ബജറ്റ് 2018: മൽസ്യമേഖലയ്ക്ക് പ്രത്യേക പാക്കേജിന് സാധ്യത

തിരുവനന്തപുരം∙ സംസ്ഥാന ബജറ്റിൽ മൽസ്യമേഖലയ്ക്കു പ്രത്യേക പാക്കേജ് പ്രഖ്യാപിക്കാൻ സാധ്യത. ഓഖി ദുരന്തത്തിന്‍റെ പശ്ചാത്തലത്തിൽ നിലവിൽ പ്രഖ്യാപിച്ചിരിക്കുന്ന ദുരിതാശ്വാസ പാക്കേജിനു പുറമെ പ്രത്യേക പാക്കേജ് ഉണ്ടാകുമെന്നാണ് ഈ രംഗത്തെ വിദഗ്ധര്‍ പറയുന്നത്. കഴിഞ്ഞ ബജറ്റിനെ അപേക്ഷിച്ചു മൽസ്യമേഖലയ്ക്കുള്ള അടങ്കലും വര്‍ധിക്കാനാണ് സാധ്യത. മൽസ്യത്തൊഴിലാളികളുടെ സുരക്ഷയ്ക്കും അടിസ്ഥാനസൗകര്യ വികസനത്തിനുമായിരിക്കും ബജറ്റിൽ മുഖ്യ പരിഗണന നൽകുക.

കടലിൽ അകപ്പെടുന്ന മൽസ്യത്തൊഴിലാളികളെ രക്ഷിക്കാൻ മൂന്നു മറൈൻ ആംബുലൻസുകൾ അനുവദിച്ചേക്കും. എട്ടുകോടി രൂപ വിലമതിക്കുന്ന ഐസിയു യൂണിറ്റുള്ള ആംബുലൻസിന് ധനവകുപ്പ് കഴിഞ്ഞ വ്യാഴാഴ്ച അനുമതി നൽകിയിരുന്നു. കോസ്റ്റ് ഗാർഡിനു കൂടുതൽ ബോട്ടുകൾ വാങ്ങുന്നതിനും പണം അനുവദിച്ചേക്കും, മൽസ്യത്തൊഴിലാളികൾക്കു മുന്നറിയിപ്പു നൽകാനുള്ള കൂടുതൽ നാവിക് ഉപകരണങ്ങൾ വാങ്ങുവാനും പദ്ധതിയുണ്ട്.

ഓഖിയിൽ മരിച്ചവരുടെ കുട്ടികൾക്കു പഠനത്തിനു പ്രത്യേക പദ്ധതി പ്രഖ്യാപിക്കാനും സാധ്യതയുണ്ട്. തൊഴിൽ പരിശീലനം, ഭവനപദ്ധതി എന്നിവയ്ക്കും ഫണ്ട് അനുവദിച്ചേക്കും. കഴിഞ്ഞ ബജറ്റിലെ 408 കോടിയെക്കാൾ തീരമേഖലയ്ക്കുള്ള അടങ്കൽ ശ്രദ്ധേയമായ വിധം വര്‍ധിക്കാനുള്ള സാധ്യതയും തള്ളുന്നില്ല. ഇതേസമയം കടാശ്വാസപദ്ധതി യാഥാർഥ്യമാക്കണമെന്ന ആവശ്യവും ശക്തമായി ഉയര്‍ന്നിട്ടുണ്ട്.