എമിഷൻ തകരാർ; ഡീസൽ ടിഗോറിനെ തിരിച്ചുവിളിച്ച് ടാറ്റ

ഏറ്റവും കുറഞ്ഞ വിലയ്ക്ക് ടാറ്റ നിരത്തിലെത്തിച്ച ഡീസൽ കാറാണ് ടിഗോർ. എമിഷൻ സംവിധാനത്തിൽ കണ്ടെത്തിയ തകരാറിനെ തുടർന്ന് ടാറ്റ ഈ വാഹനം തിരിച്ചുവിളിച്ചിരിക്കുകയാണ്. കഴിഞ്ഞ വർഷം മാർച്ച് തൊട്ട് ഡിസംബർ വരെയുള്ള കാലയളവിൽ നിരത്തിലെത്തിച്ച ടിഗോറിലാണ് തകരാർ കണ്ടെത്തിയിരിക്കുന്നത്. MAT629401GKP52721 മുതല്‍ MAT629401HKN89616 ഷാസി നമ്പറുള്ള മോഡലുകളിലാണ് തകരാർ ഉള്ളതായി ടാറ്റ ചൂണ്ടികാണിക്കുന്നത്.

നിങ്ങളുടെ വാഹനം ഈ കാലയളവിൽ നിർമിച്ചതാണെങ്കിൽ അടുത്തുള്ള ഡീലർഷിപ്പുകളിൽ എത്തിച്ച് പരിശോധിപ്പിക്കാവുന്നതാണ്. ഏതാണ്ട് 7000 മുതൽ 9000 ത്തോളം യൂണിറ്റുകളിൽ തകരാർ കണ്ടെത്തിയിട്ടുണ്ടെന്നാണ് ടാറ്റ നൽകുന്ന സൂചന. തകരാർ കണ്ടെത്തുന്ന പക്ഷം വാഹനത്തിന് സൗജന്യ സർവീസ് നൽകുമെന്നും ടാറ്റ അറിയിച്ചിട്ടുണ്ട്.