വോൾവോ XC90 T8 ഇൻസ്ക്രിപ്ഷൻ ഹൈബ്രിഡ് ഇന്ത്യയിൽ

ഇന്ത്യയിൽ വോൾവോ അവതരിപ്പിച്ച ആദ്യത്തെ ഹൈബ്രിഡ് മോഡലായിരുന്നു വോൾവോ XC90 T8 എക്സലെൻസ്. 1.31 കോടി രൂപയായിരുന്നു ഇന്ത്യയിലെ വില. ആഡംബരം എന്നതിലുപരി പരിസ്ഥിതി സൗഹൃദ വാഹനം എന്ന രീതിയിലും എക്സലെൻസ് തിളങ്ങി. ഇപ്പോഴിതാ മറ്റൊരു പെട്രോൾ ഹൈബ്രിഡ് പതിപ്പിനെ കൂടി അവതരിപ്പിച്ചിരിക്കുകയാണ് വോൾവോ. XC90 T8 ഇൻസ്ക്രിപ്ഷൻ എന്ന പേരിലെത്തിയിരിക്കുന്ന വാഹനത്തിന് 96.65 ലക്ഷം രൂപയാണ് എക്സ്ഷോറൂം വില.

ഹൈബ്രിഡ് എക്സലെൻസ് ഫോർ സീറ്റർ വാഹനമായിരുന്നു. എന്നാൽ ഇൻസ്ക്രിപ്ഷൻ സെവൻ സീറ്റർ പരിവേഷത്തിലാണ് എത്തിയിരിക്കുന്നത്. 2.0 ലിറ്റര്‍ ടര്‍ബ്ബോചാര്‍ജ്ഡ്, സൂപ്പര്‍ചാര്‍ജ്ഡ് പെട്രോള്‍ എൻജിനാണ് XC90 T8 ഇന്‍സ്‌ക്രിപ്ഷന് കരുത്തേകുന്നത്. 320 ബിഎച്ച്പി കരുത്താണ് ഈ പെട്രോൾ എൻജിനുള്ളത്. എൻജിന് വൈദ്യുത മോട്ടോറിന്‍റെ പിന്തുണയും ലഭ്യമാക്കിയിട്ടുണ്ട്. 87 ബിഎച്ച്പി കരുത്താണ് മോട്ടറിനുള്ളത്. മൊത്തത്തിൽ 407 ബിഎച്ച്പി കരുത്തും 400എൻഎം ടോർക്കുമാണ് XC90 T8 ഇന്‍സ്‌ക്രിപ്ഷൻ വാഗ്ദാനം ചെയ്യുന്നത്. 8 സ്പീഡ് ഓട്ടോമാറ്റിക് ആണ് ഗിയർബോക്സ്.

ഒറ്റ ചാര്‍ജ്ജില്‍ 40 കിലോമീറ്റര്‍ ദൂരം സഞ്ചരിക്കാൻ എസ്‌യുവിക്ക് സാധിക്കും. 150 മിനിറ്റുകള്‍ കൊണ്ട് പൂര്‍ണമായും ബാറ്ററി ചാര്‍ജ്ജ് ചെയ്യാന്‍ കഴിയും. ഡിജിറ്റല്‍ ഇന്‍സ്ട്രമെന്‍റ് ക്ലസ്റ്റര്‍, ടച്ച് സ്ക്രീൻ സംവിധാനം, നാലു സോണ്‍ ക്ലൈമറ്റ് കണ്‍ട്രോള്‍, മസാജ് സംവിധാനമുള്ള മുന്‍നിര സീറ്റുകള്‍, പാനരോമിക് സണ്‍റൂഫ് തുടങ്ങിയവാണ് പ്രധാന സവിശേഷതകൾ.

റഡാര്‍ കേന്ദ്രീകരിച്ച അഡാപ്റ്റീവ് ക്രൂയിസ് കണ്‍ട്രോള്‍, കൊളീഷന്‍ അവോയിഡന്‍സ് ബ്രേക്കിംഗ് സംവിധാനം, ലെയ്ന്‍ കീപ് അസിസ്റ്റ്, റണ്‍ ഓഫ്‌റോഡ് പ്രൊട്ടക്ഷന്‍ തുടങ്ങിയ സുരക്ഷാ സജ്ജീകരണങ്ങളും എസ്‌യുവിയിൽ ഒരുക്കിയിട്ടുണ്ട്.