കൊറോണ അഥവാ കൊവിഡ് 19 ലോകത്താകമാനം സൃഷ്ടിച്ച കാർമേഘം മെല്ലെ നീങ്ങി തുടങ്ങുകയാണ്. വാഹന ലോകത്ത് വൻ പ്രതിസന്ധി സൃഷ്ടിക്കും എന്ന് കരുതിയിരുന്നെങ്കിലും കൊറോണാനന്തരം വാഹന വില്പന കൂടുകയാണ് എന്നാണ് റിപോർട്ടുകൾ. ഓൺലൈൻ വാങ്ങലും, ഡോർ ഡെലിവെറിയെല്ലാം വാഹനലോകത്തും എത്തി. അതെ സമയം ഉപഭോക്താവിന് വീട്ടുമുറ്റത്ത് ബൈക്ക് ഡെലിവർ ചെയ്യുന്നതിൽ വ്യത്യസ്തരാവുകയാണ് ഒരു റോയൽ എൻഫീൽഡ് ഡീലർ. ഒരു കളിപ്പാട്ടം പോലെ വലിയ ബോക്സിൽ ന്യൂ ജനറേഷൻ സ്റ്റൈലിൽ ആണ് ഈ റോയൽ എൻഫീൽഡ് ഡീലർ നിങ്ങൾക്ക് ബൈക്ക് എത്തിച്ചു നൽകുക.
സംഭവം ഇന്ത്യയില്ല, ലാത്വിയയിലാണ്. കുട്ടികൾക്കുള്ള കാർ, ബൈക്ക് കളിപ്പാട്ടങ്ങൾ നമ്മൾ കടകളിൽ വാങ്ങുമ്പോൾ ലഭിക്കുന്ന ബോക്സ് പോലെ സീ-ത്രൂ 1:1 ബോക്സിലാണ് ബൈക്ക് ഡെലിവറി ചെയ്യുക. 18 വയസ്സിന് മുകളിൽ ഉള്ള കുട്ടികൾക്ക് ഉപയോഗിക്കാം, റെഷിയോ തുടങ്ങിയ വിവരങ്ങൾ ബോക്സിൽ അടയപ്പെടുത്തിയിട്ടുണ്ട് (കളിപ്പാട്ടങ്ങളുടെ ബോക്സിന് സമാനമായി). ഈ ബോക്സ് ഒരു ട്രെയിലറിൽ കയറ്റി ഒരു റോഡ് ഷോ പോലെയാണ് ഡെലിവറി. കഴിഞ്ഞില്ല, ട്രെയ്ലർ ടോ ചെയ്യുന്ന കാർ ഏതാണെന്നെന്നോ? ജാഗ്വർ എഫ്-ടൈപ്പ് എസ്യുവി.
രണ്ടും കല്പിച്ച് റോയൽ എൻഫീൽഡ്, 14 ബൈക്കുകൾ പണിപ്പുരയിൽ
റോയൽ എൻഫീൽഡ് ലാത്വിയ സബ്സിഡിയറി പുറത്തുവിട്ട ചിത്രങ്ങൾ അനുസരിച്ച് ഇന്റർസെപ്റ്റർ മോഡൽ ആണ് ബോക്സിനുള്ളിൽ. അതെ സമയം ഇന്റർസെപ്റ്റർ മോഡൽ വാങ്ങുന്നവർക്ക് മാത്രമാണോ ഈ സ്റ്റൈലൻ ഡെലിവറി എന്ന് വ്യക്തമല്ല. 6,850 യൂറോയാണ് ലാത്വിയയിൽ ഇന്റർസെപ്റ്റർ 650യ്ക്ക് വില. ഇത് ഏകദേശം 5.62 ലക്ഷം രൂപ വരും. അതെ സമയം ഇന്ത്യയിൽ ഈ മോഡലിന് 2.64 ലക്ഷം ആണ് എക്സ്-ഷോറൂം വില.
ഇന്റർസെപ്റ്റർ സ്ക്രാംബ്ലറും
ഇതാദ്യമായല്ല റോയൽ എൻഫീൽഡിന്റെ ലാത്വിയ സബ്സിഡിയറി വാർത്തകളിൽ ഇടം പിടിക്കുന്നത്. അടുത്തിടെ, ഇന്റർസെപ്റ്ററിന്റെ സ്ക്രാംബ്ലർ വേർഷനും പുറത്തിറക്കിയിരുന്നു. ലിമിറ്റഡ് എഡിഷൻ ആയി പുറത്തിറക്കിയ ഇന്റർസെപ്റ്റർ സ്ക്രാംബ്ലർ മോഡലിന്റെ 10 യൂണിറ്റ് മാത്രമേ നിർമ്മിക്കൂ. വലതു വശത്ത് മുകളിലേക്ക് കയറി നിൽക്കുന്ന ഇരട്ടക്കുഴൽ എക്സ്ഹോസ്റ്റ്, ഫോർക്ക് ഗെയ്റ്ററുകൾ, വയർ മെഷ് പ്രൊട്ടക്ഷൻ ഉള്ള ഹെഡ്ലൈറ്റ്, നീളം കൂടിയ ലഗ്ഗേജ് റാക്ക്, മിഷെലിൻ അനകീ ഓഫ് റോഡ് ടയറുകൾ എന്നിവയാണ് ഇന്റർസെപ്റ്റർ സ്ക്രാംബ്ലറിലെ സവിശേഷതകൾ. എൻജിൻ ഇസിയു റീട്യൂൺ ചെയ്ത് ഔട്പുട്ട് കൂടുതലാണ്. റീട്യൂൺ ചെയ്ത എൻജിനും പുത്തൻ ഫ്രീ ഫ്ളോ എക്സ്ഹോസ്റ്റും ചേർന്ന് എൻജിന്റെ സ്വഭാവം മാറ്റിയിട്ടുണ്ടോ എന്ന് വ്യക്തമല്ല.