അവിശ്വസനീയം... ജെയ് ഹൊ! ധനമന്ത്രിയുടെ ഡിജിറ്റൽ കറൻസി പ്രഖ്യാപനത്തിന് പിന്തുണയുമായി പേടിഎം സ്നാപ്പ്ഡീൽ മേധാവികൾ

ന്യൂഡൽഹി: രാജ്യത്തിന് സ്വന്തമായൊരു ഡിജിറ്റൽ രൂപ വരുന്നുവെന്ന പ്രഖ്യാപനത്തോടെ കേന്ദ്ര സർക്കാരിന് കയ്യടിയുമായി എത്തിയിരിക്കുകയാണ് പ്രമുഖർ. അതേസമയം, വിഷയത്തിൽ കൂടുതൽ വ്യക്തത ഉണ്ടാകുമെന്നാണ് നിക്ഷേപകരും ക്രിപ്റ്റോ കറൻസി വിദഗ്ദ്ധരും വിശ്വസിക്കുന്നത്.

ഇന്ത്യ ഒരു സെൻട്രൽ ബാങ്ക് ഡിജിറ്റൽ കറൻസി പുറത്തിറക്കുമെന്ന് നേരത്തെ തന്നെ സൂചന ഉണ്ടായിരുന്നു. പൂർണമായും ഭരണകൂടത്തിന്റെ നിയന്ത്രണത്തിൽ നിൽക്കുന്നതായിരിക്കും പുതിയ ഡിജിറ്റൽ കറൻസി.

സിബിഡിസിയുടെ ആമുഖം ഡിജിറ്റൽ സമ്പദ്വ്യവസ്ഥയ്‌ക്ക് ഉത്തേജനം നൽകുമെന്ന് ധനമന്ത്രി പറഞ്ഞു. ബ്ലോക്ക് ചെയിൻ അധിഷ്ഠിത സാങ്കേതിക വിദ്യ ഉപയോഗിച്ചായിരിക്കും പുതിയ സെൻട്രൽ ബാങ്ക് ഡിജിറ്റൽ കറൻസിയെന്ന് ബജറ്റ് അവതരണത്തിനിടയിൽ ധനമന്ത്രി പറഞ്ഞു.

2022 കേന്ദ്ര ബജറ്റിലെ നിർണായക പ്രഖ്യാപനത്തെ ഒട്ടുമിക്ക സംരംഭകരും ഇരുകൈയ്യും നീട്ടിയാണ് സ്വാഗതം ചെയ്തിരിക്കുന്നത്. ഡിജിറ്റൽ പേയ്മെന്റ് ആപ്പായ പേട്ടിഎം സ്ഥാപകൻ വിജയ് ശേഖർ ശർമ പ്രഖ്യാപനത്തെ സ്വാഗതം ചെയ്ത് ട്വീറ്റ് ഇട്ടിരുന്നു.

'സിബിഡിസി ജെയ് ഹൊ! ബജറ്റ് 2022ലെ എന്തൊരു അവിശ്വസനീയമായ പ്രഖ്യാപനം' എന്നായിരുന്നു അദ്ദേഹത്തിന്റെ ട്വീറ്റ്.


സമാനമായ മറ്റൊരു പ്രതികരണമായിരുന്നു സ്നാപ് ഡീൽ സ്ഥാപനകായ കുണാൽ ഭാലിന്റെ ഭാഗത്ത് നിന്നുമുണ്ടായതും. കേന്ദ്ര സർക്കാരിന്റെ നീക്കത്തെ പരിവർത്തനാത്മകം എന്നാണ് അദ്ദേഹം വിശേഷിപ്പിച്ചത്.

'ഈ ഘട്ടത്തിന്റെ പ്രാധാന്യം ബൃഹത്തായതാണ്. ഇന്ത്യയുടെ വലിപ്പവും ആഗോള സ്വാധീനവുമുള്ള ഒരു സമ്പദ്‌വ്യവസ്ഥയെ സംബന്ധിച്ചിടത്തോളം ഒരു ഡിജിറ്റൽ കറൻസിയിലേക്ക് ഔപചാരികമായ മുന്നേറ്റം ഉണ്ടാക്കുന്നത് യഥാർത്ഥത്തിൽ പരിവർത്തനാത്മകമായിരിക്കും'. എന്നായിരുന്നു അദ്ദേഹത്തിന്റെ ട്വീറ്റ്.


ഡിജിറ്റൽ രൂപത്തിൽ ഒരു സെൻട്രൽ ബാങ്ക് നൽകുന്ന നിയമപരമായ ടെൻഡറാണ് സെൻട്രൽ ബാങ്ക് ഡിജിറ്റൽ കറൻസി. പുതിയ സാമ്പത്തിക വർഷത്തിൽ തന്നെ ഡിജിറ്റൽ രൂപ ആർബിഐ പുറത്തിറക്കും.

ഒരു ഫിയറ്റ് കറൻസിക്ക് സമാനമാണ് ഈ ഡിജിറ്റൽ കറൻസി. എന്നാൽ, പ്രവർത്തനം വ്യത്യസ്തമാണ്, സർക്കാർ നൽകിയ പണം ഉപയോഗിച്ച് പരസ്പരം കൈമാറ്റം ചെയ്യാവുന്നതാണ്. മറ്റൊരു വിധത്തിൽ പറഞ്ഞാൽ, നിങ്ങൾ ഉപയോഗിക്കുന്ന നിയമപരമായ കറൻസിക്ക് സമാനമാണ് സിബിഡിസി, അത് ഒരു ഡിജിറ്റൽ രൂപത്തിലാണെന്ന് മാത്രം. പണത്തിന് സുരക്ഷിതവും ശക്തവും സൗകര്യപ്രദവുമായ ബദൽ നൽകുന്ന ഒന്നായി സിബിഡിസിയെ ആർബിഐ നേരത്തെ ഇതിനെക്കുറിച്ച് വിശേഷിപ്പിച്ചിരുന്നു.