2018 ബജറ്റ് കെട്ടിട നിർമ്മാണ മേഖലയ്ക്ക് ഗുണകരമായേക്കും?

ന്യൂഡൽഹി: ഏവരും ആകാംക്ഷാപൂ‍ര്‍വം കാത്തിരിക്കുന്ന 2018-19 കാലയളവിലെ ബജറ്റ് കെട്ടിട നിര്‍മ്മാണ മേഖലയ്ക്ക് ഗുണകരമായേക്കുമെന്ന് റിപ്പോര്‍ട്ട്. ചെറുകിട ഭവന നിർമ്മാണ മേഖലയ്ക്ക് ബജറ്റിൽ ഇളവുകൾ പ്രഖ്യാപിച്ചേക്കുമെന്നാണ് ഈ മേഖലയിൽ പ്രവര്‍ത്തിക്കുന്നവര്‍ കണക്കുകൂട്ടുന്നത്. ഗുഡ്സ് ആൻഡ് സർവ്വീസ് ടാക്സ് ഇനത്തിൽ സിമന്‍റിന്‍റെ ജിഎസ്ടി നിരക്ക് 28 ശതമാനത്തിൽ നിന്ന് 18 ശതമാനമായി കുറച്ചേക്കുമെന്നാണ് ഇക്കൂട്ടര്‍ കണക്കാക്കുന്നത്. കോർപറേറ്റ് ടാക്സ്, ഡിവിഡന്‍റ് ഡിസ്ട്രിബ്യൂഷൻ ടാക്സ്, മാറ്റ് (മിനിമം ആൾട്ടർനേറ്റീവ് ടാക്സ് ) എന്നിവയും കുറയ്ക്കണമെന്നും നിർമ്മാണ മേഖലയിൽ പ്രവര്‍ത്തിക്കുന്നവര്‍ ആവശ്യപ്പെടുന്നു.

ധനമന്ത്രി അരുൺ ജെയ്റ്റ്ലി കോർപ്പറേറ്റ് ടാക്സിൽ 5 ശതമാനം ഇളവ് വരുത്തുമെന്ന് മുൻപ് തന്നെ വാഗ്ദാനം ചെയ്തിരുന്നു. 2019ലെ പൊതു തെരഞ്ഞെടുപ്പിന് മുമ്പുള്ള എൻഡിഎ സർക്കാരിന്‍റെ അവസാന ബജറ്റായതിനാൽ ഇത് നടപ്പിലാക്കാൻ ഏറെ സാധ്യതയുള്ളതായും വിദഗ്ധർ ചൂണ്ടിക്കാട്ടുന്നു. ബജറ്റിൽ സർക്കാ‍ർ ഓഹരിയുടമകളിൽ നിന്ന് ഈടാക്കുന്ന ഡിവിഡന്‍റ് ഡിസ്ട്രിബ്യൂഷൻ ടാക്സ് റദ്ദാക്കാനാണ് സാധ്യതയെന്നും വിദഗ്ധർ വ്യക്തമാക്കുന്നുണ്ട്. നികുതിയായി ഈടാക്കുന്ന ഉയർന്ന തുകയും മൂലധന വരുമാനത്തിലുള്ള ഗണ്യമായ കുറവും കോ‍ർപ്പറേറ്റുകൾക്ക് ഡിവിഡന്‍റ് ഡിസ്ട്രിബ്യൂഷൻ ടാക്സ് ചെറിയ തലവേദനയല്ല സൃഷ്ടിക്കുന്നത്.