ഹീറോയ്ക്കൊപ്പം മനസ്സും നിരത്തും കീഴടക്കാൻ വിരാട് കൊഹ്ലി

ഹീറോ മോട്ടോകോര്‍പ്പിന്‍റെ പുതിയ ബ്രാൻഡ് അംബാസഡര്‍ ക്രിക്കറ്റ് താരം വിരാട് കൊഹ്ലി. മുൻപ് ബോളിവുഡ് താരം രൺബീര്‍ കപൂര്‍ ആയിരുന്നു കമ്പനിയുടെ ബ്രാൻഡ് അംബാസഡര്‍. ലക്ഷക്കണക്കിന് ആരാധകരുടെ പിന്തുണയ്ക്ക് പുറമെ താരം സോഷ്യൽ മീഡിയയിൽ സജീവമാണന്നതും വിൽപനയ്ക്ക് മുതൽക്കൂട്ടാകുമെന്നാണ് കമ്പനിയുടെ വിലയിരുത്തല്‍.

ഫേസ്ബുക്കിൽ 37 ദശലക്ഷം ആരാധകരും ട്വിറ്ററിൽ 26.4 ദശലക്ഷം ഫോളോവേഴ്സുമാണ് കോഹ്ലിയ്ക്ക് ഉള്ളത്. ഇതുകൂടാതെ ഇന്‍സ്റ്റഗ്രാം പ്രൊഫൈലിനും 23.9 ദശലക്ഷം ഫോളോവര്‍മാരുണ്ട്. ലോകത്ത് തന്നെ ഏറ്റവുമധികം പ്രതിഫലം വാങ്ങുന്ന കായികതാരങ്ങളിലൊരാളാണ് ഇന്ന് വിരാട് കൊഹ്ലി. 2017ൽ മാത്രം കൊഹ്ലി പ്രതിഫല ഇനത്തിൽ 175 കോടി രൂപ കൈപ്പറ്റിയിട്ടുണ്ടെന്നാണ് ഫോര്‍ബ്സ് മാസികയുടെ കണക്ക്.

തന്‍റെ തലമുറയിലെ ലക്ഷക്കണക്കിന് ചെറുപ്പക്കാര്‍ ഹീറോ ബൈക്കുകള്‍ ഓടിച്ചാണ് വളര്‍ന്നുവന്നതെന്നും ഹീറോയുമായി സഹകരിക്കുന്നത് ഒരു പ്രത്യേക അനുഭവമാണെന്നും വിരാട് കൊഹ്ലി പറഞ്ഞു.

ഹീറോ ബ്രാൻഡിന്‍റെ മുഖമുദ്രയായ വിശ്വാസം, മികവ്, മാറ്റങ്ങളെ ഉള്‍ക്കൊള്ളാനുള്ള കഴിവ് എന്നിവ വിരാട് കൊഹ്ലിയുടെ വ്യക്തിത്വവുമായി ചേര്‍ന്നു പോകുന്നതാണെന്നും കൊഹ്ലി ഇന്നത്തെ തലമുറയുടെ പ്രതിനിധിയാണെന്നും ഹീറോ മോട്ടോകോര്‍പ്പ് ചെയര്‍മാൻ പവൻ മുഞ്ചല്‍ പറഞ്ഞു.

വിരാട് കൊഹ്ലിയുമൊത്തുള്ള ആദ്യ വീഡിയോ ഹീറോ ഉടൻ പുറത്തിറക്കും. കമ്പനിയുടെ പുതിയ ഉത്പന്നമായ എക്സ്ട്രീം 200ആര്‍ ആയിരിക്കും വിരാട് കൊഹ്ലി പ്രൊമോട്ട് ചെയ്യുക.