ലോക്ക് ഡൗൺ: വാഹന വ്യവസായ മേഖലയ്ക്ക് പ്രതിദിനം 2,300 കോടി രൂപ നഷ്ടം; സിയാം

മുംബൈ: കൊറോണ വൈറസ് ബാധയുമായി ബന്ധപ്പെട്ട് ലോക്ക് ഡൗൺ പ്രഖ്യാപിച്ചതിനെ തുടർന്ന് രാജ്യത്തെ വാഹന വ്യവസായ മേഖലയ്ക്ക് പ്രതിദിനം 2,300 കോടി രൂപ നഷ്ടം നേരിടേണ്ടിവന്നതായി ഇന്ത്യൻ വാഹന നിർമാതാക്കളുടെ അസോസിയേഷൻ (സിയാം) അറിയിച്ചു. 45 ദിവസം പ്ലാന്റുകൾ അടച്ചിട്ടതോടെ രാജ്യത്തെ വാഹന വ്യവസായത്തിന് നഷ്ടമായത് ഒരു ലക്ഷം കോടി രൂപയാണെന്നും സിയാം പ്രസിഡന്റ് രാജൻ വധേര വ്യക്തമാക്കി.

കൊവിഡ് വ്യാപനത്തെ തുടർന്ന് മാര്‍ച്ച് 16 മുതല്‍ രണ്ടു ഘട്ടങ്ങളിലായാണ് രാജ്യത്ത് ലോക്ക് ഡൗൺ പ്രഖ്യാപിച്ചത്. മാർച്ച് 24ന് നീട്ടിയ ലോക്ക് ഡൗൺ മെയ് മൂന്നിന് അവസാനിക്കും. ഇതുമൂലം ഫാക്ടറികള്‍ ഉൾപ്പടെയുള്ള മുഴുവൻ വ്യാവസായ സംരഭങ്ങളും അടച്ചിട്ടിരുന്നു. ഉത്പാദനം നടക്കാതിരുന്നത് വാഹന നിര്‍മാതാക്കളെ കൂടാതെ ചരക്ക് സേവനത്തെയും സാരമായി ബാധിച്ചു.

Also Read: കൊവിഡ്-19; വ്യാപാരത്തിൽ ഏറ്റവും വലിയ തിരിച്ചടി നേരിട്ടത് ഇന്ത്യയിൽനിന്ന്- ആമസോൺ

ചരക്ക് സേവന നികുതിയിനത്തില്‍ 28,000 കോടിയും സംസ്ഥാനങ്ങളിലെ വിവിധ നികുതിയിനത്തില്‍ 14,000 കോടിയുമാണ് നഷ്ടമുണ്ടായത്. രാജ്യത്തെ വാഹന നിര്‍മാണ പ്ലാന്റുകള്‍ തുറക്കുന്നതിന് സര്‍ക്കാര്‍ അനുമതി നല്‍കിയിട്ടുണ്ട്. എന്നാല്‍ ഡീലര്‍മാര്‍ തുറന്നുപ്രവര്‍ത്തിക്കാത്തതിനാല്‍ വാഹന വില്‍പന നടക്കുന്നില്ലെന്ന് കമ്പനി അധികൃതർ പറയുന്നു. അതേസമയം, കൊറോണ വൈറസ് മൂലം ഇന്ത്യൻ വാഹന വ്യവസായത്തിന് ഉണ്ടായേക്കാവുന്ന നാശനഷ്ടങ്ങളെക്കുറിച്ച് വാഹന കമ്പനികൾക്ക് നേരത്തെ മുന്നറിയിപ്പ് നൽകിയിരുന്നുവെന്നും രാജൻ വധേര പറഞ്ഞു.