രണ്ടു ദിവസത്തെ ബാങ്ക് പണിമുടക്ക് ബാങ്കിങ് സേവനങ്ങളെ ബാധിച്ചേക്കും

കൊച്ചി: ബാങ്ക് യൂണിയനുകളുടെ പണിമുടക്ക് ഈ മാസം ബാങ്കിംഗ് സേവനങ്ങളെ ബാധിച്ചേക്കുമെന്ന് വ്യക്തമാക്കി കാനറ ബാങ്ക് . മാർച്ച് 15, മാർച്ച് 16 തീയതികളിൽ ആണ് ബാങ്ക് യൂണിയനുകൾ ബാങ്ക് പണിമുടക്കിന് ആഹ്വാനം നൽകിയിരിയ്ക്കുന്നത്. ഇത് ഈ മാസം ബാങ്കിങ് സേവനങ്ങൾ അവതാളത്തിൽ ആക്കിയേക്കും. ഇന്ത്യൻ ബാങ്ക് അസോസിയേഷനെ ഇക്കാര്യം അറിയിച്ചിട്ടുണ്ടെന്നും ബാങ്ക് തലത്തിലുള്ള ഏതെങ്കിലും പ്രശ്നങ്ങൾക്കല്ല പണിമുടക്കെന്നും കാനറാ ബാങ്ക് വ്യക്തമാക്കി.

അതേസമയം പണിമുടക്ക് പ്രഖ്യാപിച്ചിരിയ്ക്കുന്ന ദിവസങ്ങളിൽ ബാങ്ക് ശാഖകളുടെയും ഓഫീസുകളുടെയും സുഗമമായ പ്രവർത്തനത്തിന് ആവശ്യമായ നടപടികൾ സ്വീകരിക്കുമെന്ന് കാനറ ബാങ്ക് അറിയിച്ചു. എങ്കിലും പണിമുടക്ക് ഉണ്ടായാൽ ബ്രാഞ്ചുകളുടെയും ഓഫീസുകളുടെയും പ്രവർത്തനത്തെ അത് ബാധിച്ചേക്കാം.

Also Read: ഒരു ദിവസം എത്ര രൂപയുടെ ഓൺലൈൻ പണമിടപാടുകൾ നടത്താം; ഇക്കാര്യങ്ങൾ അറിഞ്ഞിരിയ്ക്കാം

ഓൾ ഇന്ത്യ ബാങ്ക് എംപ്ലോയീസ് അസോസിയേഷൻ , ഓൾ ഇന്ത്യ ബാങ്ക് ഓഫീസേഴ്‌സ് കോൺഫെഡറേഷൻ നാഷണൽ കോൺഫെഡറേഷൻ ഓഫ് ബാങ്ക് എംപ്ലോയീസ് , ഓൾ ഇന്ത്യ ബാങ്ക് ഓഫീസേഴ്‌സ് അസോസിയേഷൻ , ബാങ്ക് എംപ്ലോയീസ് ഫെഡറേഷൻ ഓഫ് ഇന്ത്യ, ഇന്ത്യൻ നാഷണൽ ബാങ്ക് എംപ്ലോയീസ് ഫെഡറേഷൻ ഓഫ് കാനറ ബാങ്ക് എംപ്ലോയീസ് കോൺഗ്രസ്, നാഷണൽ ഓർഗനൈസേഷൻ ഓഫ് ബാങ്ക് ഓഫീസർമാർ (NOBO) തുടങ്ങിയവയ്ക്ക് കീഴിലെ അംഗങ്ങൾ പണിമുടക്കിൽ പങ്കാളികൾ ആയേക്കും എന്നാണ് സൂചന.

കേന്ദ്ര ബജറ്റിൽ പൊതുമേഖലാ സ്ഥാപനങ്ങളുടെ ഓഹരി വിറ്റഴിക്കൽ പദ്ധതിയുടെ ഭാഗമായി രണ്ട് പൊതുമേഖലാ ബാങ്കുകളെ (സ്വകാര്യവത്കരിക്കുന്നതായി ധനമന്ത്രി നിർമ്മല സീതാരാമൻ പ്രഖ്യാപിച്ചിരുന്നു. ഇതിനെതിരെയുൾപ്പെടെയാണ് ബാങ്കിങ് സംഘടനകളുടെ പണിമുടക്ക്.
2019 ൽ ഐഡിബിഐ ബാങ്കിൻെറ ഭൂരിപക്ഷം ഓഹരികളും എൽ‌ഐ‌സിക്ക് വിറ്റ് ബാങ്ക് സ്വകാര്യവത്കരിച്ചിരുന്നു. കഴിഞ്ഞ നാല് വർഷത്തിനുള്ളിൽ 14 പൊതുമേഖലാ ബാങ്കുകളെ ലയിപ്പിച്ചിരുന്നു

നികുതി, പെൻഷൻ പേയ്മെൻറുകൾ, ചെറുകിട സമ്പാദ്യ പദ്ധതികൾ തുടങ്ങിയ സർക്കാർ അനുബന്ധ ബിസിനസുകളിൽ എല്ലാ സ്വകാര്യമേഖല ബാങ്കുകൾക്കും ഭാഗമാകാമെന്ന് ധനമന്ത്രാലയം അടുത്തിടെ പ്രഖ്യാപിച്ചിരുന്നു. ഇതിലും ബാങ്കിങ് സംഘടവകൾക്ക് വിയോജിപ്പുണ്ട്.