Kerala Budget:കുടുംബ ശ്രീ..വിജയ ശ്രീ; വനിതാ ക്ഷേമത്തിനായി വൻ പദ്ധതികൾ

കൊച്ചി: വനിതകളെ എല്ലാ ചങ്ങലപ്പൂട്ടുകളിൽ നിന്നും മോചിപ്പിയ്ക്കും എന്ന് ബജറ്റ് പ്രസംഗത്തിൽ വിവിധ കവിതകളിലൂടെ വ്യക്തമാക്കിയ ധനമന്ത്രി ബജറ്റിൽ സ്ത്രീകൾക്കായി മികച്ച ക്ഷേമ പദ്ധതികളും പ്രഖ്യാപിച്ചിട്ടുണ്ട്.
കുടംബശ്രീയെ അടുത്ത ഘട്ടത്തിലേക്ക് ഉയർത്തുന്നതിനും വനിതാ ക്ഷേമത്തിനുമായി വൻ പദ്ധതികളാണ് സംസ്ഥാന ബജറ്റിൽ പ്രഖ്യാപിച്ചിരിയ്ക്കുന്നത്.

വനിതാ ക്ഷേമത്തിനായുള്ള അടങ്കൽ തുകയും പദ്ധതി വിഹിതവും ഉയർത്തി. വനിതകൾക്കായുള്ള വിഹിതം 18.4 ശതമാനമായി ഉയർത്തിയിട്ടുണ്ട് ഇത്തവണത്തെ ബജറ്റിൽ. കേന്ദ്രാവിഷ്കൃത സ്കീമുകളടക്കം 1053 കോടി രൂപയാണ് സ്ത്രീകളുെടയും കുട്ടികളുെടയും വകുപ്പിൻറെ അടങ്കൽ.

കുടുംബശ്രീയെ അടുത്ത ഘട്ടത്തിലേക്ക് ഉയർത്തും. കുടുംബ ശ്രീയിൽ 25 രൂപയ്ക്ക് ഊണ് നൽകുന്ന 1000ഹോട്ടലുകൾ. പുതിയ തൊഴിലവസരങ്ങൾ ഇതിലൂടെ സൃഷ്ടിയ്ക്കപ്പെടും. കേരള ചിക്കൻ പദ്ധതിയുടെ 200 ഔട്ട്ലെറ്റുകൾ, പുതിയ 500 ടോയിലെറ്റ് പ്രോജക്ടുകൾ, കുടുംബ ശ്രീ ഉത്പന്നങ്ങളുടെ ബ്രാൻഡിങ്ങ് തുടങ്ങിയ വികസന പദ്ധതികളാണ് പ്രഖ്യാപിച്ചിരിക്കുന്നത്. കുടുംബ ശ്രീയ്ക്ക് കീഴിലുള്ള ഇൻറേൺഷിപ്പ് പ്രോഗ്രാമുകൾ ഉയർത്തും. കുടുംബശ്രീയ്ക്കായി 250 കോടി രൂപ വക ഇരുത്തി.

Also Read: State Budget 2020: പ്രതിസന്ധിയ്ക്കിടയിലും ക്ഷേമ പദ്ധതികൾക്കും ഊന്നൽ നൽകി സംസ്ഥാന ബജറ്റ്

പദ്ധതിയ്ക്കു കീഴിൽ 4 ശതമാനം വായ്പ നിരക്കിൽ 30,000 കോടി രൂപ വായ്പ അനുവദിയ്ക്കും. വനിതാ ഹോസ്റ്റലുകളുടെ സുരക്ഷ വർധിപ്പിയ്ക്കും.സ്ത്രീകൾ ഉത്പാദിപ്പിയ്ക്കുന്ന ഉത്പന്നങ്ങൾക്കായി ജെൻഡർ പാർക്കിൽ ഇൻറനാഷണൽ ട്രേഡ് സെൻറർ അവതരിപ്പിയ്ക്കും. എല്ലാ നഗരങ്ങളിലും ഷീ ലോഡ്ജ് സ്ഥാപിയ്ക്കും.

അംഗണവാടി പ്രവർത്തകർക്കും പ്രത്യേക പരിഗണന നൽകും. പ്രീപ്രൈമറി ടീച്ചർമാർക്കും ആയമാർക്കും 500 രൂപ അധിക വേതനം നൽകും. നഴ്സിങ് പരിശീലനത്തിനായി കൂടുതൽ തുക വക ഇരുത്തി. നിർഭയ ഹോമുകളും സഹായം ഉയർത്തും.