ടൂറിസം മേഖലയ്ക്ക് ആശ്വാസം; 50 കോടി രൂപ അധികമായി വകയിരുത്തി, 400 കോടി രൂപയുടെ വായ്പയും

തിരുവനന്തപുരം: കൊവിഡ് പ്രതിസന്ധിക്കിടെ വിനോദസഞ്ചാര മേഖലയ്ക്ക് ആശ്വാസമേകി ബജറ്റ് പ്രഖ്യാപനം. വിനോദസഞ്ചാര മേഖലയ്ക്ക് മാർക്കറ്റിങിന് 50 കോടി രൂപ അധികമായി വകയിരുത്തി നിലവിലുള്ള നൂറ് കോടി രൂപയ്ക്ക്ക പുറമെയാണിത്. ടൂറിസം പുനരുജ്ജീവന പാക്കേജിന് സർക്കാർ വിഹിതമായി 30 കോടി രൂപയും അനുവദിച്ചു. ടൂറിസം മേഖലയിൽ കൂടുതൽ പ്രവർത്തന മൂലധനം ലഭ്യമാക്കുന്നതിനായി കെഎഫ്സി 400 കോടി രൂപയുടെ വായ്പ ലഭ്യമാക്കും.

വിനോദസഞ്ചാരികളെ ആകർഷിക്കാൻ ജലാശയങ്ങളിലും കരയിലും സഞ്ചരിക്കുന്ന ആംഫിബിയൻ വാഹന സൗകര്യം ലഭ്യമാക്കും. ആദ്യഘട്ടം കൊല്ലം, കൊച്ചി തലശ്ശേരി മേഖലയിൽ ആരംഭിക്കും. ഇതിനായി അഞ്ച് കോടി രൂപ അനുവദിക്കും. കേരളത്തെ അന്താരാഷ്ട്ര ആഭ്യന്തര വിനോദസഞ്ചാരകേന്ദ്രമാക്കി മാറ്റുന്നതിന് രണ്ട് സർക്യൂട്ട് ടൂറിസം പരിപാടികൾ പ്രഖ്യാപിച്ചു. മലബാർ ലിറ്റററി സർക്യൂട്ട്, ബയോ ഡൈവേഴ്സിറ്റി സർക്യൂട്ട് എന്നീ പരിപാടികൾക്കായി 50 കോടി വകയിരുത്തി.

Also Read: കുടുംബശ്രീ അയൽക്കൂട്ടങ്ങൾക്ക് 4% പലിശ നിരക്കിൽ 1000 കോടി രൂപയുടെ വായ്പ

മലയാള സാഹിത്യത്തിലെ അതികായന്‍മാരായ തുഞ്ചത്ത് എഴുത്തച്ചന്‍, വൈക്കം മുഹമ്മദ് ബഷീര്‍, ഒവി വിജയന്‍, എം ടി വാസുദേവന്‍ നായര്‍ എന്നിവരിലൂടെ പ്രശസ്തി നേടിയ തുഞ്ചന്‍ സ്മാരകം, ബേപ്പര്‍, തസ്രാക്ക്, ഭാരതപ്പുഴയുടെ തീരങ്ങള്‍, പൊന്നാനി, തൃത്താല, തിരൂർ എന്നീ സ്ഥലങ്ങളെ കോര്‍ത്തിണക്കിയുളള ടൂറിസം സര്‍ക്യൂട്ടാണ് മലബാ‍ർ ലിറ്റററി സ‍ർക്ക്യൂട്ട്.

കൊല്ലം ജില്ലയിലെ അഷ്ടമുടിക്കായല്‍, മണ്‍ട്രോതുരുത്ത്, കൊട്ടാരക്കര, മീന്‍പിടിപ്പാറ, മുട്ടറമരുതിമല, ജടായുപാറ, തെന്മല, അച്ചന്‍കോവില്‍ എന്നീ പ്രദേശങ്ങളെ ബന്ധിപ്പിച്ചു കൊണ്ടുളളതാണ് ബയോ ഡൈവേഴ്‌സിറ്റി ടൂറിസം സര്‍ക്യൂട്ട്. ഇതുകൂടാതെ കെ ആർ ഗൗരിയമ്മയ്ക്കും ആർ ബാലകൃഷ്ണപിള്ളയ്ക്കും സ്മാരകം നിർമിക്കുന്നതിനയി രണ്ട് കോടി വീതം വകയിരുത്തിയിട്ടുണ്ട്.

ബജറ്റ് പ്രസംഗം വായിക്കാം