നിർണായകമായ ഏറ്റെടുക്കലുകൾ
ബിൽ ഗേറ്റ്‌സ്, വാറൻ ബഫറ്റ് തുടങ്ങിയവരെ പോലും പിന്നിലാക്കിയാണ് ഗൗതം അദാനി മുന്നിൽ എത്തിയിരിക്കുന്നത്. 4900 കോടി ഡോളറിന്റെവർധനയാണ് അദാനിയുടെ സമ്പത്തിൽ ഉണ്ടായത്. സ്വിസ് സിമന്റ് നിർമ്മാതാക്കളായ ഹോൾസിം ലിമിറ്റഡിന്റെ ഏറ്റെടുക്കൽ, എൻഡിടിവി മീഡിയ ഗ്രൂപ്പിന്റെ ഏറ്റെടുക്കൽ എന്നിവ ഈ വർഷം അദാനി ഗ്രൂപ്പ് നടത്തിയ ശ്രദ്ധേയമായ നിക്ഷേപങ്ങളായിരുന്നു. ബിസിനസ് വിപുലീകരിക്കുന്നതിൻെറ ഭാഗമായുള്ള ഈ ഏറ്റെടുക്കലുകൾ ഗൗതം അദാനിയുടെ പ്രധാന ബിസിനസ്സ് തീരുമാനങ്ങളിൽ ചിലതാണ്. ഹരിത ഊർജ രംഗത്തിനായി 7000 കോടി ഡോളർ നീക്കിവെക്കുമെന്നാണ് അദാനി ഗ്രൂപ്പ് പ്രഖ്യാപിച്ചിരിക്കുന്നത്. അദാനി ഗ്രൂപ്പ് ഏറ്റവും ഉയർന്ന വിപണി മൂല്യമുള്ള മുൻനിര ഇന്ത്യൻ കമ്പനിയായി മാറിയപ്പോൾ, ജീവകാരുണ്യ പ്രവർത്തനങ്ങളിലും അദ്ദേഹം കൂടുതൽ തുക ചെലവഴിക്കുന്നുണ്ട്.
ഓഹരികൾ കുതിക്കുന്നത് എന്തുകൊണ്ട് ?
അദാനി കമ്പനികളുടെ ഓഹരി വില കുതിച്ചത് തന്നെയാണ് ഇദ്ദേഹത്തിന് നേട്ടമായത്. ഇന്ത്യയിൽ ഈ വർഷം ഏറ്റവുമധികം നേട്ടമുണ്ടാക്കിയ മിഡ് കാപ് ഓഹരികളിൽ ഏഴോളം അദാനി കമ്പനി ഓഹരികളുണ്ട്. അദാനി ഗ്രൂപ്പ് കമ്പനികളിൽ ഗൗതം അദാനിയുടെ കൈവശമുള്ള ഓഹരികളുടെ മൂല്യം കഴിഞ്ഞ രണ്ട് വർഷത്തിനിടെ 11,200 കോടി ഡോളർ ആയി കുതിച്ചുയർന്നു. ലോകത്തിലെ എല്ലാ ശതകോടീശ്വരന്മാരിലും ഏറ്റവും ഉയർന്ന ഓഹരി വിഹിതമാണിതെന്ന് റിപ്പോർട്ടുകൾ സൂചിപ്പിക്കുന്നു.
കഴിഞ്ഞ രണ്ട് വർഷങ്ങളിൽ അദ്ദേഹത്തിന്റെ സമ്പത്ത് 365 ശതമാനമാണ് ഉയർന്നത് 3070 കോടിഡോളറിൽ നിന്നാണ് ആസ്തി 14270 കോടി ഡോളറായി പറന്നുയർന്നത്. ഏഷ്യയിൽ ഏറ്റവും തിരക്കേറിയ ഡീൽമേക്കറായി ഇപ്പോൾ അദാനി മാറി. മീഡിയ രംഗത്തും സിമന്റ് പോലുള്ള വൈവിധ്യമാർന്ന വ്യവസായങ്ങളിലും ഒരേ പോലെ വൻകിട നിക്ഷേപങ്ങൾ നടത്തിയത് കോർപ്പറേറ്റ് രംഗത്തെ ഈ വർഷത്തെ വാർത്താ താരമായി മാറാനും സഹായകരമായി.
ജീവകാരുണ്യ രംഗത്തും സജീവം
രാജ്യത്തെ ജീവകാരുണ്യ പ്രവർത്തനങ്ങളിലും ഇപ്പോൾ അദാനി കൂടുതൽ തുക ചെലവഴിക്കുന്നുണ്ട്. ഈ വർഷം ജൂണിൽ, തന്റെ 60-ാം ജന്മദിനത്തിൽ ആണ് അദാനി കൂടുതൽ ജീവകാരുണ്യ പ്രവർത്തനങ്ങൾ പ്രഖ്യാപിച്ചത്. രാജ്യത്തുടനീളം ആരോഗ്യ സംരക്ഷണം, വിദ്യാഭ്യാസം, നൈപുണ്യ വികസനം തുടങ്ങിയ മേഖലകളായി അദാനി 770 കോടി ഡോളർ തുകയാണ് വാഗ്ദാനം ചെയ്തത്ഗൗതം അദാനിയുടെ ഭാര്യ പ്രീതി അദാനിയുടെ നേതൃത്വത്തിലുള്ള അദാനി ഫൗണ്ടേഷനിലൂടെയാണ് ജീവകാരുണ്യ പ്രവർത്തനങ്ങൾ. എച്ച്‌സിഎൽ ടെക്‌നോളജീസ് ലിമിറ്റഡിന്റെ സ്ഥാപകനും ചെയർമാനുമായ ശിവ് നാടാർ, ഹാപ്പിയസ്റ്റ് മൈൻഡ്‌സ് ടെക്‌നോളജീസ് ലിമിറ്റഡിന്റെ എക്‌സിക്യൂട്ടീവ് ചെയർമാൻ അശോക് സൂത എന്നിവരും ജീവകാരുണ്യ പ്രവർത്തനങ്ങൾക്കായി കൂടുതൽ തുക ചെലവഴിച്ചു.