റോൾസ് റോയിസ് കള്ളിനൻ അവതരണം നവംബറിൽ

റോൾസ് റോയ്സിന്‍റെ ആദ്യ ആഡംബര എസ്‍യുവി കള്ളിനൻ നവംബറിൽ ഇന്ത്യയിലവതരിക്കും. ഏതാണ്ട് 9 കോടിയോളം വില പ്രതീക്ഷിക്കാം. ദക്ഷിണാഫ്രിക്കയിലെ ഖനിയിൽ നിന്നും കുഴിച്ചെടുത്ത ഒരു തരം രത്നത്തിന്‍റെ പേരാണ് കള്ളിനൻ. രത്നത്തോളം വിലമതിക്കുന്നു എന്നതിനാലാണ് കമ്പനി ഈ പേര് തെരഞ്ഞെടുത്തിരിക്കുന്നത്. നവംബറിൽ ഇന്ത്യയിലെത്തുന്ന ഈ എസ്‍യുവിയുടെ ഡെലിവറി അടുത്ത വർഷമാണ് ആരംഭിക്കുക.

571 പിഎസ് കരുത്തും 850 എൻഎം ടോർക്കും നൽകുന്ന 6.75 ലിറ്റർ ട്വിൻ ടർബോചാർജ്ഡ് വി12 എൻജിനാണ് കള്ളിനൻ എസ്‍യുവിയ്ക്ക് കരുത്തേകുക. റോൾസ് റോയ്സ് നിരത്തിലെത്തിക്കുന്ന ആദ്യ ഓൾ വീൽ ഡ്രൈവ് വാഹനം കൂടിയാണ് കള്ളിനൻ. ഫാന്‍റം മോഡലുകൾക്ക് സമാനമായ രീതിയിലായിരിക്കും കള്ളിനന്‍റെയും രൂപകൽപ്പന. ടച്ച് സ്ക്രീൻ സിസ്റ്റം, ഡിജിറ്റൽ അനലോഗ് ക്ലോക്ക്, ഡിജിറ്റൽ ഇൻസ്ട്രുമെന്‍റ് ക്ലസ്റ്റർ എന്നിവയാണ് റോൾസ് റോയിസ് കള്ളിനനിൽ അവതരിപ്പിക്കുന്ന പുതുമയേറിയ ഫീച്ചറുകൾ.

റോൾസ് റോയിസ് നിരയിലെ ഏറ്റവും ഗ്രൗണ്ട് ക്ലിയറൻസ് കൂടിയ വാഹനവും കള്ളിനൻ ആയിരിക്കും എന്നാണ് കമ്പനി അവകാശപ്പെടുന്നത്. ഇന്ത്യയിൽ ബെന്‍റ്ലി ബെന്‍റേഗ ആയിരിക്കും പ്രധാന എതിരാളി.