Kerala Budget EV Charging Station : സംസ്ഥാനത്തെ എല്ലാ ജില്ലകളിലും ഇലക്ട്രിക് വാഹന ചാർജിങ് സ്റ്റേഷനുകൾ സ്ഥാപിക്കും

ഇലക്ട്രിക് വാഹന വിപണിക്ക് ഊർജ്ജമേകി സംസ്ഥാന ബജറ്റ് പ്രഖ്യാപനം. എല്ലാ ജില്ലകളിലും ഇലക്ട്രിക് വാഹന സ്റ്റേഷനുകൾ സ്ഥാപിക്കുമെന്ന് ധനമന്ത്രി കെ.എൻ ബാലഗോപാൽ ബജറ്റിൽ അറിയിച്ചു. ഇതിനായി 7.8 കോടി രൂപ അനുവദിക്കുമെന്നും മന്ത്രി അറിയിച്ചു.

പരിസ്ഥിതി സൗഹാർദപരമായ നടപടികൾക്ക് ഇത്തവണ കേന്ദ്രബജറ്റിലും പ്രാധാന്യം ലഭിച്ചിരുന്നു. ഇ-വാഹനങ്ങളുടെ വില കുറയ്ക്കാനുള്ള നടപടികൾ കഴിഞ്ഞ ദിവസം അവതരിപ്പിച്ച കേന്ദ്രബജറ്റിൽ പ്രഖ്യാപിച്ചിരുന്നു. ഇതിന്റെ ചുവടു പിടിച്ചാണ് സംസ്ഥാന സർക്കാരും ഇ-വാഹന വിപണിക്ക് പിന്തുണ നൽകുന്നത്.

ഫെബ്രുവരി 1ന് അവതരിപ്പിച്ച കേന്ദ്രബജറ്റിൽ ഇലക്ട്രിക് വാഹനങ്ങൾക്ക് കേന്ദ്രസർക്കാർ സബ്സിഡി പ്രഖ്യാപിച്ചിരുന്നു. ഇ-വാഹനങ്ങളിൽ ഉപയോഗിക്കുന്ന ലിഥിയം ബാറ്ററികളുടെ കസ്റ്റംസ് ഡ്യൂട്ടി 13% എന്ന തോതിൽ കുറച്ചിരുന്നു. ഇതിനു പുറമെ നാചുറൽ ഗ്യാസ്, ബയോഗ്യാസ് എന്നിവയുടെ എക്സൈസ് ഡ്യൂട്ടിയിലും ഇളവുകൾ പ്രഖ്യാപിച്ചിരുന്നു. ഇതിലൂുടെ നിരവധി വിദേശ ബ്രാൻഡുകളുൾപ്പെടെ ഇന്ത്യയിലേക്ക് കടന്നു വരാൻ വഴിയൊരുക്കുമെന്നാണ് വിലയിരുത്തപ്പെടുന്നത്.

Also Read : Kerala State Budget :ലോട്ടറിയെടുക്കുന്നവർക്ക് സന്തോഷവാർത്ത; സമ്മാനം ലഭിച്ചാൽ പണം എങ്ങനെ ചിലവാക്കണമെന്ന് സർക്കാർ പഠിപ്പിക്കും
ഉയർന്ന വിലയും, ചാർജിങ് സ്റ്റേഷനുകളുടെ പരിമിതിയുമാണ് ഇലക്ട്രിക് വാഹനങ്ങളിൽ നിന്ന് ജനങ്ങളെ അകറ്റി നിർത്തിയിരുന്ന പ്രധാന ഘടകം. എന്നാൽ ഇ-വാഹനങ്ങളുടെ വില ഉയർത്തുന്ന പ്രധാന ഘടകമായ ലിഥിയം ബാറ്ററികളുടെ നികുതിയാണ് കേന്ദ്രസർക്കാർ കുറച്ചു നൽകിയത്. ഇത് വാഹനങ്ങളുട വില കുറയാൻ കാരണമാകും. ഇതിനൊപ്പം സബ്സിഡി ആനുകൂല്യങ്ങളും ലഭിക്കും.

സംസ്ഥാന സർക്കാർ എല്ലാ ജില്ലകളിലും ചാർജിങ് സ്റ്റേഷനുകൾ കൊണ്ടു വരുന്നതോടു കൂടി ഇലക്ട്രിക് വാഹനങ്ങൾ കൂടുതൽ ജനകീയമാവും. ഇന്ധനവില ഉയർത്തുന്ന പ്രഖ്യാപനവും സംസ്ഥാന ബജറ്റിലുണ്ടായിരുന്നു. ഇന്ധന സെസ് വർധിച്ചതോടെ ഇന്ധനവില ഇനിയും ഉയരുന്ന സാഹചര്യത്തിൽ കൂടുതൽ ആളുകൾ ഇ-വാഹനങ്ങളിലേക്ക് തിരിയാനാണ് എല്ലാ സാധ്യതയുമുള്ളത്.

Read Latest Business News and Malayalam News