും.

മാരുതിയുടെ സുസൂക്കി കണക്ട് ആപ്പ് ഉപയോഗിക്കുന്നതിനായി പ്രത്യേക സുസുക്കി കണക്ട് സംവിധാനം കാറില്‍ ഘടിപ്പിക്കേണ്ടതായിട്ടുണ്ട്. ഈ സംവിധാനം വഴിയാണ് ആപ്പിനെ കാറുമായി ബന്ധിപ്പിക്കാൻ സാധിക്കുക. മാരുതിയുടെ അംഗീകൃത ഡീലർഷിപ്പുകളിൽ നിന്നും സുസൂക്കി കണക്ട് സംവിധാനം ലഭ്യമാക്കാവുന്നതാണ്. നിലവിൽ നെക്സ വഴി പുറത്തിറങ്ങുന്ന മോഡലുകൾക്ക് മാത്രമാണ് ആപ്പ് സേവനം ലഭ്യമാക്കിയിരിക്കുന്നത്. മാരുതിയുടെ ബലെനോ, ഇഗ്നിസ്, എസ്-ക്രോസ്, സിയാസ് മോഡലുകൾക്ക് ആപ്പ് സേവനം ലഭിക്കുന്നതായിരിക്കും.