ഇന്ധനവിലക്കയറ്റത്തെ ഇനി മറന്നേക്കു; ഓഫറുകൾകൊണ്ട് ശ്രദ്ധനേടി 2 ഫ്യൂവൽ കാർഡുകൾ

പൊതുജനം ഇന്ന് അഭിമുഖീകരിക്കുന്ന പ്രധാന പ്രശ്‌നങ്ങളിലൊന്നാണ് ഇന്ധനവിലക്കയറ്റം. അടുത്തിടെ കേന്ദ്ര സർക്കാർ പ്രഖ്യാപിച്ച നേരിയ ഇളവുകൾ ഇന്ധനവിലയെ താൽകാലികമായി കുറച്ചിട്ടുണ്ടെങ്കിലും നടപടി ശാശ്വതമല്ല. ഇന്ധനവിലക്കയറ്റം മൂലം രാജ്യത്തെ പണപ്പെരുപ്പ നിരക്കും ഉയരുകയാണ്. ഇവിടെയാണ് ബാങ്കുകളുടെ ഫ്യൂവൽ ക്രെഡിറ്റ് കാർഡുകൾ ശ്രദ്ധ നേടുന്നത്. എണ്ണക്കമ്പനികളുമായി സഹകരിച്ച് ബാങ്കുകൾ പുറത്തിറക്കുന്ന ഇത്തരം കാർഡുകൾ പൊതുജനത്തിനു വലിയ ആശ്വാസമാണ് പകരുന്നത്.

ക്രെഡിറ്റ് കാർഡ് എന്നു കേട്ട് ഫ്യൂവൽ കാർഡുകളെ മാറ്റിനിർത്തേണ്ട ആവശ്യമില്ല. ഇന്ധനം നിറയ്ക്കുമ്പോൾ പണത്തിനു പകരം കാർഡ് ഉപയോഗിക്കാം എന്നതാണ് നേട്ടം. ഒരോ തവണ ഇന്ധനം നിറയ്ക്കുമ്പോഴും റിവാർഡ് പോയിന്റുകളും ഓഫറുകളും ഇത്തരം കാർഡുകൾ നേടിത്തരും. ഇങ്ങനെ ശേഖരിക്കുന്ന പോയിന്റുകൾ ഉപയോഗിച്ചു ഭാവിയിൽ സൗജന്യമായി ഇന്ധനം നിറയ്ക്കാമെന്നതാണു കാർഡുകളുടെ പ്രധാന ആകർഷണം. എണ്ണക്കമ്പനികൾക്കും ബാങ്കുകൾക്കും അനുസരിച്ചു കാർഡുകളുടെ ആനുകൂല്യങ്ങളിൽ മാറ്റമുണ്ടാകും. ശ്രദ്ധിക്കേണ്ട പ്രാധാനകാര്യം ഏതു എണ്ണക്കമ്പനിയുമായാണോ ബാങ്കിന് സഹകരണമുള്ളത് ആ കമ്പനിയുടെ ഔട്ടലെറ്റുകളിലുള്ള ഇടപാടുകൾക്കാകും കൂടുതൽ സേവനം ലഭിക്കുകയെന്നതാണ്.

Also Read: ഹ്രസ്വകാലത്ത് മികച്ച നേട്ടം കൈവരിക്കാം; നാല് ഓഹരികള്‍ നിര്‍ദേശിച്ച് മോര്‍ഗന്‍ സ്റ്റാന്‍ലി

ഫ്യൂവൽ ക്രെഡിറ്റ് കാർഡുകൾ കൈയിലുണ്ടെങ്കിൽ ഇന്ധനം നിറയ്ക്കുന്നതിനു പണം കൈയിൽ കൊണ്ടു നടക്കേണ്ടതില്ലെന്നതും നേട്ടമാണ്. എല്ലാ മാസവും വലിയൊരു തുക ഇന്ധനച്ചെലവിനായി നിങ്ങൾ മാറ്റിവയ്ക്കുന്നുണ്ടെങ്കിൽ ഈ കാർഡുകൾ നിങ്ങൾക്ക് ആശ്വാസമാകുമെന്ന കാര്യത്തിൽ സംശയം വേണ്ട. കോവിഡിനു ശേഷം ആളുകൾ പൊതുഗതാഗതത്തിനു പകരം സ്വകാര്യ വാഹനങ്ങൾ കൂടുതലായി ഉപയോഗിക്കാൻ തുടങ്ങിയിട്ടുണ്ട്. നിരത്തുകളിലെ തിരക്കു വ്യക്തമാക്കുന്നതും ഇതുതന്നെയാണ്. ആ നിലയ്ക്കു ഒരു ഫ്യൂവൽ ക്രെഡിറ്റ് കാർഡുകൾ സ്വന്തമാക്കുന്നതിൽ യാതൊരു തെറ്റുമില്ല. എല്ലാ ബാങ്കുകളുടെ നിലവിൽ ഇത്തരം ഫ്യൂവൽ ക്രെഡിറ്റ് കാർഡുകൾ പുറത്തിറക്കുന്നുണ്ട്. വിപണികളിൽ മികച്ച പ്രതികരണമുള്ള രണ്ടു ക്രെഡിറ്റ് കാർഡുകളുടെ സവിശേഷതകളാണ് താഴെ നൽകുന്നത്.

