ഓര്‍ഡര്‍ തിരിച്ചയക്കുന്നവരെ ബ്ലോക്ക് ചെയ്ത് ആമസോണ്‍

ന്യൂഡല്‍ഹി: ഓണ്‍ലൈനില്‍ സാധനങ്ങള്‍ വാങ്ങിക്കുമ്പോള്‍ പലപ്പോഴും അബദ്ധങ്ങള്‍ പറ്റാറുണ്ട്. ഇങ്ങനെയുള്ള ഉല്‍പ്പന്നങ്ങള്‍ കമ്പനികള്‍ തിരിച്ചെടുത്ത് മാറ്റി നല്കാറുമുണ്ട്. എന്നാല്‍ ഇങ്ങനെ തിരിച്ചയക്കുന്നവരുടെ അക്കൌണ്ട് ആമസോണ്‍ ബ്ലോക്ക് ചെയ്യുന്നു എന്നാണ് പുതിയ റിപ്പോര്‍ട്ട്.

നിലവിലുള്ള അക്കൗണ്ടുകള്‍ക്കു വിലക്കേര്‍പ്പെടുത്തിയതിനു പുറമേ പുതിയ അക്കൗണ്ട് തുടങ്ങാനും കമ്പനി സമ്മതിക്കുന്നില്ല എന്നും പരാതിയുണ്ട്. ഓര്‍ഡര്‍ ചെയ്ത ഉത്പന്നങ്ങള്‍ കൈപ്പറ്റിയശേഷം നിരന്തരം തിരിച്ചയക്കുന്ന ഉപയോക്താക്കളെയാണ് ബ്ലോക്ക് ചെയ്തത്. ഇത്തരത്തില്‍ ബ്ലോക്ക് ചെയ്യപ്പെട്ട നിരവധി അക്കൗണ്ട് ഉടമകള്‍ പരാതിയുമായി രംഗത്തെത്തി.

എന്നാല്‍, ഉപയോക്താക്കളുടെ അക്കൗണ്ടുകള്‍ വിലക്കുന്നതിനുള്ള പൂര്‍ണ അധികാരം തങ്ങള്‍ക്കുണ്ടെന്നുള്ളത് ആമസോണിന്‍റെ നിയമാവലിയില്‍ പറയുന്നുണ്ട്. അതേസമയം തങ്ങളുടെ സേവനം ദുരുപയോഗം ചെയ്തവരെ മാത്രമാണ് വിലക്കിയതെന്നും അതിനുള്ള പൂര്‍ണ അധികാരം തങ്ങള്‍ക്കുണ്ടെന്നും ആമസോണ്‍ പറയുന്നു