സുസൂക്കി ബർഗ്മൻ സ്ട്രീറ്റ് ജൂലായ് 19 ന് ഇന്ത്യയിൽ

ബർഗ്മൻ സ്ട്രീറ്റ് ജൂലായ് 19 ന് ഇന്ത്യയിൽ അവതരിക്കുമെന്ന് സുസൂക്കി. ഇതിനകം തന്നെ സുസൂക്കി ഡീലർഷിപ്പുകളിൽ ബുക്കിങും ആരംഭിച്ചു കഴിഞ്ഞു. 5,000 രൂപ അഡ്വാൻസ് നൽകി ഉപഭോക്താക്കൾക്ക് ബുക്കിങ് നടത്താവുന്നതാണ്. ഇന്ത്യ ഇതുവരെ കണ്ടിട്ടില്ലാത്ത മാക്സി സ്കൂട്ടർ ഡിസൈനിലാണ് ബർഗ്മൻ സ്ട്രീറ്റ് എത്തുന്നത്. വില സംബന്ധിച്ച് കമ്പനി ഇതുവരെയൊന്നും വ്യക്തമാക്കിയിട്ടില്ല. അവതരണ വേളയിലായിരിക്കും പ്രഖ്യാപിക്കുക.

ഇന്ത്യയിലെ ആദ്യത്തെ മാക്സി സ്കൂട്ടർ എന്ന വിശേഷണത്തോടെയാണ് 125 സിസി നിരയിലേക്ക് ബർഗ്മൻ സ്ട്രീറ്റ് കടന്നു വരുന്നത്. പതിവ് സ്കൂട്ടർ ഡിസൈനിൽ നിന്നും വേറിട്ട ശൈലിയിലാണ് ബർഗ്മൻ സ്ട്രീറ്റിന്‍റെ രൂപകല്പന. വിൻഡ് സ്ക്രീൻ, മുൻഭാഗത്തെ തടിച്ച ഏപ്രൺ, എൽഇഡി ഹെഡ് ലാമ്പുകൾ, വീതികുറഞ്ഞ ടെയിൽ ലാമ്പ്, പൂർണ ഡിജിറ്റൽ ഇൻസട്രമെന്‍റ് കൺസോൾ, എക്സോസ്റ്റ് മഫ്ളർ, ട്യൂബ് ലെസ് ടയർ എന്നിവയാണ് പ്രധാന സവിശേഷതകൾ.

124.3 സിസി സിങ്കിൾ സിലിണ്ടർ എയർകൂൾഡ് എൻജിനാണ് ബർഗ്മൻ സ്ട്രീറ്റിന് കരുത്തേകുന്നത്. സസ്പെൻഷൻ നിർവഹിക്കാൻ മുന്നിൽ ടെലിസ്കോപിക് ഫോർക്കുകളും പിന്നിൽ സിങ്കിൾ ഷോക്ക് അബ്സോർബറുകളും ഇടംതേടിയിട്ടുണ്ട്. ഡിസ്ക് ബ്രേക്കുകളാണ് ബർഗ്മൻ സ്ട്രീറ്റിലുള്ളത്. ഇന്ത്യയിൽ ബർഗ്മൻ സ്ട്രീറ്റിന് 60,000 മുതൽ 70,000 രൂപ വരെ വില പ്രതീക്ഷിക്കാം.