മുംബൈ ഭീകരാക്രമണവും തട്ടിക്കൊണ്ടുപോകലും, അപകടങ്ങളിൽനിന്ന് അത്‍ഭുതകരമായി രക്ഷപ്പെട്ട സമ്പന്നൻ

ബിസിനസ് മിടുക്കും തടസ്സങ്ങളെ മറികടക്കാനുള്ള അദ്ദേഹത്തിന്റെ കഴിവും ഈ വിജയത്തിന് കാരണമായിട്ടുണ്ട്. വ്യക്തിപരമായ ജീവിതത്തിലും അദ്ദേഹം നിരവധി പ്രതിബന്ധങ്ങളെ മറികടന്നിരുന്നു. മുംബൈ ഭീകരാക്രമണം, തട്ടിക്കൊണ്ടുപോകൽ എന്നിവയിൽനിന്നെല്ലാം വളരെ അത്‍ഭുതകരമായി രക്ഷപ്പെട്ട വ്യക്തിയാണ് അദാനി.

Also Read: ഏഷ്യയിലെ രണ്ടാമത്തെ ധനികൻ; ചൈനയിലെ ജലരാജാവിനെ കടത്തി ഗൗതം അദാനി

1998 ജനുവരി ഒന്നിനായിരുന്നു അദാനിയെയും സുഹൃത്ത് ശാന്തിലാൽ പട്ടേലിനേയും കർണാവതി ക്ലബ്ബിൽ നിന്ന് ഒരുസംഘം തോക്ക് ചൂണ്ടി കാറിൽ തട്ടിക്കൊണ്ടുപോയത്. 11 കോടി രൂപയായിരുന്നു അന്ന് ഗുണ്ടാസംഘം മോചനദ്രവ്യമായി ആവശ്യപ്പെട്ടിരുന്നതെന്ന് മുംബൈ പോലീസ് സമർപ്പിച്ച കുറ്റപത്രത്തിൽ പറയുന്നു.

അധോലോക ഗുണ്ടാത്തലവനായ ഫസ്ലു റഹ്മാൻ, ഭോഗിലാൽ ദാർജി അഥവാ മാമ എന്നിവർ ചേർന്നായിരുന്നു അദാനിയെ തട്ടിക്കൊണ്ടുപോയത്. കേസിലെ രണ്ട് പ്രധാന പ്രതികളായ ഇവരെ 2018 ൽ അഹമ്മദാബാദ് കോടതി കുറ്റവിമുക്തരാക്കി. തട്ടിക്കൊണ്ടുപോകലുമായി ബന്ധപ്പെട്ട് ഇവരുടെ പങ്ക് സ്ഥാപിക്കുന്നതിൽ പ്രോസിക്യൂഷൻ പരാജയപ്പെട്ടതിനാലാണ് കോടതി ഇരുവരേയും കുറ്റവിമുക്തരാക്കിയത്. പ്രശസ്ത അഭിഭാഷകനായ കുനാൽ എൻ ഷായാണ് പ്രതികൾക്ക് വേണ്ടി ഹാജരായത്. കേസിൽ അറസ്റ്റിലായ മറ്റ് ആറ് പേരെയും കോടതി 2005ൽ കുറ്റവിമുക്തനാക്കിയിരുന്നു.

2008 നവംബർ 26 ന് മുംബൈയിലെ താജ് ഹോട്ടലിൽ തീവ്രവാദികൾ നടത്തിയ ഭീകരാക്രമണത്തിൽ നിന്ന് അതിസാഹസികമായാണ് അദാനി രക്ഷപ്പെട്ടത്. അന്ന് രാത്രി താജിലെ വെതർ ക്രാഫ്റ്റ് റെസ്റ്റോറന്റിൽ ദുബൈ പോർട്ട് സിഇഒ മുഹമ്മദ് ഷറഫിനൊപ്പം അത്താഴം കഴിക്കാനെത്തിയതായിരുന്നു അദ്ദേഹം. ആക്രമണ സമയത്ത് അദ്ദേഹം കെട്ടിടത്തിന്റെ ബേസ്മെന്റിൽ ഒളിക്കുകയായിരുന്നു. പിന്നീട് പട്ടാളമെത്തി സ്ഥിതിഗതികൾ നിയന്ത്രിക്കുകയും തീവ്രവാദികളെ കീഴടക്കുകയും ചെയ്തപ്പോഴാണ് അദാനി അവിടെനിന്ന് രക്ഷപ്പെട്ട് പുറത്തെത്തിയത്.