ആലിബാബയും ഫ്ലിപ്പ്‌കാർട്ടും ജബോംഗ് വാങ്ങാനുള്ള മത്സരത്തിൽ

മുംബൈ: ആലിബാബ, ഫ്യൂച്ചർ ഗ്രൂപ്പ്, ഫ്ലിപ്പ്‌കാർട്ട് യൂണിറ്റായ മിൻത്ര ആദിത്യ ബിർള ഗ്രൂപ്പിന്റെ ഇ-കൊമേഴ്‌സ് സംരംഭമായ അബോഫ് എന്നീ കമ്പനികൾ പ്രമുഖ ഓൺലൈൻ ഫാഷൻ പോർട്ടലായ ജബോംഗ് ഏറ്റെടുക്കാനുള്ള മത്സരത്തിലെന്ന് റിപ്പോർട്ട്. സ്‌നാപ്‌ഡീലും രംഗത്തുണ്ടെങ്കിലും കടുത്ത മത്സരത്തിനില്ല.

ജർമ്മൻ ഇൻക്യുബേറ്റർ കമ്പനിയായിരുന്ന റോക്കറ്റ് ഇന്റർനെറ്റ് 2012-ലാണ് ജബോംഗ് ആരംഭിച്ചത്. സ്വീഡിഷ് നിക്ഷേപ കമ്പനിയായ കിന്നെവിക്കിനും ജബോംഗിന്റെ പിതൃ ‌കമ്പനിയായ ഗ്ലോബൽ ഫാഷൻ ഗ്രൂപ്പിൽ വലിയൊരു ശതമാനം ഓഹരിയുണ്ട്.

വിൽപ്പനയെ കുറിച്ചുള്ള ഊഹങ്ങളെയും അഭ്യൂഹങ്ങളെയും കുറിച്ച് പ്രതികരിക്കാൻ തയ്യാറല്ലെന്ന് ജബോംഗിന്റെ കമ്മ്യൂണിക്കേഷൻ ഏജൻസി ‌പറഞ്ഞു. ഫ്ലിപ്പ്‌കാർട്ട് വക്താവും പ്രതികരിക്കാൻ വിസമ്മതിച്ചു.

എന്നാൽ കഴിഞ്ഞ ചില ആഴ്‌ചകളായി നാല് കമ്പനികളുമായും ചർച്ചയിലാണെന്നും വിൽപ്പന അന്തിമഘട്ടത്തിലെത്തിയിട്ടില്ലെന്നും ഒരു ജബോംഗ് എക്‌സിക്യുട്ടീവ് പറഞ്ഞു. ജബോംഗിൽ ഒരു വർഷം നടക്കുന്ന വിൽപ്പനയുടെ രണ്ടിരട്ടിയായിരിക്കും ഡീൽ തുക എന്നും റോക്കറ്റ് ഇന്റർനെറ്റിൽ നിന്നും കിന്നെവിക്കിൽ നിന്നുമുള്ള ഉദ്യോഗസ്ഥർ വിൽപ്പനയ്ക്ക് മേൽനോട്ടം വഹിക്കാൻ ഇന്ത്യയിൽ തങ്ങുന്നുണ്ടെന്നും അദ്ദേഹം പറഞ്ഞു.