ഒട്ടേറെ നേട്ടം തരുന്ന പാചകം
ബെംഗളൂരുവിൽ ഒരു എൻജിഒയിൽ വോളൻറിയര്‍ ആയ രവികല പ്രകൃതി വിഭവങ്ങൾ പാഴായിപോകാതിരിക്കാനും പുനരുപയോഗം ചെയ്യാനുമൊക്കെ ശ്രദ്ധിക്കുന്ന ഒരു വ്യക്തിയാണ്. സൗരോര്‍ജം പ്രയോജനപ്പെടുത്തുന്നത് കൂടാതെ, മഴവെള്ള സംഭരണി, കമ്പോസ്റ്റിങ് തുടങ്ങിയവ എല്ലാം വീട്ടിൽ തന്നെയുണ്ട്. മൂന്ന് സോളാര്‍ പാനലുകളാണ് ഇവരുടെ വീടിൻെറ ടെറസിന് മുകളിൽ സ്ഥാപിച്ചിരിക്കുന്നത്.
വൈദ്യുത ഉപയോഗം നന്നേ കുറവ്. സോളാര്‍ കുക്കര്‍ എത്തിയതോടെ ഗ്യാസ് സിലിണ്ടര്‍ ചെലവും കുറഞ്ഞു. ഒരു സിലിണ്ടര്‍ എടുത്താൽ ഒരു മാസം അധികം ഉപയോഗിക്കാം. ആദ്യം സോളാര്‍ കുക്കറിലെ പാചകം പ്രയാസമാണെന്ന് തോന്നുമെങ്കിലും പിന്നീട് എളുപ്പമാകും. വെളിച്ചത്തിൽ പാചകം ചെയ്യുന്ന ഭക്ഷണപദാര്‍ത്ഥങ്ങൾക്കുമുണ്ട് പ്രത്യേക രുചി. പാചകത്തിന് ഉപയോഗിക്കുന്ന തക്കാളിയും ഇഞ്ചിയും മുരിങ്ങക്കോലും ചീരയും എല്ലാം വീട്ടിൽ തന്നെ നട്ടു വളര്‍ത്തുന്നതാണ്.
പ്രതിവര്‍ഷ ലാഭം 20,000 രൂപ
പാചകത്തിനായി സോളാര്‍ കുക്കര്‍ ഉപോയോഗിച്ചും അടുക്കളയിലേക്കാവശ്യമായ പച്ചക്കറികൾ നട്ടുനനച്ച് വളര്‍ത്തിയും ഒക്കെ ഒരു മാസത്തെ കുടുംബ ബജറ്റിൽ നല്ലൊരു തുക കയ്ക്കാൻ ആകുന്നുണ്ടെന്ന് ഈ വീട്ടമ്മ പറയുന്നു. എത്ര കൂട്ടിക്കിഴിച്ചാലും പ്രതിവര്‍ഷം ലാഭം 20,000 രൂപയോളം വരും. പാചക വാതക ചെലവുകൾ കുറയുന്നതും, സൗരോര്‍ജം ഉപയോഗിക്കുന്നതിനാൽ വൈദ്യുത ചാര്‍ജിൽ ഗണ്യമായ കുറവുള്ളതും കുടുംബ ബജറ്റ് ലാഭിക്കാൻ സഹായകരമാകുന്നു. 300-ൽ അധികം മുരിങ്ങക്കയാണ് കഴിഞ്ഞ വര്‍ഷം രവികലയുടെ തൊടിയിൽ വിളഞ്ഞത്. പച്ചക്കറിക്കായി അധിക തുക പുറത്ത് കൊടുക്കേണ്ടി വരുന്നില്ലെന്നതും നേട്ടമാണ്.