വിഘ്നേഷിന് സൂര്യയുടെ സ്നേഹ സമ്മാനം; ഇന്നോവ ക്രിസ്റ്റ

ഓരോ പുതിയ സിനിമ പുറത്തിറങ്ങി കഴിയുമ്പോഴും എന്തെങ്കിലും ഒരു സമ്മാനം സംവിധായകർക്ക് നൽകുന്ന പതിവ് സൂര്യയ്ക്കുണ്ട്. സിങ്കം മൂന്നാം ഭാഗം ഇറങ്ങിയപ്പോൾ ഒരു കാർ ആയിരുന്നു സൂര്യ സംവിധായകനായ ഹരിക്ക് നൽകിയത്. ഇപ്പോൾ വിഘ്നേഷ് ശിവനും ആ ഭാഗ്യം ലഭിച്ചിരിക്കുകയാണ്. വിഘ്നേഷ് ശിവൻ സംവിധാനം ചെയ്ത താന സേർന്ത കൂട്ടം എന്ന സിനിമയിലെ നായകനായിരുന്നു സൂര്യ. വിഘ്നേഷിനോടുള്ള ആദരസൂചകമായിട്ടാണ് സൂര്യ കാർ സമ്മാനിച്ചിരിക്കുന്നത്.



ടൊയോട്ട ഇന്നോവ ക്രിസ്റ്റയാണ് സൂര്യ വിഘ്നേഷിന് സമ്മാനിച്ചത്. കൈക്കൂലിക്കും അഴിമതിക്കുമെതിരെ ഒരു കൂട്ടം ജനങ്ങൾ നടത്തുന്ന പോരാട്ടമാണ് ചിത്രത്തിലെ പ്രധാന വിഷയം. കാര്‍ത്തിക്, കീര്‍ത്തി സുരേഷ്, രമ്യ കൃഷ്ണന്‍, ആര്‍.ജെ ബാലാജി, ആനന്ദരാജ്, സുരേഷ് ചന്ദ്ര മേനോന്‍ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങൾ.



ടൊയോട്ടയുടെ ജനപ്രിയ വാഹനമാണ് ഇന്നോവ ക്രിസ്റ്റ. വി.എന്‍.ടി ഇന്‍റര്‍കൂളര്‍ ഉള്ള 2.4 ലിറ്റര്‍ ജി.ഡി ഫോര്‍ സിലിണ്ടര്‍, ഡ്യുവല്‍ വി.വി.ടി.ഐ 2.0 ലിറ്റര്‍ ഫോര്‍ സിലിണ്ടര്‍ എന്നിങ്ങനെ രണ്ട് എന്‍ജിന്‍ ഓപ്ഷനുകളിലാണ് ക്രിസ്റ്റ ലഭ്യമായിരിക്കുന്നത്. മാനുവല്‍, സിക്‌സ് സ്പീഡ് ഓട്ടോമാറ്റിക് ഗിയർബോക്സുകളാണ് ട്രാൻസ്മിഷൻ നിർവഹിക്കുന്നത്. ടൂവീല്‍ ഡ്രൈവ്, ഫോര്‍ വീല്‍ ഡ്രൈവ് എന്നീ വകഭേദങ്ങളിലും ക്രിസ്റ്റ ലഭ്യമാണ്. ഇപ്പോള്‍ ഒരു ഫുള്‍ ഓപ്ഷന്‍ ഡീസല്‍ മോഡല്‍ ലഭ്യമാക്കണമെങ്കിൽ ഏതാണ്ട് 26 ലക്ഷത്തിലധികം ചിലവാക്കേണ്ടി വരും. 25 ലക്ഷത്തിന് മുകളിലാണ് പെട്രോള്‍ മോഡലിന്‍റെ വില.