അദാനിയുടെ 'നിഴൽക്കമ്പനി' 1,500 കോടി രൂപക്ക് സ്വന്തമാക്കാൻ ഒരുങ്ങി ബെയിൻ കാപിറ്റൽ

മുംബൈ: ഗൗതം അദാനിയുടെ ഏഴ് വർഷം പഴക്കമുള്ള ‍ അദാനി ക്യാപിറ്റൽ ഏറ്റെടുക്കാൻ ഒരുങ്ങി ബെയിൻ കാപിറ്റൽ എന്ന സ്ഥാപനം. ചർച്ചകൾ അന്തിമ ഘട്ടത്തിലാണ്. ഏറ്റെടുക്കലിനായി കമ്പനി 1500 കോടി രൂപ മുതൽ മുടക്കിയേക്കും എന്നാണ് സൂചന. അദാനി ക്യാപിറ്റലിൻെറ മാനേജ്‌മെൻറിൽ ലേമാൻ ബ്രദേഴ്‌സിൻെറയും മാക്വാരി ഇൻവെസ്റ്റ്‌മെൻറ് ബാങ്കറായ ഗൗരവ് ഗുപ്തയുടെയും നിക്ഷേപമുണ്ട്. 2016-ൽ സ്ഥാപിച്ച കമ്പനിയുടെ 10 ശതമാനം ഓഹരികൾ ഇവരുടെ ഉടമസ്ഥതയിലാണ്. സ്ഥാപനത്തിൻെറ 90 ശതമാനവും ഗൗതം അദാനിയുടെ ഉടമസ്ഥതയിലാണ്.2023 സാമ്പത്തിക വർഷത്തിൻെറ അവസാനത്തിൽ കമ്പനി 3,977 കോടി രൂപയുടെ ആസ്തി നേടിയതായി ആണ് റിപ്പോർട്ടുകൾ. ഒരു വർഷം മുമ്പുള്ളതിനേക്കാൾ 63 ശതമാനമാണ് ആസ്തി വർധിച്ചത്. ബെയിൻ കമ്പനിയിൽ 1,500 കോടി രൂപ നൽകുമെന്നും 500 കോടി രൂപ പ്രാഥമിക മൂലധനം നിക്ഷേപിക്കുമെന്നുമാണ് സൂചന. അതേസമയം ഗൗതം അദാനി കമ്പനിയിൽ എന്തുമാത്രം ഓഹരികൾ നിലനിർത്തും എന്നതിൽ വ്യക്തതയില്ല.



2017 ഏപ്രിലിൽ അദാനി ക്യാപിറ്റൽ കമ്പനിക്ക് കീഴിൽ വായ്പാ വിതരണം ആരംഭിച്ചിരുന്നു. കമ്പനിയുടെ മാനേജ്‌മെന്റിന് കീഴിൽ 4,000 കോടി രൂപയാണ് ആസ്തി. കമ്പനിയുടെ പ്രവർത്തനങ്ങളെ റീട്ടെയിൽ, മൊത്തവ്യാപാര വായ്പ എന്നിങ്ങനെ വിഭജിക്കാം. അദാനി ഗ്രൂപ്പിൻെറ പ്രൊമോട്ടർമാർ പ്രാഥമിക, ദ്വിതീയ ഓഹരി വിൽപ്പനയിലൂടെ ഗ്രൂപ്പ് കമ്പനികളിലെ ഓഹരി പങ്കാളിത്തം കുറക്കുകയാണ്. ആഗോള നിക്ഷേപ അന്തരീക്ഷത്തിലെ മാന്ദ്യം കണക്കിലെടുത്ത്, ക്യാഷ് റിസർവ് വർധിപ്പിക്കുകയാണ് ലക്ഷ്യം. കമ്പനി റീട്ടെയിൽ ലോണുകൾ മാത്രമല്ല ഗ്രാമീണ മേഖലയിലും ലോണുകൾ നൽകുന്നുണ്ട്.

വിവിധ മേഖലകളിൽ സാന്നിധ്യമുണ്ട്. കമ്പനിയുടെ ലോണുകളിൽ ഏറ്റവും വലുത് കാർഷിക മേഖലയിൽ വിതരണം ചെയ്യുന്ന ലോണുകളാണ്. ചെറുകിട, ഇടത്തരം ബിസിനസുകൾക്കും ഇത് വായ്പ നൽകുന്നു. ഗുജറാത്ത്, മഹാരാഷ്ട്ര, രാജസ്ഥാൻ, കർണാടക, ആന്ധ്രാപ്രദേശ്, തെലങ്കാന, മധ്യപ്രദേശ്, ഉത്തർപ്രദേശ്, തമിഴ്‌നാട് എന്നിവയുൾപ്പെടെ ഒമ്പത് സംസ്ഥാനങ്ങളിൽ സാന്നിധ്യമുണ്ട്.