ഇന്ത്യയിലെ ആദ്യത്തെ ഇലക്ട്രിക് ഹൈപ്പർ കാർ 'ശൂൽ' അവതരിച്ചു

ആദ്യത്തെ ഇലക്ട്രിക് ഹൈപ്പർ കാർ 'ശൂൽ' ഇന്ത്യയിൽ അവതരിച്ചു. മുംബൈ ആസ്ഥാനമായി പ്രവർത്തിക്കുന്ന വാസിറാനി ഓട്ടോമോട്ടീവ് ആണ് ഈ ഇലക്ട്രിക് ഹൈപ്പർ കാറിന്‍റെ അവതരണം നടത്തിയത്. കമ്പനിയുടെ മുംബൈയിലുള്ള സ്റ്റുഡിയോവിലായിരുന്നു അവതരണം. ആസ്റ്റൺ മാർട്ടിൻ, മക്ലാരൻ എന്നീ വമ്പന്മാരോട് കിടപിടിക്കുന്നതിന് വേണ്ടിയാണ് ശൂൽ നിരത്തിലെത്തുന്നത്.

അത്യാധുനിക ഫീച്ചറുകളും സൗകര്യങ്ങളും അടങ്ങുന്നതാണ് ശൂൽ ഇലക്ട്രിക് ഹൈപ്പർ കാർ. വേഗതയെക്കാൾ കാർ നിയന്ത്രണത്തിന് മുൻതൂക്കം നൽകി കൊണ്ടാണ് വാസിറാനി ഈ കാറിന്‍റെ നിർമാണം നടത്തിയിരിക്കുന്നത്. കാർബൺ ഫൈബറിനാൽ നിർമിതമായതിനാൽ ഭാരക്കുറവും പ്രതീക്ഷിക്കാം. മെക്കാനിക്കൽ സംബന്ധിച്ച കൂടുതൽ വിവരങ്ങളൊന്നും കമ്പനി പുറത്തുവിട്ടിട്ടില്ല. ജെറ്റ് ടർബൈൻ ഇലക്ട്രിക് മോട്ടോറാണ് ശൂലിന് കരുത്തേകുന്നത്.

ഒറ്റത്തവണത്തെ ചാർജിൽ 150-200 കി.മി സഞ്ചരിക്കാൻ കഴിയുമെന്നാണ് കമ്പനി അവകാശപ്പെടുന്നത്. നിശ്ചലാവസ്ഥയിൽ നിന്നും 100 കിലോമീറ്റർ വേഗം കൈവരിക്കാൻ 2.5 സെക്കൻഡാണ് ആവശ്യമായി വരുന്നത്. 2020 ഓടെ ശൂൽ നിരത്തിലെത്തുമെന്നാണ് റിപ്പോർട്ട്.