ടിഗോറിന്‍റെ ഇലക്ട്രിക് പതിപ്പുമായി ടാറ്റ

കോമ്പാക്ട് സെഡാൻ ടിഗോറിന്‍റെ ഇലക്ട്രിക് പതിപ്പുമായി വിപണിയിലെത്താനുള്ള ഒരുക്കത്തിലാണ് ടാറ്റ. മഹീന്ദ്ര ഇ വെരിറ്റോയ്ക്ക് ഒരു കടുത്ത എതിരാളിയായിരിക്കും ഇലക്ട്രിക് സെഡാൻ ശ്രേണിയിൽ അവതരിക്കുന്ന പുതിയ ടിഗോർ.

ഓട്ടോമോട്ടീവ് റിസർച്ച് അസോസിയേഷൻ ഓഫ് ഇന്ത്യയുടെ രേഖകളിൽ നിന്നുമാണ് ഇലക്ട്രിക് ടിഗോറിന്‍റെ വിവരങ്ങൾ പുറത്ത് വന്നിരിക്കുന്നത്. രേഖകളിലുള്ള വിവരങ്ങൾ പ്രകാരം 40ബിഎച്ച്പി ഉല്പാദിപ്പിക്കുന്ന ഇലക്ട്രിക് മോട്ടോറാണ് പുതിയ ടിഗോറിന് കരുത്തേകുക. ഭാരം കുറഞ്ഞ പ്ലാറ്റ്ഫോമിലായിരിക്കും ടിഗോറിന്‍റെ നിർമാണം നടത്തുക. അതുകൊണ്ട് തന്നെ കൂടുതൽ മൈലേജും പ്രതീക്ഷിക്കാവുന്നതാണ്.

ഒറ്റ ചാർജിൽ 120 കിലോമീറ്റർ മുതൽ 150 കിലോമീറ്റർ വരെ സഞ്ചരിക്കാനുള്ള ശേഷിയുണ്ടെന്നാണ് കമ്പനി അവകാശപ്പെടുന്നത്. ആദ്യഘട്ടത്തിൽ 350 ഓളം യൂണിറ്റുകളെ പുറത്തിറക്കാനാണ് കമ്പനിയുടെ തീരുമാനം. ടിഗോറിന് പുറമെ ഹാച്ച്ബാക്ക് ശ്രേണിയിൽ ടിയാഗോയുടെ ഇലക്ട്രിക് പതിപ്പിനെയും വിപണിയിലെത്തിക്കാനുള്ള ഒരുക്കത്തിലാണ് ടാറ്റ. ഇതുകൂടാതെ ഇലക്ട്രിക് നാനോയും അണിയറയിൽ ഒരുങ്ങി കൊണ്ടിരിക്കുകയാണ്.

അടുത്തിടെ കോയമ്പത്തൂരിൽ വച്ച് ഇലക്ട്രിക് നാനോയുടെ പരീക്ഷണയോട്ടം നടത്തുന്നതായിട്ടുള്ള റിപ്പോർട്ടുകൾ പുറത്ത് വന്നിരുന്നു. ഇലക്ട്രിക് നാനോയ്ക്ക് പിന്നാലെയാകും ടിഗോർ, ടിയാഗോ ഇലക്ട്രിക് പതിപ്പുകൾ വിപണിയിൽ സാന്നിധ്യമറിയിക്കുക.