അടച്ചു തീർത്തത് പത്തു ലക്ഷം രൂപയുടെ ലോൺ; ഏതോ മാലാഖയെന്ന് പാവങ്ങൾ

കൊച്ചി: കൊറോണക്കാലത്ത് തങ്ങളുടെ മാലാഖയായി എത്തിയ അജ്ഞാതന് നന്ദി പറയുകയാണ് മിസോറാമിലെ നാല് പാവങ്ങൾ. എസ്ബിഐയിൽ ഉണ്ടായിരുന്ന തങ്ങളുടെ 10 ലക്ഷം രൂപയുടെ ലോൺ ആരോ അടച്ചു തീ‍ര്‍ത്തിരിയ്ക്കുന്നു.

താൻ ആരാണെന്ന് വെളിപ്പെടുത്തരുത് എന്ന ക‍ര്‍ശന നി‍ര്‍ദേശം നൽകിയാണ് ഈ അജ്ഞാതൻ ലോൺ അടച്ച് തീ‍ര്‍ത്തത്. സദ്പ്രവ‍ര്‍ത്തി മറ്റൊരാൾ അറിയേണ്ട എന്നതാണത്രേ കാരണം.
നാലു പേ‍ര്‍ക്ക് അദ്ദേഹം ട്രാൻസ്ഫ‍ര്‍ ചെയ്തു നൽകിയ തുക 9,96,365 രൂപയാണ്. സഹായം നൽകിയതിൽ മൂന്ന് പേ‍ര്‍ സ്ത്രീകളാണ്. മിസോറാമിലെ എയിസ്വൾ ബ്രാഞ്ചിലാണ് സംഭവം.

Also Read; ഗ്രാമങ്ങളിൽ 50 ശതമാനം വീടുകളിലും ദാരിദ്ര്യം; മഴക്കാലത്ത് സ്ഥിതി രൂക്ഷമാകും

ബാങ്ക് ശാഖയിൽ എത്താറുള്ളയാൾ വസ്തു ഈടിൻമേൽ ലോൺ എടുത്ത് തിരിച്ചടവ് നടത്താൻ ബുദ്ധിമുട്ടുള്ളവരുടെ വിവരങ്ങൾ നൽകാൻ ബാങ്ക് മാനേജരോട് ആവശ്യപ്പെടുകയായിരുന്നു. 10 ലക്ഷം രൂപ വരെയാണ് തനിയ്ക്ക് പരമാവധി അടയ്ക്കാനാകുക എന്നും വെളിപ്പെടുത്തി. ബാങ്ക് നൽകിയ വിവരങ്ങൾ അനുസരിച്ചാണ് അജ്ഞാതൻ പണം അയച്ചത്.

സംരംഭം തുടങ്ങാൻ ലോൺ എടുത്തവരും ഇക്കൂട്ടത്തിലുണ്ട്. ലോക്ക്ഡൌൺ മൂലം ദുരിതത്തിലായവരിൽ നിന്ന് നാലു പേരെയാണ് ബാങ്ക് തെരഞ്ഞെടുത്തത്. ബാങ്ക് അറിയിച്ചതിനെ തുടർന്ന് ആധാരം തിരിച്ചു വാങ്ങാൻ ബാങ്കിൽ എത്തിയവർ ആ സുമനസ്സിനെ ഒന്ന് കാണണം എന്ന് ആവശ്യപ്പെട്ടു. ബാങ്കിൽ നിന്ന് വിളിച്ചെങ്കിലും അയാൾ നിരസിയ്ക്കുകയായിരുന്നു.