ഉറപ്പായി, ബെംഗളൂരു വഴി ടെസ്‌ല ഈ വർഷം ഇന്ത്യയിലേക്ക്

'ടെസ്‌ല ഇന്ത്യയിലേക്ക്', ഒരു പക്ഷെ കഴിഞ്ഞ 4-5 വർഷത്തിനിടയ്ക്ക് ഈ തലക്കെട്ട് ഉപയോഗിക്കാത്ത മാധ്യമസ്ഥാപനങ്ങൾ രാജ്യത്ത് വിരളമായിരിക്കും. പല തവണ ഇലോൺ മാസ്ക് നേതൃത്വം നൽകുന്ന പ്രീമിയം ഇലക്ട്രിക്ക് കാർ കമ്പനി ഇന്ത്യയിലെത്തും എന്ന് റിപ്പോർട്ടുകളുണ്ടായിരുന്നെങ്കിലും പല കാരങ്ങളാൽ നീണ്ടുപോയി. പക്ഷെ ഇത്തവണ അങ്ങനെയല്ല, ഇന്ത്യയിൽ ഇന്നിംഗ്സ് ആരംഭിക്കുന്നതിന്റെ മുന്നൊരുക്കമായി ഉപകമ്പനി ടെസ്‌ല രെജിസ്റ്റർ ചെയ്തു.

അനൗദ്യോഗികമായി പുറത്ത് വന്ന രേഖകൾ അനുസരിച്ച് ടെസ്‌ല ഇന്ത്യ മോട്ടോർസ് ആൻഡ് എനർജി പ്രൈവറ്റ് ലിമിറ്റഡ് എന്ന പേരിൽ ബെംഗളൂരുവിലാണ് ഇന്ത്യൻ ഉപകമ്പനി രെജിസ്റ്റർ ചെയ്തിരിക്കുന്നത്. ഈ മാസം 8 രജിസ്റ്റർ ചെയ്തിരിക്കുന്ന കമ്പനി ജൂണിലാണ് പ്രവർത്തനം ആരംഭിക്കാൻ പദ്ധതിയിടുന്നത്. കോർപ്പറേറ്റ് അഫയേഴ്‌സ് മന്ത്രാലയത്തിന് സമർപ്പിച്ചിരിക്കുന്ന റിപ്പോർട്ട് അനുസരിച്ച് വൈഭവ് തനേജ, വെങ്കട്രാങ്ങാം ശ്രീറാം, ഡേവിഡ് ജോൺ ഫെയ്ൻസ്റ്റെയ്ൻ എന്നിവരാണ് ഇന്ത്യൻ ഉപകമ്പനിയുടെ ഡയറക്ടർമാർ. സ്വകാര്യ അൺലിസ്റ്റഡ് കമ്പനിയായാണ് ടെസ്‌ല ഇന്ത്യ മോട്ടോർസ് ആൻഡ് എനർജി പ്രൈവറ്റ് ലിമിറ്റഡ് രജിസ്റ്റർ ചെയ്തിരിക്കുന്നത്.


ടെസ്‌ലയുമായി മഹാരാഷ്ട്ര, ആന്ധ്ര പ്രദേശ്, തമിഴ്നാട്, കർണാടക സംസ്ഥാനങ്ങൾ ചർച്ച നടത്തിയിരുന്നു. റിസർച്ച് ആൻഡ് ടെവേലോപ്മെന്റ് സെന്റർ കൂടാതെ ബെംഗളുരുവിനടുത്തുള്ള തുംകൂരിൽ പ്ലാന്റ് സ്ഥാപിക്കാനുള്ള അവസരം കർണാടക ഒരുക്കിയതോടെയാണ് ടെസ്‌ല കർണാടക തിരഞ്ഞെടുത്തത് എന്നാണ് റിപോർട്ടുകൾ.

ഇവരാണ് ഇന്ത്യയിലെ പ്രശസ്തരായ ടെസ്‌ല കാർ ഉടമകൾ

ടെസ്‌ലയുടെ ഇന്ത്യ പ്രവർത്തനങ്ങൾ ഈ വർഷം ആരംഭിക്കും എന്ന് കേന്ദ്ര ഉപരിതല ഗതാഗത ദേശീയപാത മന്ത്രി നിതിൻ ഗഡ്കരി ഡിസംബറിൽ തന്നെ വ്യക്തമാക്കിയിരുന്നു. ഇലക്ട്രിക്ക് വാഹനങ്ങൾ ഇറക്കുമതി ചെയ്ത് വില്പനക്കെത്തിച്ചാവും ടെസ്‌ല ആരംഭിക്കുക എന്നും ലാഭകരമെന്ന് കണ്ടാൽ അസംബ്ലി/നിർമാണ ശാല ആരംഭിക്കുന്നതിനെപ്പറ്റി ചിന്തിക്കുമെന്ന് നിതിൻ ഗഡ്കരി ഇന്ത്യൻ എക്‌സ്പ്രസ്സുമായുള്ള അഭിമുഖത്തിലാണ് പറഞ്ഞത്. അഞ്ച് വർഷത്തിനുള്ളിൽ ഇന്ത്യ ലോകത്തെ ഒന്നാം നമ്പർ വാഹന നിർമാണത് കേന്ദ്രമായി മാറുമെന്ന് ഗഡ്കരി കൂട്ടിച്ചേർത്തു.

കഴിഞ്ഞ വർഷം ഒക്ടോബറിൽ തന്നെ ഇന്ത്യൻ വിപണിയുമായി സംബന്ധിച്ച് വ്യക്തമായ സൂചന ഇലോൺ മസ്‌ക് നൽകിയിരുന്നു. ടെസ്‌ല ക്ലബ് ഇന്ത്യ എന്ന ട്വിറ്റർ ഹാൻഡിൽ ഇന്ത്യയിലെ ടെസ്‌ലയുടെ വരവിനെപ്പറ്റി ചോദിച്ചപ്പോൾ “അടുത്ത വർഷം ഉറപ്പാണ്” എന്നാണ് മസ്‌ക് മറുപടി നൽകിയത്.

2020ൽ മലയാള സിനിമ നടൻമാർ വാങ്ങിക്കൂട്ടിയ കാറുകൾ

ഇലക്ട്രിക്ക് സെഡാൻ മോഡൽ 3 തന്നെയാണ് ഇന്ത്യയിൽ എത്തുന്ന ആദ്യ മോഡൽ എന്നാണ് വിവരം. ഏതാനും ആഴ്ചകൾക്കുള്ളിൽ ബുക്കിംഗ് ആരംഭിക്കും. ഡെലിവറി പക്ഷെ രണ്ടാം പകുതിയിൽ മാത്രമേ ആരംഭിക്കൂ എന്ന് ഇക്കണോമിക് ടൈംസ് റിപ്പോർട്ട് പറയുന്നു. പൂർണമായും അമേരിക്കയിൽ നിർമ്മിച്ച് യൂണിറ്റുകൾ ഇറക്കുമതി ചെയ്യ് വിൽക്കുന്നതിനാൽ ഏകദേശം 55 ലക്ഷം രൂപയാണ് മോഡൽ 3-യ്ക്ക് ഇന്ത്യയിൽ പ്രതീക്ഷിക്കുന്നത്. വിവിധ വിപണികളിൽ ടെസ്‌ല ചെയ്യുന്നതുപോലെ തന്നെ കമ്പനി നേരിട്ടാവും വിൽപ്പന കൈകാര്യം ചെയ്യുക.