ആപ്പിളിലൂടെ ശതകോടീശ്വരനായി ടിം കുക്കും; സ്വപ്‍ന നേട്ടം നൽകിയത് ആപ്പിൾ ഓഹരികൾ തന്നെ

ടെക് കമ്പനിയായ ആപ്പിളിലൂടെ ലോകത്തെ ശതകോടീശ്വരൻമാരുടെ നിരയിലേക്ക് ഉയര്‍ന്ന് ആപ്പിൾ സിഇഒ ടിം കുക്കും. കുക്കിന് സ്വപ്ന നേട്ടം നൽകിയത് ആപ്പിളിൻെറ ഓഹരികൾ തന്നെ. കമ്പനിയുടെ 8,47,969 ഓഹരികളാണ് ടിം കുക്കിൻെറ പക്കൽ ഉള്ളത്. ആപ്പിളിൻെറ മൂല്യം ഉയര്‍ന്നതാണ് ടിം കുക്കിനെ ശതകോടീശ്വരൻ ആക്കിയത്.

കമ്പനിയുടെ സാലറി പാക്കേജിൻെറ ഭാഗമായാണ് ഇത്രയധികം ഓഹരികൾ കുക്കിൻെറ പക്കൽ വന്നത്.
എന്നാൽ തൻെറ കൈവശമുള്ള ഓഹരികളുടെ നല്ലൊരു പങ്കും ഇതോടകം ടിം കുക്ക് ദാനം നൽകിയിട്ടുമുണ്ട്. പുതിയ ഐഫോൺ ആപ്പിൾ വാച്ച് എന്നീ ഉത്പന്നങ്ങൾ വികസിപ്പിയ്ക്കുന്നതിനാണ് ടിം കുക്ക് നേതൃത്വം നൽകുന്നത്. ഒൻപത് വര്‍ഷങ്ങൾക്ക് മുൻപാണ് ടിം കുക്ക് ആപ്പിൾ സിഇഒ ആയി നിയമിതനാകുന്നത്.

Also Read: ലോകത്തെ നാലാമത്തെ വലിയ സമ്പന്നനായി മുകേഷ് അംബാനി

കൊവിഡ് 19 പ്രതിസന്ധി മൂലം ആളുകൾ അധികം പുറത്തിറങ്ങാതെ ഓൺലൈനിൽ കൂടുതൽ സമയം ചെലവഴിച്ചത് ടെക്നോളജി കമ്പനികളുടെ എല്ലാം വരുമാനം ഉയര്‍ത്തിയിട്ടുണ്ട്. ആമസോൺ, ഫേസ്ബുക്ക്, ആപ്പിൾ തുടങ്ങിയ കമ്പനികളുടെ എല്ലാം വരുമാനത്തിൽ വര്‍ധനയുണ്ട്.

കഴിഞ്ഞയാഴ്ച ഫേസ്ബുക്ക് സ്ഥാപകൻ മാര്‍ക്ക് സുക്കര്‍ബര്‍ഗിൻെറ ആസ്തി 100 ബില്ല്യൺ ഡോളര്‍ കടന്നിരുന്നു. ഇതോടെ ലോകത്തെ ഏറ്റവും വലിയ സമ്പന്നരായ ജെഫ് ബെസോസിനും ബിൽഗേറ്റ്സിനും ഒപ്പം സുക്കര്‍ബര്‍ഗും ഇടനേടിയിരുന്നു.