ക്യാഷ് ബാക്ക് നല്‍കുന്നത് എങ്ങനെ ചൂതാട്ടമാകും? ഗൂഗിളിനെതിരെ പേടിഎം

ഡൽഹി: ഗൂഗിള്‍ പ്ലേ സ്റ്റോറില്‍ നിന്ന് നീക്കം ചെയ്ത് മണിക്കൂറുകള്‍ക്കുള്ളില്‍ പേടിഎം തിരിച്ചെത്തിയെങ്കിലും വിവാദം പുകയുന്നു. സ്ക്രാച്ച് കാർഡിൽനിന്ന് ലഭിക്കുന്ന കാഷ് ബാക്ക് ആനുകൂല്യം ചൂതാട്ടമെന്ന് വിശേഷിപ്പിക്കാനാവില്ലെന്ന് പേടിഎം സ്ഥാപകൻ വിജയ് ശേഖർ ശർമ പറഞ്ഞു. ഐപിഎൽ ക്രിക്കറ്റ് മത്സരങ്ങൾ തുടങ്ങുന്നതിന് മുന്നോടിയായി പേടിഎം ആപ്പിൽ ‘പേടിഎം ക്രിക്കറ്റ് ലീഗ്’ എന്ന ഗെയിം ആരംഭിച്ചിരുന്നു. ഓരോ ഇടപാടിന് ശേഷവും ഉപയോക്താക്കൾക്ക് കിട്ടുന്ന കളിക്കാരുടെ സ്റ്റിക്കറുകളിലൂടെ കാഷ് ബാക്ക് ലഭിക്കുന്ന ഗെയിമായിരുന്നു പേടിഎം ക്രിക്കറ്റ് ലീഗ്. ഈ സംവിധാനത്തെ ഗൂഗിൾ ചൂതാട്ടത്തിന് തുല്യമാണെന്ന് പറയുകയും നയത്തിന് എതിരാണെന്ന് ചൂണ്ടിക്കാട്ടി ഗൂഗിൾ പ്ലേ സ്റ്റോറിൽനിന്ന് ആപ്പ് നീക്കം ചെയ്യുകയുമായിരുന്നുവെന്നും അദ്ദേഹം കൂട്ടിച്ചേർത്തു.

ഗെയിമിംഗ്, വാതുവയ്പ്പ് നയങ്ങള്‍ ലംഘിച്ചതിന്റെ പേരിലാണ് പേടിഎമ്മിനെ ഗൂഗിള്‍ പ്ലേ സ്റ്റോറിൽനിന്ന് നീക്കം ചെയ്തത്. ചൂതാട്ട ആപ്ലിക്കേഷനെ അംഗീകരിക്കില്ലെന്നായിരുന്നു പേടിഎം നീക്കം ചെയ്തുകൊണ്ട് ഗൂഗിൽ പറഞ്ഞത്. ഓൺലൈൻ കാസിനോകളെ അനുവദിക്കുകയോ സ്പോർട്സ് വാതുവയ്പ്പ് സുഗമമാക്കുന്ന അനിയന്ത്രിതമായ ചൂതാട്ട ആപ്ലിക്കേഷനുകളെ പിന്തുണയ്ക്കുകയോ ചെയ്യുന്നില്ലെന്നും ഗൂഗിൾ വ്യക്തമാക്കിയിരുന്നു.

Also Read: എയ്ഞ്ചൽ ബ്രോക്കിങ് ഐപിഒ സെപ്റ്റംബര്‍ 22 മുതല്‍

അതേസമയം പേടിഎം ഇതിനകം തന്നെ ഗൂഗിളിന്റെ നിർദ്ദേശങ്ങൾ പാലിച്ചതായും സ്ക്രാച്ച് കാർഡുകൾ നീക്കം ചെയ്തിട്ടുണ്ടെന്നും സിഎൻ‌ബി‌സി-ടിവി 18 ന് നൽകിയ അഭിമുഖത്തിൽ ശർമ്മ പറഞ്ഞു. ആപ്പിന്റെ പ്രൊമോഷൻ ആരംഭിച്ചതായും നിലവിൽ പുതിയ ഉപഭോക്താക്കളെ ആപ്പിലേക്ക് കൊണ്ടുവരാൻ കഴിയില്ലെന്നും അദ്ദേഹം വ്യക്തമാക്കി. തങ്ങൾ നിലനിൽക്കുന്നത് ഗൂഗിളിന്റെ കാരുണ്യത്തിലാണെന്നും അദ്ദേഹം പറഞ്ഞു.

പേടിഎം ഫസ്റ്റ് ഗെയിമുകൾ എന്ന് വിളിക്കുന്ന പേടിഎമ്മിന്റെ ഫാന്റസി സ്‌പോർട്‌സ് സേവനവും ഒറ്റപ്പെട്ട ആപ്ലിക്കേഷനായി ലഭ്യമാണ്. മാത്രമല്ല ഇതും പ്ലേ സ്റ്റോറിൽ നിന്നും നീക്കം ചെയ്തിട്ടുണ്ട്. മാർക്യൂ ആപ്ലിക്കേഷനിൽ ഫാന്റസി സ്‌പോർട്‌സ് സേവനത്തെ പ്രോത്സാഹിപ്പിച്ച പേടിഎം പ്ലേ സ്റ്റോറിന്റെ നയങ്ങൾ ആവർത്തിച്ച് ലംഘിച്ചതായി ഗൂഗിൾ പറ‍ഞ്ഞിരുന്നു. എന്നാൽ പേടിഎം ആപ്ലിക്കേഷനിലെ ഏത് സേവനമാണ് പാലിക്കാത്തതെന്ന് ഗൂഗിൾ ഇതുവരെ വ്യക്തമാക്കിയിട്ടില്ല. ആപ്ലിക്കേഷനുകളിൽ നിന്ന് ഉപയോക്താക്കളെ മറ്റ് പ്ലാറ്റ്‌ഫോമുകളിലേക്ക് റീഡയറക്‌ട് ചെയ്യുന്നത് ഗൂഗിളിന്റെ നയങ്ങൾക്ക് കീഴിൽ അനുവദനീയമല്ല. എന്നാൽ പേടിഎം ഈ നയം ലംഘിച്ചതായും ഗൂഗിൾ ചൂണ്ടിക്കാട്ടി.