റോയൽ എൻഫീൽഡ് പെഗാസസ് ക്ലാസിക് 500 മെയ് 30 ന് ഇന്ത്യയിൽ

രണ്ടാം ലോകമഹായുദ്ധ കാലത്തെ ഓർമ്മപ്പെടുത്തലുകളുമായി പെഗാസസ് ക്ലാസിക് 500 ബൈക്കുകളെ അവതരിപ്പിച്ച് റോയൽ എൻഫീൽഡ്. യുകെയിൽ നടന്നൊരു ചടങ്ങിലാണ് ഈ ലിമിറ്റഡ് എഡിഷന്‍റെ ആദ്യാവതരണം നടന്നത്. പെഗാസസ് ക്ലാസിക് 500 ബൈക്കുകളുടെ ആകെ ആയിരം യൂണിറ്റുകളെ മാത്രമാണ് അവതരിപ്പിച്ചിരിക്കുന്നത്. ഇതിൽ 250 പെഗാസസ് മോഡലുകൾ ഇന്ത്യയിലും 190 എണ്ണം ബ്രിട്ടണിലും ആയിരിക്കും അവതരിക്കുക.



ഇന്ത്യയിൽ പെഗാസസ് ക്ലാസിക് 500 ബൈക്കുകൾ മെയ് 30 ന് അവതരിക്കുമെന്ന് കമ്പനി അറിയിച്ചിരിക്കുകയാണ്. 250 മോഡലുകൾ മാത്രമാണ് ഇന്ത്യയിലേക്ക് എത്തുന്നത്. ഡൽഹി എക്സ്ഷോറൂം 2 ലക്ഷം രൂപയായിരിക്കും പെഗാസസ് ക്ലാസിക് 500 ന്‍റെ വില. ഹിമാലയൻ സ്ലീറ്റിനെ പോലെ ഓൺലൈൻ വഴിയാണ് കമ്പനി ഈ ബൈക്കുകളുടെയും വില്പനയൊരുക്കിയിരിക്കുന്നത്. സർവീസ് ബ്രൗൺ, ഒലീവ് ഡ്രാബ് ഗ്രീന്‍ എന്നീ രണ്ട് നിറങ്ങളിലാണ് പെഗാസസ് ക്ലാസിക് 500 പുറത്തിറങ്ങിയത്. അതേസമയം ഇന്ത്യയിൽ സർവീസ് ബ്രൗൺ നിറം മാത്രമായിരിക്കും ലഭ്യമാവുക.



രണ്ടാം ലോക മഹായുദ്ധക്കാലത്ത് ബ്രിട്ടീഷ് പാരാട്രൂപ്പ് സംഘം ഉപയോഗിച്ചിരുന്ന ഫ്ലയിങ് ഫ്ലീ മോട്ടോർസൈക്കുകളാണിവ. യുദ്ധക്കാലത്ത് വെസ്റ്റ് വുഡിലെ ഭൂഗർഭ നിർമ്മാണ കേന്ദ്രത്തിൽ നിന്നായിരുന്നു ഇവയുടെ നിർമാണം നടത്തിയിരുന്നത്. ഭാരം കുറവായതിനാൽ വിമാനത്തിൽ നിന്നും പാരച്യൂട്ട് വഴി ഈ മോട്ടോർസൈക്കിളുകളിലാണ് ബ്രിട്ടീഷ് സൈനികർ യുദ്ധകളത്തിൽ ചെന്നിറങ്ങിയിരുന്നത്.

പട്ടാള ശൈലിയിലുള്ള ക്യാൻവാസ് പാരിയറുകൾ, എയര്‍ഫിൽട്ടറിനെ വരിഞ്ഞുമുറുക്കിയ തുകൽവാറും, പിച്ചളയിൽ തീർത്ത ബക്കിളും, കറുപ്പ് നിറത്തിലുള്ള സൈലൻസറും റിമ്മും പെഗാസസ് ക്ലാസിക് 500 ന്‍റെ ശ്രദ്ധേയമായ സവിശേഷതകളാണ്. 27.2 ബിഎച്ച്പിയും 41.3 എൻഎം ടോർക്കും നൽകുന്ന 499 സിസി എയർ കൂൾഡ് സിങ്കിൾ സിലിണ്ടർ എൻജിനാണ് പെഗസാസിന് കരുത്തേകുന്നത്.