സംസ്ഥാനത്ത് നാലു ദിവസം തുടര്‍ച്ചയായി ബാങ്ക് അവധി

തിരുവനന്തപുരം: ഓണത്തോടനുബന്ധിച്ചുള്ള അവധി വെള്ളിയാഴ്ച തുടങ്ങുന്നതോടെ സംസ്ഥാനത്തെ ബാങ്കുകള്‍ക്ക് ഈ ആഴ്ച്ച തുടര്‍ച്ചയായി നാല് ദിവസം അവധി. ആഗസ്റ്റ് 24 മുതല്‍ 27 വരെയാണ് ബാങ്ക് അവധി.

പ്രളയത്തെ തുടര്‍ന്ന് കേരളത്തിലെ ചില ബാങ്കുകളും എ ടി എമ്മുകളും കഴിഞ്ഞ ദിവസങ്ങളില്‍ പ്രവര്‍ത്തിച്ചിരുന്നില്ല. ഇതോടെ പണം ഇല്ലാതെ എ ടി എമ്മുകളും പ്രവര്‍ത്തനരഹിതമായേക്കാം എന്നാണ് സൂചന.

ആഗസ്റ്റ് 24 വെള്ളി ഒന്നാം ഓണവും ശനി തിരുവോണവുമാണ്. ഈ രണ്ട് ദിവസങ്ങളിലും ബാങ്കുകള്‍ക്ക് അവധിയാണ്. അടുത്ത ദിവസമായ ഞായറും അവധി തന്നെ. 27 ന് തിങ്കളാഴ്ച്ച ശ്രീനാരായണഗുരു ജയന്തിയും പ്രമാണിച്ചാണ് തുടര്‍ച്ചയായ ബാങ്ക് അവധി വരുന്നത്.

അതേസമയം പ്രളയത്തെ തുടര്‍ന്ന് സംസ്ഥാനത്തൊട്ടാകെ വ്യാപക നാശനഷ്ടങ്ങള്‍ ഉണ്ടായ പശ്ചാത്തലത്തില്‍ വിദ്യാഭ്യാസ വായ്പ ഒഴികെയുള്ള എല്ലാ വായ്പകള്‍ക്കും ഒരു വര്‍ഷത്തെ മൊറട്ടോറിയം അനുവദിക്കാന്‍ സംസ്ഥാന ബാങ്കേഴ്സ് സമിതി തീരുമാനിച്ചിട്ടുണ്ട്. ഇത് ജൂലൈ 31 മുതല്‍ പ്രാബല്യത്തില്‍ വരും. വിദ്യാഭ്യാസ വായ്പയ്ക്ക് ആറ് മാസത്തെ മൊറട്ടോറിയം ഏര്‍പ്പെടുത്താനും തീരുമാനമായിട്ടുണ്ട്. അടുത്ത മൂന്ന് മാസത്തേക്ക് ഒരു റിക്കവറി നടപടിയും വേണ്ടെന്ന് ബാങ്കുകള്‍ക്ക് നിര്‍ദേശം നല്‍കിയതായി ബാങ്കേഴ്സ് സമിതി വ്യക്തമാക്കിയിട്ടുണ്ട്.