Tata Ultra Truck: ടാറ്റയുടെ അൾട്ര നിരയിലേക്ക് രണ്ട്‌ പുത്തൻ താരങ്ങൾ കൂടി!

കമേഴ്ഷ്യൽ ട്രക്കുകളുടെ ലോകത്തെ അതികായരായ ടാറ്റയുടെ അത്യാധുനിക മോഡലുകളാണ്‌ അൾട്ര ശ്രേണിയിൽ ഉള്ളത്. ഇക്കൂട്ടർക്കിടയിലേക്ക് രണ്ട് പുത്തൻ താരങ്ങളെ കൂടി എത്തിച്ചിരിക്കുകയാണ്‌ ടാറ്റ ഇപ്പോൾ. ദക്ഷിണാഫ്രിക്കയിലെ ജോഹന്നാസ്ബെർഗിൽ നടന്ന ഫ്യൂച്ചറോഡ് എക്സ്‌പോയിലാണ്‌ അൾട്രാ പ്ലസ് 1418, അൾട്രാ 814 എഎംടി എന്നീ വാഹനങ്ങളെ കമ്പനി പുറത്തിറക്കിയത്. നിലവിലെ അൾട്ര നിരയുടെ പരിഷ്കരിച്ച പതിപ്പെന്നാണ്‌ 814 എഎംടിയെ വിളിക്കേണ്ടതെങ്കിൽ അൾട്ര പ്ളസ് 1418 തീർത്തും പുതിയ ഒരു വാഹനം തന്നെയാണ്‌.

എച്ച്‌സിവി അഥവാ ഹെവി കമേഴ്ഷ്യൽ വെഹിക്കിൾ വിഭാഗത്തിൽ പെടുന്നതാണ്‌ അൾട്ര പ്ലസ് 1418. 7 മുതൽ 8 ടൺ വരെ പേലോഡ് വഹിക്കുവാൻ അൾട്ര പ്ലസ് 1418നു സാധിക്കും. അതുകൊണ്ടു തന്നെ ഷോർട്ട്- ഹൗളിങ്ങിനും മീഡിയം ഹൌളിങ്ങിനും ഇവൻ ഒരുപോലെ ഉപയോഗപ്രദമാണ്‌. 4900, 5300 മില്ലിമീറ്റർ എന്നിങ്ങനെ രണ്ട് വ്യത്യസ്ത വീൽബേസുകളിൽ വാഹനം ലഭ്യമാവും. പൊതുവെ പ്രവർത്തന ചിയവ് കുറഞ്ഞ അൾട്ര പ്ലസ്സിന്‌ ജീവനേകുന്നത് ടാറ്റയുടെ 5.0 ലീറ്റർ കോമൺ റെയിൽ ഡീസൽ എൻജിനാണ്‌. 140 എച്ച് പി 180 എച്ച് പി വേരിയന്റുകളുണ്ടാകും. വളരെ മികച്ച 6 സ്പീഡ് ഓവർ ഡ്രൈവ് ട്രാൻസ്മിഷൻ കൂടി എത്തുന്നതോടെ പെർഫോമൻസിൽ 'അൾട്ര' പുലി ആകുന്നു.

അത്യാധുനിക രൂപകല്പനയുള്ള മോഡൂലാർ പ്ലാറ്റ്ഫോമാണ്‌ അൾട്രാ ട്രക്ക് ശ്രേണിക്കുള്ളത്. ഏതൊരു എതിരാളിയേക്കാളും വലിയ ട്രാക്കാണ്‌ അൾട്രയ്ക്കുളത്. അതുകൊണ്ടു തന്നെ വലുപ്പമേറിയ ബോഡികൾ പണിയുവാൻ ഇതിലും നല്ല പ്ലാറ്റ്ഫോം വേറെയില്ല. 4-8 ടൺ പേലോഡ് ശേഷിയിൽ, 5 വ്യത്യസ്ത ഡെക്ക് നീളങ്ങളും വീൽബേസുകളുമായി അൾട്ര ട്രക്കുകൾ പുറത്തിറങ്ങുന്നുണ്ട്. ഒപ്പം, ഇവ ഉപയോഗിക്കപ്പെടുന്ന ആവശ്യങ്ങളും വ്യത്യസ്തങ്ങളാണ്‌. ദക്ഷിണാഫ്രിക്കൻ സാഹചര്യങ്ങൾക്കായി പ്രത്യേകം രൂപപ്പെടുത്തിയതാണ്‌ ഇവയെ എന്നാണ്‌ ടാറ്റ അവകാശപ്പെടുന്നത്. ഇഴകീറിയുള്ള അനേകം പരീക്ഷണങ്ങൾക്കും പരിശോധനകൾക്കും ശേഷമാവും പുത്തൻ അൾട്ര ആഫ്രിക്കൻ വിപണിയിൽ എത്തുക.

വാഹനത്തെ കൂടുതൽ അപ്‌മാർക്കറ്റും പ്രീമിയം സ്വഭാവം ഉള്ളതും ആക്കുന്ന ഒരുപറ്റം കാര്യങ്ങൾ അൾട്രയ്ക്കുണ്ട്. ഉള്ളിലെ അധിക സ്ഥലസൗകര്യവും, പ്രസന്നമായ എൻവിഎച്ച് ലെവലുകളും, അത്യന്തം സൗകര്യപ്രദവും സുഖപ്രദവുമായ സീറ്റിങ്ങും ഒക്കെ ഇതില്പ്പെടും. ഒരു കമേഴ്ഷ്യൽ വാഹനം എന്നു തോന്നിക്കാത്തവിധം സ്റ്റൈലിഷാണ്‌ ക്യാബിൻ. ഫുൾ എയർ ബ്രേക്കും യൂറോപ്യൻ സുരക്ഷാ മാനദണ്ഡങ്ങൾക്കൊപ്പിച്ചുള്ള നിർമ്മാണവുമെല്ലാം അൾട്ര ശ്രേണിയെ അത്യന്തം സുരക്ഷിതവും ദൃഢവുമാക്കുന്നു.

ഫ്യൂച്ചറോഡ് വാഹനമേളയിൽ ആകെ 3 അൾട്ര ട്രക്കുകളും (അൾട്ര 814 (എഎംടി), അൾട്ര 1014 (5.5 ടൺ), അൾട്ര 1418 (7.5 ടൺ) ) 3 പ്രൈമ മോഡലുകളും (പ്രൈമ 2528.കെ 6 *4 ടിപ്പർ, പ്രൈമ 3338.കെ 8*4 ടിപ്പർ, പ്രൈമ 4938.എസ്‌) ആണ്‌ പ്രദർശിപ്പിച്ചിരുന്നത്. ഏറെ സാധ്യതകൾ ഉള്ള ആഫ്രിക്കൻ വിപണിയെ ടാറ്റ എത്ര ഗൗരവത്തോടെയാണ്‌ കാണുന്നതെന്ന് വെളിവാക്കുന്നതായിരുന്നു ഫ്യൂച്ചറോഡിലെ ഇവരുടെ പവിലിയൺ.

ALSO READ: ടാറ്റ ഇലക്ട്രിക്കായാലോ? കൂടുതൽ അറിയാം...