സാമ്പത്തിക പ്രതിസന്ധിയിൽ രാജ്യം; ആശ്വാസമായി മൂന്നാം സാമ്പത്തിക പാക്കേജ്

ന്യൂഡൽഹി: കൊവിഡ് പ്രതിസന്ധിയിൽ നിന്ന് രാജ്യത്തെ കരകയറ്റാൻ മൂന്നാം സാമ്പത്തിക പാക്കേജ് പ്രഖ്യാപിച്ചിരിയ്ക്കുകയാണ് ധനമന്ത്രി നിര്‍മലാ സീതാരാമൻ. തൊഴിൽ സൃഷ്ടിയ്ക്കുന്നതിനായി ആത്മനിര്‍ഭര്‍ റോസ്ഗര്‍ യോജന എന്ന പദ്ധതി ഉൾപ്പെടെയാണ് പുതിയതായി പ്രഖ്യാപിച്ചത്. ഇപിഎഫ്ഒയിൽ രജിസ്റ്റര്‍ ചെയ്ത പുതിയ ജീവനക്കാര്‍ക്ക് കൊവിഡ് മൂലമുള്ള സാമ്പത്തിക സഹായം ലഭിയ്ക്കും.

* നിശ്ചിത തുകയിൽ താഴെ ശമ്പളമുള്ള ജീവനക്കാരുടെ ഇപിഎഫ് വിഹിതം സര്‍ക്കാര്‍ നൽകും.
ഒക്ടോബര്‍ 1 മുതലാണ് പദ്ധതി പ്രാബല്യത്തിൽ വരിക. പുതിയതായി ജോലി കിട്ടിയവര്‍ക്കും കൊവിഡ് പ്രതിസന്ധി മൂലം തൊഴിൽ നഷ്ടമായവര്‍ക്കും സഹായം ലഭിയ്ക്കും. ഇപിഎഫ്ഒയിൽ രജിസ്റ്റര്‍ ചെയ്തിരിയ്ക്കുന്ന എല്ലാ സംഘടനകൾക്കും പദ്ധതി ബാധകമാകും. 1,000-ത്തിൽ താഴെ ജീവനക്കാരുള്ള കമ്പനികളുടെ ഇപിഎഫ് വിഹിതം സര്‍ക്കാര്‍ നൽകും എന്നാണ് സൂചന. സ്ഥാപനങ്ങൾ പുതിയതായി ജീവനക്കാരെ ഉൾപ്പെടുത്തുന്നവയായിരിക്കണം.

* കൂടാതെ പ്രധാനമന്ത്രി ആവാസ് യോജന പദ്ധതിയ്ക്ക് കീഴിൽ കൂടുതൽ തുക വിലയിരുത്തും. 18,000 കോടി രൂപയാണ് അധികമായി വക ഇരുത്തുന്നത്. രണ്ടു കോടി വരെയുള്ള വീടുകൾ നിര്‍മിയ്ക്കുന്ന ബിൽഡര്‍മാര്‍ക്കും വീടു വാങ്ങുന്നവര്‍ക്കും നികുതി ഇളവുകളും പ്രഖ്യാപിച്ചിട്ടുണ്ട്.

* കര്‍ഷകര്‍ക്ക് വളങ്ങൾക്ക് സബ്‍സിഡിയായി 65,000 കോടി രൂപ നൽകും. കൊവിഡ് വാക്സിൻ വികസിപ്പിയ്ക്കാനുള്ള ഗവേഷണ പ്രവര്‍ത്തനങ്ങൾക്കായി 900 കോടി രൂപ വക ഇരുത്തിയിട്ടുണ്ട്.

*26 കൊവിഡ് ബാധിത മേഖലകൾക്ക് ക്രെഡിറ്റ് ഗ്യാരൻറി പദ്ധതി പ്രകാരം സഹായം . സംരഭകര്‍ക്ക് അധിക വായ്പ ലഭ്യമാക്കുന്നതാണ് പദ്ധതി. 2021 മാര്‍ച്ച് 31 വരെയാണ് പദ്ധതി നീട്ടിയത്. ആത്മ നിര്‍ഭര്‍ പദ്ധതിയുടെ മൂന്നാം ഘട്ടമാണ് ഇപ്പോൾ നടപ്പിലാക്കുന്നത്. 12-ഓളം പദ്ധതികൾ ആണ് പുതിയതായി പ്രഖ്യാപിയ്ക്കുന്നത്.

Also Read: ദീപാവലി; പ്രത്യേക സാമ്പത്തിക പാക്കേജ് പ്രഖ്യാപിയ്ക്കാൻ ഒരുങ്ങി കേന്ദ്രം

കൊവിഡ് മൂലമുള്ള പ്രതിസന്ധിയിൽ നിന്ന് രാജ്യം തിരിച്ചു കയറിത്തുടങ്ങിയെന്നും രാജ്യത്തെ കൊവി‍ഡ് കേസുകൾ കുറഞ്ഞു തുടങ്ങിയിട്ടുണ്ടെന്നും ധനമന്ത്രി നിര്‍മലാസീതാരാമൻ പറഞ്ഞു. ബാങ്ക് വായ്പകളിൽ 5.1 ശതമാനം വളര്‍ച്ചയുണ്ട്. വിപണി റെക്കോര്‍ഡ് ഉയരത്തിലാണ്. അതേസമയം രാജ്യം കടുത്ത സാമ്പത്തിക പ്രതിസന്ധിയിൽ ആണെന്ന് ആര്‍ബിഐ ഡേറ്റ വ്യക്തമാക്കുന്നു. തൊഴിൽ നഷ്ടം ആണ് പ്രധാനമായും സാമ്പത്തിക വളര്‍ച്ചയെ ബാധിച്ചത്.

പെര്‍ഫോമൻസിൻെറ അടിസ്ഥാനത്തിൽ ഇൻസെൻറീവ് നൽകുന്നത് 10 മേഖലകളിലൂടെ വ്യാപിപ്പിയ്ക്കാൻ സര്‍ക്കാര്‍ കഴിഞ്ഞ ദിവസം തീരുമാനിച്ചിരുന്നു. നാലു വര്‍ഷത്തേയ്ക്ക് 1.46 ലക്ഷം കോടി രൂപയായിരിയ്ക്കും ഇതിനായി നീക്കി വയ്ക്കുക.