അസമിലെ സ്വർണ തേയില ഇത്തവണ ലേലത്തിൽ വിറ്റത് റെക്കോർഡ് വിലയ്ക്ക് !

ഡൽഹി: അസമിലെ മനൊഹരി തേയില എസ്റ്റേറ്റ് ഉത്പാദിപ്പിക്കുന്ന പ്രശസ്ത തേയിലയായ മനൊഹരി ഗോൾഡ് ടീ റെക്കോർഡ് വിലയ്ക്ക് ലേലം ചെയ്തു. ഗുവാഹത്തി ടീ ലേല കേന്ദ്രത്തിൽ വച്ച് നടന്ന് ലേലത്തിൽ ഒരു കിലോ മനൊഹരി ഗോൾഡ് തേയില 75,000 രൂപയ്ക്കാണ് വിറ്റത്. കണ്ടംപററി ബ്രോക്കേഴ്‌സ് പ്രൈവറ്റ് ലിമിറ്റഡ് ലേലത്തിൽ വച്ച തേയില ഗുവാഹത്തിയിലെ തേയില ഉത്പാദകരായ വിഷ്ണു ടീ കമ്പനിയാണ് വാങ്ങിയത്.

ലേലത്തിൽ സ്വന്തമാക്കിയ മനൊഹരി ഗോൾഡ് ടീ വിഷ്ണു ടീ കമ്പനി അവരുടെ ഡിജിറ്റൽ ഇ-കൊമേഴ്‌സ് വെബ്‌സൈറ്റായ 9amtea.com വഴി ലോകമെമ്പാടും വിൽക്കും. അസമിൽ നിന്നുള്ള പ്രസിദ്ധവും അപൂർവവുമായ തേയിലയാണ് മനൊഹരി ഗോൾഡ് ടീ. തുടർച്ചയായ മൂന്നാംതവണയാണ് റെക്കോർഡ് വിലയ്ക്ക് മനൊഹരി തേയില വിൽക്കുന്നത്. 2018ൽ എസ്റ്റേറ്റിന്റെ ചരിത്രത്തിൽ ആദ്യമായി ഒരു കിലോഗ്രാം മനൊഹരി ഗോൾഡ് ടീ 39,001 രൂപയ്ക്ക് വിറ്റിരുന്നു.

Also Read: ഈ ക്രെഡിറ്റ് കാർഡ് ഉപയോഗിച്ച് സൗജന്യമായി ട്രെയിൻ ടിക്കറ്റ് ബുക്ക് ചെയ്യാം

2019ൽ ഒരു കിലോഗ്രാം മനൊഹരി തേയില വിറ്റത് 50,000 രൂപയ്ക്കായിരുന്നു. ഇതിന് പിന്നാലെ ഇത് മൂന്നാമത്തെ തവണയാണ് എല്ലാ റെക്കോർഡുകളും തകർത്ത് മനൊഹരി തേയില എക്കാലത്തേയും ഉയർന്ന നിരക്കിൽ വിൽക്കുന്നത്. ഈ വർഷം 2.5 കിലോഗ്രാം മനൊഹരി തേയിലയാണ് ഉൽപാദിപ്പിച്ചത്. ഇതിൽ 1.2 കിലോഗ്രാം ലേലത്തിൽ വിറ്റു.

ബാക്കി ജിടിഎസി ലോഞ്ച് ഉൾപ്പെടെയുള്ള തിരഞ്ഞെടുത്ത ഔട്ട്‌ലെറ്റുകളിൽ ലഭ്യമാക്കും. ലോകത്തിലെതന്നെ ഏറ്റവും അപൂർവമായ ചായയിൽ ഒന്നാണ് മനൊഹരി ഗോൾഡ് ടീയെന്നും ഇതിന് ആവശ്യക്കാർ ഏറെയാണെന്നും മനോഹാരി ടീ എസ്റ്റേറ്റ് ഡയറക്ടർ പാർത്ത് ലോഹിയ പറഞ്ഞു.