പുതിയ സ്വിഫ്റ്റ് ലിമിറ്റഡ് എഡിഷൻ ഇന്ത്യയിൽ; വില 4.99 ലക്ഷം രൂപ

ദീപാവലി, നവരാത്രി ഉത്സവത്തോടു അനുബന്ധിച്ച് സ്വിഫ്റ്റിന്‍റെ പുതിയ ലിമിറ്റഡ് എഡിഷനെ ഇന്ത്യയിൽ അവതരിപ്പിച്ച് മാരുതി. ഡൽഹി എക്സ്ഷോറൂം 4.99 ലക്ഷം രൂപയ്ക്കാണ് സ്വിഫ്റ്റ് ഈ പ്രത്യേക പതിപ്പിനെ അവതരിപ്പിച്ചിരിക്കുന്നത്. കൂടുതൽ സൗകര്യങ്ങളും ഫീച്ചറുകളും ഉൾപ്പെടുത്തി കൊണ്ടാണ് പുതിയ സ്വിഫ്റ്റ് ലിമിറ്റഡ് എഡിഷന്‍റെ അവതരണം. ഇന്ത്യയിൽ ഹ്യുണ്ടായ് ഗ്രാൻഡ് ഐ 10, ഫോർഡ് ഫിഗോ എന്നിവയുമായി കൊമ്പുകോർക്കാനാണ് പുതിയ ലിമിറ്റഡ് എഡിഷൻ എത്തിയിരിക്കുന്നത്.

ബ്ലാക്ക് നിറത്തിലുള്ള വീൽ കവറുകൾ, സിങ്കിൾ DIN ഓഡിയോ സിസ്റ്റം, റിവേഴ്സ് പാർക്കിങ് സെൻസർ, പവർ വിൻഡോ, സെൻട്രൽ ലോക്കിങ്, എബിഎസ്, ഡ്യുവൽ എയർബാഗ് എന്നിവയാണ് സ്വിഫ്റ്റ് ലിമിറ്റഡ് എഡിഷന്‍റെ പ്രധാന സവിശേഷതകൾ. മെക്കാനിക്കൽ സംബന്ധിച്ച മാറ്റങ്ങളൊന്നുമില്ല. അതെ 1.2 ലിറ്റർ പെട്രോൾ, 1.3 ലിറ്റർ ഡീസൽ എൻജിൻ തന്നെയാണ് കരുത്തേകുന്നത്.

83 ബിഎച്ച്പി കരുത്തും 115 എൻഎം ടോർക്കുമാണ് പെട്രോൾ എൻജിൻ ഉല്പാദിപ്പിക്കുന്നത്. അതേസമയം ഡീസൽ എൻജിൻ 74 ബിഎച്ച്പിയും 190 എൻഎം ടോർക്കുമാണ് സൃഷ്ടിക്കുന്നത്. ഇരു എൻജിനുകളിലും 5 സ്പീഡ് മാനുവൽ, എഎംടി ട്രാൻസ്മിഷനുകളാണ് ലഭ്യമാക്കിയിരിക്കുന്നത്.