നെക്സോണിന് ഐപിഎൽ എഡിഷനുമായി ടാറ്റ

ഐപിഎൽ കുപ്പായമണിഞ്ഞ് ടാറ്റ നെക്സോൺ എത്തുന്നു. സണ്‍റൈസേഴ്‌സ് ഹൈദരാബദിന്‍റെ ജേഴ്‌സിയണിഞ്ഞ നെക്‌സോണിനെയാണ് ടാറ്റ മറയ്ക്ക് പുറത്ത് എത്തിച്ചിരിക്കുന്നത്. ബോഡിയിലുടനീളം സണ്‍റൈസേഴ്‌സിനെ പതിപ്പിച്ചാണ് ഐപിഎൽ എഡിഷൻ നെക്സോണിന്‍റെ വരവ്. റൂഫിന് നൽകിയിരിക്കുന്ന മാറ്റ് ഫിനിഷ് മെറ്റാലിക് റെഡ് നിറമാണ് സണ്‍റൈസേഴ്‌സ് നെക്സോണിന്‍റെ മുഖ്യാകർഷണം. ഇരു വശങ്ങളിലെ ബമ്പറുകളിലും പിറകിലെ ഹ്യുമാനിറ്റി ലൈനിലും ഇതേ നിറം നൽകിയിരിക്കുന്നതായി കാണാം.



വശങ്ങളില്‍ നൽകിയിരിക്കുന്ന സണ്‍റൈസേഴ്‌സിന്‍റെ ചിറകാണ് നെക്സോണിന്‍റെ മറ്റൊരു ഹൈലേറ്റ്. നെക്സോണിന്‍റെ ടോപ്പ് എൻഡ് വേരിയന്‍റായ XZ പ്ലസ് വകഭേദത്തിലാണ് ഐപിഎൽ എഡിഷൻ ഒരുക്കിയിരിക്കുന്നത്. മുംബൈ ഇന്ത്യന്‍സ്, ചെന്നൈ സൂപ്പര്‍ കിംഗ്‌സ് നെക്‌സോൺ ഒരുങ്ങിയതും ഇതേ വകഭേദത്തിലാണ്. ഫ്രണ്ട് ഗ്രില്ലിൽ നൽകിയിരിക്കുന്ന തിളങ്ങുന്ന ലോഗോയാണ് സണ്‍റൈസേഴ്‌സ് നെക്‌സോണിന്‍റെ എടുത്തു പറയേണ്ടുന്ന മറ്റൊരു പ്രധാന സവിശേഷത.



ഗ്രില്ലിനും ഫോഗ്‌ലാമ്പുകള്‍ക്കും ലഭിച്ച ക്രോം അലങ്കാരങ്ങളും സണ്‍റൈസേഴ്‌സ് നെക്‌സോണിന്‍റെ മറ്റൊരു പ്രത്യേകതയാണ്. ചില്ലറ എക്സ്റ്റീരിയർ പരിഷ്കാരങ്ങൾ ഒഴിച്ചാൽ അകത്തളത്തിലും എൻജിനിലും മാറ്റങ്ങളൊന്നും ഉൾക്കൊള്ളിച്ചിട്ടില്ല. അതെ 1.2 ലിറ്റര്‍ ടര്‍ബ്ബോചാര്‍ജ്ഡ് പെട്രോള്‍, 1.5 ലിറ്റര്‍ ടര്‍ബ്ബോചാര്‍ജ്ഡ് ഡീസല്‍ എൻജിനുകൾ തന്നെയാണ് സണ്‍റൈസേഴ്‌സ് നെക്‌സോണിന്‍റെയും കരുത്ത്.



108 ബിഎച്ച്പിയും 170 എൻഎം ടോർക്കുമാണ് പെട്രോൾ എൻജിൻ ഉല്പാദിപ്പിക്കുന്നത്. അതേസമയം 108 ബിഎച്ച്പിയും 260 എൻഎം ടോർക്കുമാണ് ഡീസൽ എൻജിൻ ഉല്പാദിപ്പിക്കുന്നത്. 6 സ്പീഡ് മാനുവൽ ഗിയർബോക്സാണ് നെക്സോണിൽ ഇടംതേടിയിരിക്കുന്നത്. നെക്സോണിന്‍റെ എഎംടി വകഭേദത്തെ കൂടി അവതരിപ്പിക്കാൻ ഒരുങ്ങുകയാണ് ടാറ്റ.