ജിയോയിൽ വീണ്ടും വിദേശനിക്ഷേപം: ഇത്തവണ അബുദാബിയിൽനിന്നുള്ള കമ്പനി

മുംബൈ: റിലയന്‍സ് ഇന്‍ഡസ്ട്രീസിന്റെ സഹോദര സ്ഥാപനമായ ജിയോ പ്ലാറ്റ്‌ഫോമിൽ നിക്ഷേപം നടത്താൻ വീണ്ടുമൊരു വിദേശകമ്പനി കൂടി. അബുദാബി ആസ്ഥാനമായി പ്രവര്‍ത്തിക്കുന്ന മുബാദല ഇന്‍വെസ്റ്റ്‌മെന്റ് കമ്പനി ജിയോ പ്ലാറ്റ്‌ഫോമ്‌സില്‍ 100 കോടി ഡോളര്‍ നിക്ഷേപം നടത്തുമെന്നാണ് റിപ്പോർട്ടുകൾ വ്യക്തമാക്കുന്നത്.

ഇതുസംബന്ധിച്ച് കുറച്ചുദിവസങ്ങളായി റിലയന്‍സ് ഇൻഡസ്ട്രീസും മുബാദലയും തമ്മിൽ ചര്‍ച്ചകള്‍ നടത്തിവരികയാണ്. ജിയോ പ്ലാറ്റ്‌ഫോമിൽ ഒരുശതമാനത്തിലധികം ഉടമസ്ഥതാവകാശം സ്വന്തമാക്കാനാണ് മുബാദലയുടെ ശ്രമം. മുബാദലയുടെ നിക്ഷേപംകൂടി ലഭിക്കുന്നതോടെ ജിയോ പ്ലാറ്റ്‌ഫോമിന്റെ മൂല്യം ഏകദേശം അഞ്ചുലക്ഷം കോടി രൂപയാകും. നേരത്തെ ഫേസ്ബുക്ക്, ജനറല്‍ അറ്റ്‌ലാന്റിക്, വിസ്റ്റ ഇക്വിറ്റി പാര്‍ട്നേഴ്‌സ്, സില്‍വര്‍ ലേക്ക്, കെകെആര്‍ തുടങ്ങിയ കമ്പനികളില്‍ റിലയന്‍സ് ജിയോയില്‍ 1000 കോടി രൂപയിലധികം നിക്ഷേപം നടത്തിയിരുന്നു.

Also Read: കൊവിഡ് പ്രതിസന്ധിയിലും ഇന്ത്യയിലെ വിദേശനിക്ഷേപം കുത്തനെ ഉയർന്നു

ലോകത്തിലെ ഏറ്റവും വലിയ വിപണനകേന്ദ്രങ്ങളിലൊന്നായ ഇന്ത്യയിൽ പ്രവർത്തിക്കാനുള്ള സാധ്യതകൾ കണക്കിലെടുത്ത് ജിയോ പ്ലാറ്റ്ഫോം ലോകോത്തര നിക്ഷേപകരെ വളരെയധികം ആകർഷിക്കുന്നുണ്ടെന്ന് മുബാദല പറഞ്ഞതായി റോയിടേഴ്സ് റിപ്പോർട്ട് ചെയ്തു. അതേസമയം മൈക്രോ സോഫ്റ്റും ജിയോയില്‍ നിക്ഷേപം നടത്തുമെന്ന് റിപ്പോര്‍ട്ടുകളുണ്ടായിരുന്നു. 200 കോടി ഡോളര്‍ നിക്ഷേപം നടത്തുന്നത് സംബന്ധിച്ച് മൈക്രോസോഫ്റ്റും ജിയോയുമായി ചര്‍ച്ചകൾ നടന്നുവരികയാണെന്നും റിപ്പോർട്ടുകൾ വ്യക്തമാക്കുന്നു.