സബ്യസാച്ചി ഇനി ആദിത്യ ബിർളയുടേതും; സ്വന്തമാക്കിയത് 398 കോടി രൂപയ്ക്ക്

ഡൽഹി: പ്രശസ്ത ഫാഷൻ ഡിസൈനറായ സബ്യസാചി മുഖർജിയുടെ ഫാഷൻ ബ്രാൻഡിന്റെ പകുതിയോളം ഓഹരി ആദിത്യ ബിർള ഫാഷൻ ആൻഡ് റീട്ടെയിൽ (എബിഎഫ്ആർഎൽ) ഏറ്റെടുത്തു. സബ്യസാച്ചി കുച്യോറിന്റെ 51 ശതമാനം ഓഹരിയാണ് ആദിത്യ ബിർള ഫാഷൻ സ്വന്തമാക്കിയത്. 30 മുതൽ 40 ദിവസത്തിനുള്ളിൽ കരാർ പൂർത്തിയാകുമെന്ന് ആദിത്യ ബിർള ഫാഷൻ പ്രസ്താവനയിൽ പറഞ്ഞു.

വസ്ത്രങ്ങൾ, ആക്സസറികൾ, ആഭരണങ്ങൾ തുടങ്ങിയവയാണ് സബ്യസാച്ചി ബ്രാൻഡ് വിൽക്കുന്നത്. പ്രിയങ്ക ചോപ്ര, ദീപിക പദുക്കോൺ, അനുഷ്ക ശർമ്മ തുടങ്ങിയ നിരവധി താരങ്ങളുടെ വിവാഹ വസ്ത്രങ്ങൾ ഡിസൈൻ ചെയ്തു നൽകിയ ഡിസൈനർ എന്ന നിലയിൽ വാർത്തകളിൽ ഇടംനേടിയതോടെയാണ് സബ്യസാചി മലയാളികൾക്കിടയിൽ അറിയപ്പെടാൻ തുടങ്ങിയത്. 1990 ൽ സ്ഥാപിതമായ സബ്യസാച്ചി ബ്രാൻഡിന് ഇന്ത്യയിൽ കൂടാതെ യുഎസ്, യുകെ, മിഡിൽ ഈസ്റ്റ് എന്നിവിടങ്ങളിലും ഫ്രാഞ്ചൈസികളുണ്ട്. 274 കോടി രൂപയാണ് സബ്യസാച്ചിയുടെ വാർഷിക വരുമാനം.


അടുത്ത കുറച്ച് വർഷങ്ങൾകൊണ്ട് ഇന്ത്യൻ യുവത എത്‍നിക് വെയറുകൾ കൂടുതലായി ഉപയോഗിക്കാൻ തുടങ്ങും. അതിനാലാണ് എത്‍നിക് വെയറുകൾ വ്യാപകമായി വിറ്റഴിക്കുന്ന സബ്യസാച്ചിയുടെ ഓഹരികൾ ആദിത്യ ബിർള സ്വന്തമാക്കിയതെന്ന് ആദിത്യ ബിർള ഫാഷന്റെ മാനേജിംഗ് ഡയറക്ടർ ആശിഷ് ദീക്ഷിത് പറഞ്ഞു. രൂപകൽപ്പനയിലും കരകൗശലവിദ്യയിലും മികവ് പുലർത്തുന്നതിലൂടെ സബ്യസാച്ചി ബ്രാൻഡ് പുതിയ മാനദണ്ഡങ്ങൾ സൃഷ്ടിക്കുകയും ഉപഭോക്താക്കളെ ഉത്പന്നങ്ങൾ വാങ്ങിക്കുന്നതിൽ കൂടുതൽ ആകർഷിക്കുകയും ചെയ്തതായും അദ്ദേഹം പറഞ്ഞു.

മാളവിക മോഹൻ, നിത അംബാനി, ഓപ്ര വിൻഫ്രെ ഉൾപ്പടെയുള്ള നിരവധി താരങ്ങൾ സബ്യസാച്ചിയുടെ സെലിബ്രിറ്റി ഇടപാടുകാരിൽ ഉൾപ്പെടുന്നു. ശരാശരി രണ്ട് ലക്ഷം രൂപയ്ക്ക് മുകളിലാണ് സബ്യസാച്ചിയുടെ ഉത്പന്നങ്ങൾ വിൽക്കുന്നത്. ലൂയിസ് ഫിലിപ്പ്, വാൻ ഹ്യൂസെൻ, അലൻ സോളി, പീറ്റർ ഇംഗ്ലണ്ട് തുടങ്ങിയ ബ്രാൻഡ് ഉത്പന്നങ്ങൾ വിൽക്കുന്ന മൂവായിരത്തിലധികം സ്റ്റോറുകളുടെ ശൃംഖല എബി‌എഫ്‌ആർ‌എല്ലിലുണ്ട്.


നേരത്തെ ഇന്ത്യയിലെ പ്രശസ്ത ഡിസൈനർമാരായ ശാന്താനു, നിഖിൽ എന്നിവരുടെ ഡിസൈനർ കമ്പനിയായ ഫൈനെസ് ഇന്റർനാഷണൽ ഡിസൈന്റെ ഓഹരി ആദിത്യ ബിർള ഫാഷൻ സ്വന്തമാക്കിയിരുന്നു. 60 കോടി രൂപയ്ക്കാണ് കമ്പനിയുടെ ഓഹരി സ്വന്തമാക്കിയത്. ഇതുകൂടാതെ 110 കോടി രൂപയ്ക്ക് ജയ്പൂർ.കോം എന്ന എത്‍നിക് ഡിസൈനർ കമ്പനിയും ആദിത്യ ബിർള സ്വന്തമാക്കിയിട്ടുണ്ട്.