പുതിയ ടിയാഗോ NRG സെപ്തംബർ 12ന് വിപണിയിൽ

മാറ്റം അനിവാര്യമാണെന്ന് തോന്നിയിട്ടാകണം ടിയാഗോയുടെ പുത്തൻ പതിപ്പുമായി ടാറ്റ എത്തുന്നു. വിപണിയിൽ അവതരിച്ച് വർഷം രണ്ട് തികഞ്ഞിട്ടും ടിയാഗോയെ പുതുക്കി പണയാൻ ടാറ്റ മുൻകൈ എടുത്തിരുന്നില്ല. ടിയാഗോയ്ക്ക് നിലവിൽ പറയത്തക്ക എതിരാളികൾ ഇല്ലാത്തതിനാൽ വിപണിയിലെ പ്രചാരം കുറഞ്ഞതുമില്ല. ടിയാഗോയ്ക്ക് പുതുമ കൈവരുത്തുന്ന തരത്തിലായിരിക്കും NRG മോഡൽ അവതരിക്കുക.

ഇതിനുപുറമെ ടിയാഗോ JTP എന്നൊരു മോഡലിനെ കൂടി വിപണിയിൽ അവതരിപ്പിക്കാനുള്ള ഒരുക്കത്തിലാണ് ടാറ്റ. ക്രോസ് ഓവർ പരിവേഷത്തിലാണ് ടിയാഗോ NRG വിപണിയിൽ എത്തുക. സെപ്തംബർ 12 ഓടെ NRG എഡിഷൻ വിപണിയിൽ എത്തുമെന്നാണ് ടാറ്റ അറിയിച്ചിരിക്കുന്നത്. 4.2 ലക്ഷം പ്രാരംഭ വിലയിലായിരിക്കും ടിയാഗോ NRG വിപണിയിലെത്തുക. ഇന്ത്യയിൽ ഏറ്റവും കുറഞ്ഞ വിലയ്ക്കുള്ള ക്രോസ് ഓവർ ഹാച്ച്ബാക്ക് എന്ന വിശേഷണത്തോടെയായിരിക്കും ടിയാഗോ NRG അവതരിക്കുക.

ബ്ലാക്ക് നിറത്തിലുള്ള ബോഡി ക്ലാഡിങ്, ബ്ലാക്ക് നിറത്തിലുള്ള വീൽ ആർച്ചുകൾ, മിറർ, ഗ്രിൽ, ഡോർ ഹാൻഡിലുകൾ എന്നിവയാണ് പ്രധാന ഡിസൈൻ സവിശേഷതകൾ. സ്മോക്കി ഹെഡ് ലാമ്പുകൾ, 4 സ്പോക്ക് അലോയ് വീലുകൾ എന്നിവയാണ് മറ്റു സവിശേഷതകൾ. 5.0 ഇഞ്ച് ടച്ച്സ്ക്രീൻ സിസ്റ്റം, കോൺട്രാസ്റ്റ് നിറത്തിലുള്ള ഏസി വെന്‍റുകൾ, സെന്‍റർ കൺസോൾ, ഗിയർ ലെവർ, റിവേഴ്സ് പാർക്കിങ് ക്യാമറ എന്നിവയാണ് അകത്തളത്തിലെ പ്രധാന മാറ്റങ്ങൾ.

നിലവിലെ 1.2 ലിറ്റർ പെട്രോൾ, 1.05 ലിറ്റർ ഡീസൽ എൻജിനുകൾ തന്നെയായിരിക്കും ടിയാഗോ NRG ക്കും കരുത്തേകുക. 5 സ്പീഡ് ഗിയർബോക്സാണ് രണ്ട് എൻജിനുകളിലുമുള്ളത്.