ആക്‌സിസ്- ഇന്ത്യൻ ഓയിൽ ക്രെഡിറ്റ് കാർഡ്

പേര് സൂചിപ്പിക്കുന്നതു പോലെ തന്നെ ഇന്ത്യൻ ഓയിലുമായാണ് ആക്‌സിസ് ബാങ്ക് സഹകരണം ഉറപ്പാക്കിയിരിക്കുന്നത്. 100 രൂപയ്ക്ക് ഇന്ധനം നിറയ്ക്കുമ്പോൾ ഒരു ശതമാനം ഫ്യുവൽ സർചാർജ് കാർഡ് വഴി ലാഭിക്കാം. കൂടാതെ 20 റിവാർഡ് പോയിന്റുകളും ലഭിക്കും. പെട്രോൾ പമ്പുകൾക്കു പുറമേ കാർഡ് വഴി ഷോപ്പിങ്ങിനായി 100 രൂപ ചെലവഴിച്ചാൽ അഞ്ച് റിവാർഡ് പോയിന്റുകൾ ലഭിക്കും.
വെൽക്കം ബോണസായി ആദ്യ ഒരു മാസത്തെ ഇന്ധനം നിറയ്ക്കലുകൾക്കു പരമാവധി 250 രൂപ വരെ ക്യാഷ്ബാക്ക് ലഭിക്കും. ബുക്ക് മൈ ഷോ വഴി ടിക്കറ്റുകൾ ബുക്ക് ചെയ്യുന്നതിനും കാർഡ് ഇളവുകളും ഓഫറുകളും നേടിത്തരും. കാർഡിന്റെ വാർഷിക നിരക്ക് 500 രൂപയാണ്. വർഷം 50,000 രൂപയ്ക്കു മുകളിലുള്ള ഇടപാടുകൾ കാർഡ് വഴി നടന്നാൽ നിരക്ക് ഈടാക്കില്ല.

Also Read: രാജ്യാന്തര ബ്രാന്‍ഡുകളുടെ പേടിസ്വപ്നം; 23 വയസുകാരന്റെ സ്റ്റാര്‍ട്ടപ്പിന് ആനന്ദ് മഹീന്ദ്രയുടെ പിന്‍ബലം

സിറ്റി- ഇന്ത്യൻ ഓയിൽ ക്രെഡിറ്റ് കാർഡ്

ഇന്ത്യൻ ഓയിലുമായാണ് സിറ്റി ബാങ്കും ധാരണയിലെത്തിയിരിക്കുന്നത്. കാർഡ് വഴി ഓരോ തവണ 150 രൂപയ്ക്ക് ഇന്ധനം നിറയ്ക്കുമ്പോഴും നാല് ടർബോ പോയിന്റുകളാകും ലഭിക്കുക. കൂടാതെ ഒരു ശതമാനം ഫ്യുവൽ സർചാർജും ലാഭിക്കാനാകും. കാർഡ് വഴിയുള്ള 150 രൂപയുടെ സൂപ്പർമാർക്കറ്റ്, ഗ്രോസറി ചെലവാക്കലുകൾക്ക് രണ്ടു ടർബോ പോയിന്റുകൾ ലഭിക്കും. മറ്റു ചെലവാക്കലുകൾക്ക് ഒരു ടർബോ പോയിന്റാകും ലഭിക്കുക.
ഒരു ടർബോ പോയിന്റ് ഒരു രൂപയ്ക്കു തുല്യമാണ്. കാർഡ് വഴിയുള്ള ആദ്യ 30 ദിവസത്തിനുള്ളിലെ ചെലവാക്കലുകൾക്ക് 250 ടർബോ പോയിന്റുകൾ ലഭിക്കും. വാർഷിട നിരക്ക് 1000 രൂപയും ജി.എസ്.ടിയുമാണ്. വർഷം കാർഡ് വഴി 30,000 രൂപയുടെ ഇടപാട് നടന്നാൽ ഈ നിരക്ക് ഈടാക്കില്ല.

മുകളിൽ പറഞ്ഞ കാര്യങ്ങൾ ബാങ്കുകളുടെ ഔദ്യോഗിക വെബ്‌സൈറ്റ് വഴിയുള്ള വിവരങ്ങളാണ്. ഓഫറുകളിൽ മാറ്റം വരുത്താൽ സ്ഥാപനങ്ങൾക്ക് അനുമതിയുണ്ട്. അതിനാൽ കാർഡുകൾ എടുക്കുന്നതിനു മുമ്പ് കാര്യങ്ങൾ ചോദിച്ചു മനസിലാക്കുക.