ആലിബാബയുടെ ജാക് മാ പടിയിറങ്ങുന്നു

ഹോങ് കോങ്: ആലിബാബ സ്ഥാപകനും ചൈനീസ് കോടീശ്വരനുമായ ജാക് മാ ഒൗദ്യോഗിക ജീവിതത്തില്‍ നിന്ന് പടിയിറങ്ങുന്നു. സേവനപ്രവര്‍ത്തനങ്ങളുമായി ബന്ധപ്പെട്ട വിദ്യാഭ്യാസ മേഖലയുടെ പിന്നാലെ പോകാനാണ് ജാക് മായുടെ തീരുമാനം.

അധ്യാപക ജീവിതത്തില്‍ നിന്ന് പിന്മാറി ലോകത്തിലെ ഏറ്റവും വലിയ ഇ കൊമേഴ്സ് വിഭാഗമായ ആലിബാബ 1999 ല്‍ സ്ഥാപിക്കുകയായിരുന്നു മാ. ഇതീലൂടെ സ്വന്തമാക്കിയ 40 ബില്ല്യണ്‍ ഡോളര്‍ ആസ്ഥി മായെ ചൈനീസ് കോടീശ്വരനാക്കി മാറ്റി. ചൈനയിലെ ജനങ്ങള്‍ ആരാധിക്കുന്ന ഒരു വ്യക്തി കൂടിയാണ് മാ.

ആലിബാബയുടെ ഡയറക്ടര്‍ ബോര്‍ഡ് മെമ്പറായും മാര്‍ഗദര്‍ശിയായും മാ തുടരും. പടിയിറങ്ങുന്ന ദിവസമായ തിങ്കളാഴ്ച മാ 54 വയസിലേയ്ക്ക് എത്തുകയാണ്. 2013 ലാണ് മാ ആലിബാബയുടെ ചീഫ് എക്സിക്യൂട്ടീവ് സ്ഥാനത്തേയ്ക്ക് എത്തുന്നത്.

ഉത്പന്നങ്ങള്‍ വില്‍ക്കുന്നതിനായി ആരംഭിച്ച ഒാണ്‍ലൈൻ
കച്ചവടമേഖലയായ ആലിബാബയ്ക്ക് ഇന്ന് ഇ-കൊമേഴ്സ്, ഒാണ്‍ലൈന്‍ ബാങ്കിങ്, ക്ലൗഡ് കംപ്യൂട്ടിങ് തുടങ്ങിയ മേഖലകളിലെല്ലാം ആധിപത്യമുണ്ട്. കൂടാതെ ട്വിറ്റര്‍ പോലെയുള്ള വെയ്ബോ, പത്രമായ ദ സൗത്ത് ചൈന മോര്‍ണിംഗ് പോസ്റ്റ് എന്നിവയെല്ലാം ആലിബാബയുടെ ആസ്ഥിയാണ്.