എട്ട് കോടി സ്ത്രീകൾക്ക് ഗ്യാസ് കണക്ഷൻ നൽകും

ന്യൂഡൽഹി: എട്ട് കോടി പാവപ്പെട്ട സ്ത്രീകൾക്ക് ഗ്യാസ് കണക്ഷൻ നൽകുമെന്ന് കേന്ദ്ര ബജറ്റിൽ വാഗ്‌ദാനം. 4 കോടി വീടുകളിൽ സൗജന്യ വൈദ്യുതി എത്തിക്കുമെന്നും ബജറ്റ് വാഗ്‌ദാനം ചെയ്യുന്നു. ഇതിനായി പ്രധാനമന്ത്രി സൗഭാഗ്യ യോജനക്ക് പതിനാറായിരം കോടി രൂപ അനുവദിക്കും. കൂടാതെ, സ്വയം സഹായ സംഘങ്ങൾക്ക് പ്രത്യേക പാക്കേജ് പ്രഖ്യാപിച്ചു. പ്രൊഫഷണൽ തൊഴിലുകൾ കൂട്ടുന്നതിലായിരുന്നു കഴിഞ്ഞ ബജറ്റ് ശ്രദ്ധിച്ചിരുന്നതെങ്കിൽ ഇത്തവണ താഴെക്കിടയിൽ നിന്നുള്ളവർക്ക് കൂടി തൊഴിൽ ലഭ്യമാക്കാനുള്ള പദ്ധതി രൂപീകരിക്കുമെന്ന് ബജറ്റ് പ്രഖ്യാപനം ഉണ്ട്.

തൊഴിലവസരങ്ങൾ സൃഷ്ടിക്കാനായി മൂന്ന് ലക്ഷം കോടി രൂപ മുദ്ര പദ്ധതിക്കായി നൽകും. 2014ലെ ലോക്‌സഭാ തെരഞ്ഞെടുപ്പ് പ്രചാരണങ്ങളിൽ ഒരു വർഷം പത്ത് ദശലക്ഷം തൊഴിലുകൾ സൃഷ്ടിക്കുമെന്ന് മോദി പ്രഖ്യാപിച്ചിരുന്നു. നരേന്ദ്ര മോദി സര്‍ക്കാരിന്‍റെ അവസാനത്തെ സമ്പൂർണ ബജറ്റാണ് ഇന്ന് അരുൺ ജെയ്‌റ്റിലി ലോക്‌സഭയിൽ അവതരിപ്പിച്ചത്.