Tata Motors Ziptron: ഇലക്ട്രിക്ക് ആവാനൊരുങ്ങി ടാറ്റ മോട്ടോ​‍ഴ്സ്!

പ്രമുഖ വാഹന നിർമ്മാതാക്കൾ ഒക്കെയും ഇലക്ട്രിക്ക് മൊബിലിറ്റിയുടേ ലോകത്തേക്കു കടക്കുമ്പോൾ മടിച്ചു നില്ക്കാൻ തങ്ങൾ ഒരുക്കമല്ലെന്ന് ഉറക്കെ പ്രഖ്യാപിക്കുകയാണ്‌ നമ്മുടെ സ്വന്തം ടാറ്റ മോട്ടോഴ്സ്. കഴിവുറ്റ ഇലക്ട്രിക്ക് വാഹനങ്ങളെ വികസിപ്പിക്കുന്നതിന്‌ ഉതകുന്ന ‘സിപ്ട്രോൺ’ എന്ന ഇലക്ട്രിക്ക് വാഹന സാങ്കേതികവിദ്യയെ കുറിച്ചുള്ള ആദ്യ വിവരങ്ങൾ പുറത്തുവിട്ടിരിക്കുകയാണ്‌ ഇവരിപ്പോൾ. അതിനൂതനവും സാങ്കേതികമായി ഏറെ മുന്നിട്ടു നില്ക്കുന്നതും ആണ്‌ സിപ്‌ട്രോൺ. സമീപഭാവിയിൽ തന്നെ ടാറ്റയിൽ നിന്നും പുറത്തിറങ്ങാൻ ഒരുങ്ങുന്ന ഇലക്ട്രിക്ക് വാഹനങ്ങൾക്ക് ഒക്കെയും ഉണ്ടാവുക ഇതേ വൈദ്യുത പവർട്രെയിൻ തന്നെയാവും.

ഇലക്ട്രിക്ക് വാഹന സാങ്കേതികവിദ്യയെ ജനകീയമാക്കുക എന്ന ലക്ഷ്യം കൂടി സിപ്‌ട്രോണു പിന്നിലുണ്ട്.
നിലവിലെ സാഹചര്യത്തിൽ ഇവ വിലയിൽ അല്പം മുന്നിൽ തന്നെയാണ്‌. സമാന സ്വഭാവങ്ങളുള്ള പെട്രോൾ വാഹനങ്ങളേക്കാൾ കൂടുതൽ വിലകൊടുത്തു വേണം ഇന്നും ഇലക്ട്രിക്ക് വാഹനങ്ങൾ സ്വന്തമാക്കുവാൻ. അതിനാൽ, സാധാരണക്കാരന്‌ ഇന്നും ഇവ അപ്രാപ്യങ്ങളാണ്‌. ഈ വ്യവസ്ഥിതിയിൽ സമൂലമായ മാറ്റം കൊണ്ടുവരികയാണ്‌ ടാറ്റയുടെ ലക്ഷ്യം. ഇവിടെ പിശുക്കില്ലാതെ വിറ്റഴിയപ്പെടുന്നത് ചെറു കാറുകളാണ്‌. അങ്ങനെ നമ്മുടെ സമ്പദ്‌വ്യവസ്ഥയിൽ സുപ്രധാന പങ്കു വഹിക്കുന്ന ബജറ്റ് വാഹനങ്ങളിലും ഇലക്ട്രിക്ക് സാങ്കേതികവിദ്യകൾ കൊണ്ടുവരുവാനാണ്‌ ടാറ്റ പദ്ധതിയിടുന്നത്.
സിപ്‌ട്രോൺ സാങ്കേതികവിദ്യയിൽ പിറക്കുന്ന ആദ്യ വാഹനം 2020 മാർച്ചോടെ വിപണിയിൽ എത്തും എന്നാണ്‌ കരുതുന്നത്. ടാറ്റയുടെ ജനപ്രിയ മോഡലായ നെക്സോണിന്‌ ഇലക്ട്രിക്ക് സഹോദരൻ പിറന്നേക്കും എന്ന് ഈയിടെ അഭ്യൂഹങ്ങൾ ഉയർന്നിരുന്നു. അതുപോലെ തന്നെ, ഇവരുടെ അടുത്ത പ്രധാന ലോഞ്ചായ അൾട്രോസിനും ഇലക്ട്രിക്ക് പതിപ്പു പ്രതീക്ഷിക്കുന്നുണ്ട്. ഇരുവാഹനങ്ങളിലും ഉണ്ടാവുക സിപ്‌ട്രോൺ സാങ്കേതികവിദ്യ തന്നെയാവുമെങ്കിലും ഇവയിൽ ഏതാവും ആദ്യമെത്തുക എന്നതിൽ ഇനിയും വ്യക്തതയില്ല.

