എബിഎസുമായി ഹിമാലയനെത്തുന്നു; ബുക്കിങ് ആരംഭിച്ചു

ക്ലാസിക് സിഗ്നൽസ് 350 ബൈക്കിന് പിന്നാലെ എബിഎസ് ഉൾപ്പെടുത്തി കൊണ്ടുള്ള ഹിമാലയനുമായി റോയൽ എൻഫീൽഡ്. എബിഎസ് സംവിധാനമുള്ള 2018 ഹിമാലയന്‍റെ ബുക്കിങ് ഇതിനകം തന്നെ എൻഫീൽഡ് ഡീലർഷിപ്പുകളിൽ ആരംഭിച്ചു കഴിഞ്ഞു. എബിഎസിന്‍റെ വരവോടെ എൻട്രി ലെവൽ അഡ്വഞ്ചർ ബൈക്ക് ഹിമാലയന്‍റെ വിലയും അൽപം വർധനവുണ്ടായേക്കാം. ഏതാണ്ട് 10,000 രൂപയുടെ വർധനവ് പ്രതീക്ഷിക്കാം.

എന്നാൽ വില സംബന്ധിച്ച വിവരങ്ങളൊന്നും കമ്പനി പുറത്തുവിട്ടിട്ടില്ല. എന്നിരുന്നാലും എബിഎസ് ഹിമാലയന് 1.78 ലക്ഷവും ഹിമാലയൻ സ്ലീറ്റ് എബിഎസിന് 1.80 ലക്ഷവും വില പ്രതീക്ഷിക്കാവുന്നതാണ്. ഓൺ റോഡ് വില രണ്ട് ലക്ഷത്തിന് മുകളിലാകാനുള്ള സാധ്യതയുമുണ്ട്. എബിഎസ് ഉൾപ്പെടുത്തി എന്നല്ലാതെ ഹിമാലയനിൽ പറയത്തക്ക മാറ്റങ്ങളൊന്നും വരുത്തിയിട്ടില്ല. അതെ 411 സിസി സിങ്കിൾ സിലിണ്ടർ ഫ്യുവൽ ഇഞ്ചക്റ്റഡ് എൻജിൻ തന്നെയായിരിക്കും കരുത്തേകുക.

24.8 ബിഎച്ച്പിയും 32എൻഎം ടോർക്കുമാണ് ഈ എൻജിൻ ഉല്പാദിപ്പിക്കുന്നത്. കഴിഞ്ഞ വർഷം നവംബറിലായിരുന്നു BS IV നിലവാരമുള്ള ഈ എൻജിനെ കമ്പനി ഹിമാലയനിൽ അവതരിപ്പിച്ചത്.