കാര്യക്ഷമതയേറിയ ഹൈ വോൾട്ടേജ് സിസ്റ്റമാവും സിപ്‌ട്രോണിൽ ഉണ്ടാവുക. തന്റെ വിഭാഗത്തിലെ തന്നെ ഏറ്റ്വും മികച്ച പെർഫോമൻസ്, റേഞ്ച് തുടങ്ങിയവയുമായി ആവും ഓരോ സിപ്‌ട്രോൺ വാഹനവും എത്തുക. ഇലക്ട്രിക്ക് വാഹനങ്ങളിൽ ഏറെ ആവശ്യമായ ഫാസ്റ്റ് ചാർജിംഗ് സംവിധാനവും ഈ ആധുനിക പവർട്രെയിനുകളിൽ ഉണ്ടാവും.

ടാറ്റ ഇൻ ഹൗസ് ആയി വികസിപ്പിച്ച ഇലക്ട്രിക്ക് മൊബിലിറ്റി സാങ്കേതികവിദ്യയാണ്‌ സിപ്‌ട്രോൺ. ഇവരുടെ ഉടമസ്ഥതയിലുള്ള ജാഗ്വർ ലാൻഡ് റോവർ ഇലക്ട്രിക്ക് വാഹനങ്ങൾക്കിടയിൽ വിപ്ലവം സൃഷ്ടിച്ച അനേകം സാങ്കേതികവിദ്യകൾ വികസിപ്പിച്ചിട്ടുണ്ട്. ആഗോള തലത്തിൽ ഏറെ പേരുകേട്ടതാണ്‌ ഇവരുടെ ആദ്യ ഇലക്ട്രിക്ക് കാർ കൂടിയായ ഐ-പേസ്. ഇലക്ട്രിക്ക് വാഹന നിർമ്മാണത്തിൽ ജാഗ്വറിനുള്ള അനുഭവസമ്പത്ത് സിപ്‌ട്രോൺ രൂപകല്പന ചെയ്യുവാൻ ടാറ്റയെയും സഹായിച്ചിരിക്കണം. ആഗോള തലത്തിലെ തങ്ങളുടെ എഞ്ചിനീയറിംഗ് ശൃംഖല ഫലപ്രദമായി ഉപയോഗപ്പെടുത്തി വികസിപ്പിച്ച സിപ്‌ട്രോൺ ഒരു മില്യണിലേറെ കിലോമീറ്ററുകൾ പരീക്ഷണാടിസ്ഥാനത്തിൽ ഓടിച്ചു വിലയിരുത്തിയ ശേഷമാണ്‌ ടാറ്റ പുറത്തിറക്കിയത്.


ഇന്ത്യയ്ക്കിണങ്ങുന്ന അനേകം പ്രത്യേകതകൾ ഉണ്ടാകും സിപ്‌ട്രോണിൽ പിറക്കുന്ന ടാറ്റ മോഡലുകൾക്ക്. ഇ-വികളിലെ പ്രധാന തലവേദനയായി ഭൂരിഭാഗം പേരും കരുതുന്നത് അവയുടെ ബാറ്ററികളെയാണ്‌.
ഇവ മാറേണ്ടി വരുന്നപക്ഷം ഭീമമായ ചിലവുകൾ നേരിടേണ്ടിവരും എന്നതാണ്‌ ഇതിനു കാരണം. എന്നാൽ ഇവിടെയും ടാറ്റയുടെ ഇലക്ട്രിക്ക് വാഹനങ്ങൾ ആശ്വാസമേകും. ബാറ്ററിക്കുമേൽ 8 വർഷത്തോളം വാറന്റിയുമായാണ്‌ ഓരോ ഇലക്ട്രിക്ക് ടാറ്റയും എത്തുക. തന്നെയുമല്ല, ഇവയുടെ ബാറ്ററികൾ ഐപി67 മാനദണ്ഡങ്ങൾ പാലിക്കുന്നുമുണ്ട്. ഒരു മീറ്റർ ആഴമുള്ള വെള്ളക്കെട്ടുകളിൽ പോലും അര മണിക്കൂറോളം കേടുപാടുകൾ കൂടാതെ പ്രവർത്തിക്കുവാനാകുന്നവയാണ്‌ ഐപി67 ഇലക്ട്രോണിക്സുകൾ. ചുറ്റുമുള്ള പൊടിശല്യവും ഇവയെ ബാധിക്കില്ല. അങ്ങനെ നോക്കുമ്പോൾ ഇന്ത്യൻ കാലാവസ്ഥയ്ക്ക് ഏറ്റവും അനുയോജ്യമാണ്‌ ടാറ്റ ഇവികൾ എന്നത് വ്യക്തമാണ്‌.

ഏറെ കാര്യക്ഷമമായ പെർമനെന്റ് മാഗ്നെറ്റ് എസി മോട്ടോർ ഉപയോഗിച്ചാണ്‌
സിപ്ട്രോൺ വാഹനങ്ങൾ പ്രവർത്തിക്കുക. ഇവയിൽ ഇലക്ട്രിക്ക് വാഹനങ്ങളിലെ സ്ഥിരം സാന്നിധ്യമായ റീജനറേറ്റീവ് ബ്രേക്കിംഗ് സംവിധാനവും ഉണ്ടാകും.

ALSO READ: Rs 1.50 ലക്ഷം രൂപ വരെ ആനുകൂല്യങ്ങളുമായി ടാറ്റ മോട്ടോർസ്